Surat: 18 વર્ષની બહાદુર યુવતીએ ઘરમાં ઘુસેલા લૂટારુંઓ સાથે બાથ ભીડી અને ભગાડ્યા

 

Surat Braveheart 18 year old Girl: સુરતના ચલથાણમાં 18 વર્ષની બહાદુર છોકરીએ જે કર્યું તે ખરેખર બિરદાવાને પાત્ર છે. તેણે હિંમત દાખવીને ત્રણ ત્રણ હથિયારબંધ લૂંટારુંઓ સાથે લડત લડી અને ઘરને લૂંટતા બચાવ્યું હતું. આ દરમિયાન તેને ઈજા પણ થઈ હતી. જોકે લૂંટારુંઓ પોતાના ઈરાદામાં નાકામ રહ્યા હતા અને ઊભી પૂંછડીએ ભાગ્યા હતા.

 

સુરતની બહાદુર છોકરીએ કોલેજમાં મળેલી સેલ્ફ ડિફેન્સની ટ્રેનિંગના આધારે 3-3 સશસ્ત્ર લૂંટારુંઓને ખદેડ્યા.

હાઈલાઈટ્સ:

  • 18 વર્ષની રિયા સ્વૈનની બહાદુરી જોઈને સશસ્ત્ર લૂંટારુઓએ ભાગવું પડ્યું હતું, યુવતીને ઈજા થતાં 24 ટાંકા આવ્યા હતાં.
  • કોલેજમાં લીધેલી સેલ્ફ ડીફેન્સની ટ્રેનિંગનો ઉપયોગ કરીને યુવતીએ લૂંટારુંઓને હંફાવ્યો અને ભગાડ્યા.
  • બીજા દિવસે પરીક્ષા હોવાથી મોડી રાત સુધી યુવતી ઘરમાં બેસીને વાચી રહી હતી જ્યારે પરિવારના સભ્યો સૂઈ ગયા હતા.
સુરતઃ પલસાણાની ચલથાણની રામ કબીર સોસાયટીમાં ઘર નં. C 51માં રહેતા અને મૂળ ઓડિશાના બાબુરામ કાશીનાથ સ્વાઇન પોતાની પત્ની ભારતીબેન અને 2 દીકરી રિયા અને રિચા સાથે રહે છે. મંગળવારની રાત્રે પરિવારના 3 સભ્યો સુઈ ગયા હતા. તેવામાં મધ્યરાત્રી સમયે ઘરનો દરવાજાનો નકુચો તોડી હથિયાર સાથે ત્રણ લૂંટારા ઘૂસી ગયા હતા. મોટી 20 વર્ષીય દીકરી રિયાની કોલેજની પરીક્ષા હોવાથી વાંચન કરતી હતી.

લૂંટારાઓને પહેલા તો અપેક્ષા જ નહતી કે ઘરમાં કોઈ જાગી રહ્યું હશે અને જ્યારે તેમણે યુવતીને જોઈ તો એક લૂંટારો આગળ આવ્યો અને તેણે યુવતીના ગળે ચપ્પુ મૂકી ધમકી આપી જોકે યુવતીએ કોલેજમાં સેલ્ફ ડિફેનસિંગની ટ્રેનિંગ લીધી હતી તેને કામે લગાડી અને લૂંટારુંઓનો હિંમતપૂર્વક સામનો કરતા, ત્રણે લૂંટારાને ભાગવું પડ્યું હતું. પરંતુ આ ઝપાઝપીમાં યુવતીને હાથના ભાગે ચપ્પુથી ઇજા થતાં 24 જેટલા ટાંકા આવ્યા હતા. ઘટના બાદ કડોદરા પોલીસ પણ પહોંચી હતી અને જરુરી કાર્યવાહી આરંભી હતી.

બનાવની વિગતે વાત કરીએ તો બારડોલી પાટીદાર સાયન્સ કોલેજમાં બી.એસ.સી. પ્રથમ વર્ષમાં અભ્યાસ કરતી યુવતીની પરીક્ષા ચાલતી હોવાથી મંગળવારે રાત્રે જમી પરવારીને ઘરના વચ્ચેના રૂમમાં વાંચતી હતી. યુવતીએ કહ્યું કે ‘મમ્મી પપ્પા રૂમમાં અને નાનીબેન મારી પાસે સુઈ ગઇ હતી. મધ્યરાત્રિના 1.30 વાગ્યાની આસપાસ અચાનક વીજ પાવર ગયો હતો. ઘરમાં અંધારું છવાય ગયું હતું. એજ સમયે પાછળના રૂમમાં કઈક જોરથી ખખડવાનો અવાજ આવ્યો હતો, પરંતુ અંધારું હોવાથી કઈક વસ્તુ પડી હશે, એવું સમજી હતી.’

તેણે આગળ વધુમાં કહ્યું કે ‘પરંતુ થોડી જ ક્ષણમાં લાઈટ આવી ગઈ હતી. ત્યાં સામે એક વ્યક્તિ હાથમાં ચપ્પુ જેવું હથિયાર લઈ મારી તરફ આવીને મારા ગળાના ભાગે ચપ્પુ મુકવાનો પ્રયાસ કર્યો હતો. જોકે તેવા સમયે કોલેજમાં શીખવેલ સેલ્ફ ડિફેનસિંગની ટ્રેનિગના યાદ આવતાં મે હિંમત કરી અને ડર્યા વગર તેમનો સામનો કર્યો હતો. જે દરમિયાન અજાણ્યા વ્યક્તિના હાથમાંનું ચપ્પુ મારા જમણા હાથમાં વાગી ગયુ હતું, છતાં પણ હિંમત પૂર્વક તેને પછાડી બુમાબૂમ કરી હતી. આ દરમિયાન અન્ય બે અજાણ્યા વ્યક્તિ પણ હાથમાં ચપ્પુ લઈ ઘરમાં ઘૂસી આવ્યા હતા.’

રુંવાડા ઉભા કરી દેતી આ ઘટનામાં જ્યારે બીજા લૂંટારુએ યુવતીની નાની બહેનના ગળા પર ચપ્પુ મુકવાનો પ્રયાસ કરતા તે તરત દોડી હતી અને બીજા લૂંટારુંનો પણ પ્રતિકાર ધક્કો મારી નીચે પાડી દીધો હતો. યુવતીએ કહ્યું કે તેટલામાં મારી મમ્મી પપ્પા પણ જાગી જતા મારી મમ્મીએ બૂમાબૂમ કરતા પરિવારને ઉઠેલું જોઈ, રૂમમાં સામે પડેલો મારા ઘરનો મોબાઈલ ફોન તેમજ રસોડામાંથી એક ડબ્બો લઈ પાછળના બારણેથી બહાર નીકળી ત્રણેય લૂંટારુઓ રેલવેની દીવાલ કૂદી રેલવે પાટા તરફ ભાગી છૂટ્યા હતા. મારા હાથમાંથી લોહી નીકળતું હોય, લોહીલુહાણ હાલત જોઈ મમ્મી પપ્પા ગભરાય ગયા હતા, આસપાસ લોકોને જગાડી મને કડોદરા હોસ્પિટલમાં સારવાર માટે લઈ ગયા હતા. હાથના ભાગે 24 ટાંકા લીધા હતા. જોકે ત્યારબાદ પોલીસ પણ આવી ગઈ હતી.

કોલેજમાં હાલ વાર્ષિક પરીક્ષા ચાલી રહી હોવાથી આજે પ્રથમ વર્ષનું કેમેસ્ટ્રી 1 નું છેલ્લું પેપર હતું. પરંતુ પોતે પરીક્ષા આપી શકે તેમ નથી અને બનેલી ઘટના અંગે તેણે કોલેજમાં જાણ કરી હતી. બીજી તરફ 18 કલાક સુધી આ મામલે કોઈ એફઆરઆઈ જ પોલીસે નોંધી ન હતી. આ અંગે વાત કરાતં કડોદરા જીઆઈડીસી પોલીસ સ્ટેશનના પીઆઈ એચ.બી. પટેલે કહ્યું કે ‘અમે ફરિયાદ નોંધવાની પ્રોસેસ કરી રહ્યા છે. જે ટૂંક સમયમાં નોંધાઈ જશે.’ મોડી એફઆરાઈ અંગે પોલીસે કહ્યું કે પીડિતા સારવાર હેઠળ હતી જેના કારણે અમે ફરિયાદ નોંધી શક્યા નથી.

Source link