Women’s World Cup: હરમનપ્રીતની અડધી સદી, છતાં ન્યૂઝીલેન્ડ સામે ભારતનો પરાજય!

 

હરમનપ્રીત કૌરની આક્રમક અડધી સદી છતાં વિમેન્સ વર્લ્ડ કપમાં ગુરૂવારે રમાયેલી મેચમાં ભારતીય મહિલા ક્રિકેટ ટીમને ન્યૂઝીલેન્ડ સામે 62 રને પરાજયનો સામનો કરવો પડ્યો છે. હેમિલ્ટન ખાતે રમાયેલી મેચમાં ભારતે ટોસ જીતીને ન્યૂઝીલેન્ડને પ્રથમ બેટિંગનું આમંત્રણ આપ્યું હતું. ન્યૂઝીલેન્ડે અમેલિયા કેર અને સેટ્ટર્થવેઈટની અડધી સદીની મદદથી નિર્ધારીત 50 ઓવરમાં નવ વિકેટે 260 રનનો સ્કોર નોંધાવ્યો હતો. જેના જવાબમાં ભારતીય ટીમ 46.4 ઓવરમાં 198 રનમાં આઉટ થઈ ગઈ હતી. ભારત માટે હરમનપ્રીત કૌરે લડાયક ઈનિંગ્સ રમી હતી અને અડધી સદી ફટકારી હતી. જોકે, સામે છેડે તેને યોગ્ય સહકાર મળ્યો ન હતો જેના કારણે ભારતને પરાજયનો સામનો કરવો પડ્યો હતો.

ન્યૂઝીલેન્ડ સામે પરાજય બાદ ભારતીય ટીમ આઠ ટીમોમાં પાંચમાં ક્રમે જતી રહી છે જ્યારે ન્યૂઝીલેન્ડની ટીમ ત્રણ મેચમાં બે વિજય સાથે બીજા ક્રમે છે. ઓસ્ટ્રેલિયા ટોચના સ્થાને છે. ભારત માટે પૂજા વાસ્ત્રાકરે 10 ઓવરમાં 34 રન આપીને ચાર વિકેટ ઝડપી હતી. જ્યારે હરમનપ્રીત કૌરે 62 બોલમાં 71 રનની ઈનિંગ્સ રમી હતી. બંને ખેલાડીના શાનદાર પ્રદર્શન છતાં ભારત વિજય નોંધાવી શક્યું ન હતું.

261 રનના લક્ષ્યાંક સામે ભારતીય ટીમની શરૂઆત ઘણી જ ખરાબ રહી હતી. 50 રના સ્કોર સુધીમાં ભારતે પોતાની ટોચની ત્રણ વિકેટ ગુમાવી દીધી હતી. ઓપનર યાસ્તિકા ભાટિયા 28 રન નોંધાવીને આઉટ થઈ હતી. જ્યારે સ્મૃતિ મંધાના છ અને દીપ્તિ શર્મા પાંચ રનનું યોગદાન આપી શકી હતી. મિતાલી રાજ અને હરમનપ્રીતે બાજી સંભાળવાનો પ્રયાસ કર્યો હતો પરંતુ મિતાલી 31 રન નોંધાવીને આઉટ થઈ ગઈ હતી.

હરમનપ્રીતે એક છેડો જાળવી રાખ્યો હતો પરંતુ સામે છેડે ટીમે નિયમિત અંતરે વિકેટો ગુમાવી હતી. કૌરે 63 બોલમાં છ ચોગ્ગા અને બે સિક્સર સાથે 71 રન ફટકાર્યા હતા. ન્યૂઝીલેન્ડ માટે લીઆ તાહુહુ અને એમેલિયા કેરે ત્રણ-ત્રણ વિકેટ ઝડપી હતી. જ્યારે હેલી જેનસેને બે તથા જેસ કેર અને હન્ના રોએ એક-એક વિકેટ ઝડપી હતી.

અગાઉ ન્યૂઝીલેન્ડે અમેલિયા કેરના 50 અને સેટ્ટર્થવેઈટની 75 રનની ઈનિંગ્સની મદદથી 260 રનનો સ્કોર નોંધાવ્યો હતો. આ ઉપરાંત વિકેટકીપર બેટર કેટી માર્ટિનએ 41 રનનું યોગદાન આપ્યું હતું. ભારતે ટોસ જીતીને પ્રથમ બોલિંગનો નિર્ણય કર્યો હતો પરંતુ તે ન્યૂઝીલેન્ડની બેટર્સ પર કોઈ દબાણ બનાવી શકી ન હતી. ભારત માટે પૂજા વસ્ત્રાકરે ચાર તથા ગાયકવાડે બે વિકેટ ઝડપી હતી.

Source link