Women World Cup IND Vs SA: એક નો-બોલના લીધે ભારતનું વર્લ્ડકપ જીતવાનું સપનું તૂટ્યું

 

છેક સુધી ભારતે મેચ પર પોતાની પક્કડ બનાવ્યા બાદ અંતિમ ઓવરમાં ત્રણ બોલ બાકી હતા અને એક નો-બોલના કારણે બાજી પલ્ટાઈ ગઈ હતી. નો બોલના લીધે સાઉથ આફ્રીકાનું પલડું ભારે થઈ ગયું અને મેચ છેલ્લા બોલ સુધી ગયા બાદ આફ્રીકાએ તે જીતી લીધી હતી. ભારતે ખરાબ શરુઆત બાદ સ્કોરને 274 સુધી પહોંચાડ્યો હતો.

ભારતીય મહિલા ટીમનું વર્લ્ડકપ જીતવાનું સપનું ફરી એકવાર અધુરું રહ્યું હતું. અંતિમ લીગ મેચમાં સાઉથ આફ્રીકા સામે જીત મેળવવી જરુરી હતી પરંતુ તેમ થઈ શક્યું નહીં. ભારત તરફથી મિતાલી રાજ, શેફાલી વર્મા અને સ્મૃતિ મંધાનાએ હાફ સેન્ચ્યુરી કરીને સ્કોરને 274 સુધી પહોંચાડ્યો હતો. જેના જવાબમાં સાઉથ આફ્રીકાએ 3 વિકેટથી મેચ જીતી લીધી હતી. જેમાં વોલ્વાર્ડે 80 રનનું અને મિગનન ડુ પ્રીઝે 52 રનનું યોગદાન આપ્યું હતું.

અંતિમ ઓવરમાં આફ્રીકાને મેચ જીતવા માટે 7 રનની જરુર હતી

સાઉથ આફ્રીકાને અંતિમ ઓવરમાં મેચ જીતવા માટે 7 રનની જરુર હતી. બીજા બોલ પર ત્રિશા ચેટ્ટી ઝડપથી બીજો રન લેવાના ચક્કરમાં હરમનપ્રીત કૌરના સીધા થ્રોનો શિકાર બની હતી. જ્યાં સુધી તે ક્રિઝમાં પહોંચે દીપ્તિ શર્માએ ગિલ્લી ઉડાવી દીધી હતી. ઓવરના 5મં બોલ પર દીપ્તિ શર્માએ પ્રીઝને કૌરના હાથે કેચ આઉટ કરાવી હતી, પરંતુ બોલ નો-બોલ રહ્યો હતો. જે બાદ આફ્રીકા પાસે એક બોલ વધી ગયો અને રન ઘટી ગયા, આ પછી આફ્રીકાએ 2 બોલમાં 2 રન બનાવવાના હતા.

પછી સાઉથ આફ્રીકાએ કર્યું કમબેક

આ પછી એમ કેપે 30 બોલમાં તોફાની 32 રન કરીને સાઉથ આફ્રીકાનું મેચમાં કમબેક કરાવ્યું હતું. જોકે, હરમનપ્રીત કૌરે સીધો થ્રો કરીને રિચા ઘોષના હાથે રન આઉટ કરાવી હતી. આ પછી રાજશ્રીએ ક્લોય ટ્રાયોનને 17 રનના સ્કોર પર આઉટ કરતા આફ્રીકા 255/6 વિકેટ થઈ ગઈ હતી.

હરમનપ્રીત અને ગાયકવાડે કરાવ્યું કમબેક

ભારત માટે ખતરનાક બની રહેલી વોલ્વાર્ડ અને ગુડાલની જોડીને રાજશ્રી ગાયકવાડે તોડી હતી. ગાયકવાડે ગુડાલને 49 રનના સ્કોર પર સ્ટમ્પ આઉટ કરાવી હતી. આ પછી હરમનપ્રીતે વોલ્વાર્ડને બોલ્ડ કરીને મોટો ઝાટકો આપ્યો હતો. જેણે 11 ચોગ્ગાની મદદથી 79 બોલમાં 80 રન બનાવ્યા હતા. આ પછી કેપ્ટન સુને લુસેને હરમને LBW કરાવી હતી. તે 22 રન બનાવીને આઉટ થઈ ગઈ હતી.

Source link