Vadodaraના નારી સંરક્ષણ ગૃહમાંથી ભાગેલી યુવતીઓમાંની બે રાજકોટમાંથી ઝડપાઈ!

 

વડોદરાઃ વડોદરાના નારી સંરક્ષણ ગૃહમાંથી ત્રણ યુવતીઓ સોમવારે માડી રાત્રે નાસી છૂટી હતી. નાસી છૂટેલી યુવતીઓ (Girls escaped)ને ઝડપી પાડવા માટે પોલીસે વિવિધ ટીમ બનાવીને કાર્યવાહી હાથ ધરી હતી. જેમાં પોલીસને મોટી સફળતા મળી હતી. પોલીસે ગણતરીના જ કલાકોમાં એક બાંગ્લાદેશી સહિત બે યુવતીઓને રાજકોટમાંથી ઝડપી પાડી છે. આ બંને યુવતીઓમાંથી એક બાંગ્લાદેશની પોપીબેગમ ઉર્ફે ફરજાના મોહમ્મદ શેખ અને બીજી પશ્ચિમ બંગાળની મૌસમી ઉર્ફે સારમીન મીંટુ શેખનો સમાવેશ છે. આ બંને યુવતીઓને વડોદરા (Vadodara news) લાવવામાં આવી હતી. આ યુવતીઓને નારી સંરક્ષણ ગૃહ (Women’s Defense Home)માં ફાવતુ ન હોવાથી તેઓ ભાગી ગઈ હોવાનું પોલીસ સમક્ષ કબૂલાત કરી હતી. હાલ બંને યુવતીઓને નારી સંરક્ષણ ગૃહને સોંપવામાં આવી છે.

હાવરા અમદાવાદ એક્સપ્રેસ ટ્રેનમાંથી બોગસ આધારકાર્ડ સાથે બે બાંગ્લાદેશી સહિત ત્રણ યુવતીઓ ઝડપાઈ હતી. જે બાદ તેઓને વડોદરા નારી સંરક્ષણ ગૃહમાં મોકલવામાં આવી હતી. નારી સંરક્ષણ ગૃહની દીવાલ પાસે કચરાની ડોલ મૂકીને તેના પર ચઢીને તેઓ ફરાર થઈ હતી. જે બાદ પોલીસે તપાસ હાથ ધરી હતી. ઝડપાયેલી યુવતીઓની પોલીસે તપાસ કરી તો તેઓના નામ પશ્ચિમ બંગાળની મૌસમી ઉર્ફે સારમીન મીંટુ શેખ, બાંગ્લાદેશની યાસ્મીન ઉર્ફે જન્નત અને પોપીબેગમ ઉર્ફે ફરજાના મોહમ્મદ શેખ હોવાનું સામે આવ્યું હતું. ત્રણેયના આધારકાર્ડની તપાસ કરતા ભરૂચનું સરનામુ સામે આવ્યું હતું. જે બાદ પોલીસે ગુનો નોંધીને કાર્યવાહી હાથ ધરી હતી. એ પછી ત્રણેય યુવતીઓને વડોદરાના નિઝામપુરમાં આવેલા નારી સંરક્ષણ ગૃહમાં રાખવામાં આવી હતી.

આ ત્રણેય યુવતીઓ સોમવારે નારી સંરક્ષણ ગૃહમાંથી નાસી છૂટી હતી. જે બાદ યુવતીઓને શોધી કાઢવા પોલીસે વિવિધ ટીમ બનાવીને શોધખોળ હાથ ધરી હતી. પોલીસે વિવિધ સીસીટીવી ફૂટેજ પણ ચકાસ્યા હતા. જે બાદ રાજકોટ લોકલ ક્રાઈમ બ્રાંચે નારી સંરક્ષણ ગૃહમાંમથી ફરાર થયેલી એક બાંગ્લાદેશી અને એક પશ્ચિમ બંગાળની યુવતીને રાજકોટમાંથી શોધી કાઢી હતી. ત્યારબાદ બંને યુવતીઓને રાજકોટમાંથી વડોદરા લાવી નારી સંરક્ષણ ગૃહને સોંપવામાં આવી હતી. એસીપી ધર્મેન્દ્ર સિંહ ચાવડાએ જણાવ્યું કે, નારી સંરક્ષણ ગૃહમાં ફાવતુ ન હોવાથી ત્રણેય યુવતીઓ નાસી ગઈ હતી. જો કે, હજુ એક બાંગ્લાદેશી યુવતી ફરાર હોવાથી પોલીસ દ્વારા તેની શોધખોળ ચાલુ છે.

Source link