RTOમાં કાચા-પાકા લાઈસન્સના ટેસ્ટ માટે જતા ઉમેદવારોને ધરમધક્કા, સર્વરના પણ વારંવાર ડખા

 

અમદાવાદઃ સુભાષબ્રીજ સર્કલ પાસે આવેલી RTO કચેરીમાં રોજે રોજ હજારોની સંખ્યામાં લોકો લાઈસન્સની કાર્યવાહી માટે આવતા હોય છે. અસંખ્ય વાહન ચાલકો કાચા કે પાકા લાઈસસન્સ (licence process)ના ટેસ્ટ માટે આવતા હોય છે. જેના માટે પહેલેથી જ ઓનલાઈન અપોઈન્ટમેન્ટ લેવાની રહેતી હોય છે. તેમ છતા સંખ્યાબંધ લોકોને ટેસ્ટ આપ્યા વગર જ પાછા જવાનો વારો આવી રહ્યો છે. ટેસ્ટ આપવા માટે આવતા લોકોનું કહેવું છે કે, કલાકો સુધી લાઈનમાં ઊભા રહ્યા પછી તેઓે પાસે વાહનની આરસી બુક, PUC, ઈન્સ્યોરન્સ કોપી વગેરે સહિતાના દસ્તાવેજો માંગવામાં આવે છે. તમામ પાસે આ ડોક્યુમેન્ટ ઉપલબ્ધ હોય એ શક્ય બનતું નથી. જેથી તેઓને આ ટેસ્ટ આપ્યા વગર જ ત્યાંથી ઘરે પરત ફરવાનો વારો આવે છે.

પૂરતા દસ્તાવેજો ન હોય તો ઘરે પરત ફરવાનો વારો
RTOમાં જ્યારે પણ કાચુ કે પાકુ લાઈસન્સ કઢાવવાનું હોય તો તેના માટે ટેસ્ટ આપવો ફરજિયાત છે. જેના માટે પહેલેથી જ ઓનલાઈન અપોઈન્ટમેન્ટ લેવાની રહેતી હોય છે. આ અપોઈન્ટમેન્ટ લીધા બાદ જ વાહન ચાલક ટેસ્ટ માટે કચેરીમાં જતો હોય છે. આમ તો અહીં લાંબી લાંબા લાઈનો હોવી એ સામાન્ય વાત છે. ટેસ્ટ આપવા માટે પહોંચેલો જે તે વાહન ચાલક કલાકો સુધી લાઈનમાં ઉભો રહે છે. જ્યારે ટેસ્ટ માટે તેનો નંબર આવે ત્યારે તેની પાસે વાહનનું પીયુસી, ઈન્સ્યોરન્સ, આરસી બુક સહિતાના દસ્તાવેજો માંગવામાં આવે છે. ટેસ્ટ આપવા માટે આવેલા કેટલાંય વાહન ચાલકો પોતાનું વાહન હોતુ નથી. જેથી તેઓ કોઈ સગા સંબંધીઓ કે દોસ્તોના વાહનો લઈને જતા હોય છે. જેથી તેઓ પાસે આ તમામ દસ્તાવેજો હોય એવું ભાગ્યે જ બનતું હોય છે. આ ડોક્યુમેન્ટ્સના અભાવે તેઓને ટેસ્ટ આપ્યા વગર જ ઘરે પરત ફરવાનો વારો આવે છે.

ફરીથી અપોઈન્ટમેન્ટ લઈને આવવું પડે છે
RTOના અધિકારીઓના જણાવ્યા મુજબ, ટુ વ્હીલરના કાચા કે પાકા લાઈસન્સ માટે રૂપિયા 900 ફી નક્કી કરવામાં આવી છે. જ્યારે ટુ વ્હીલર અને ફોર વ્હીલર માટે 1350 રૂપિયા નક્કી કરવામાં આવી છે. ઓનલાઈન અપોઈન્ટમેન્ટ લીધા બાદ વાહન ચાલકે લાઈસન્સની કાર્યવાહી માટે આવવાનું હોય છે. અહીં આવતા વાહન ચાલકોનું કહેવું છે કે, આરટીઓના અધિકારીઓ દ્વારા માંગવામાં આવેલા દસ્તાવેજો તમારી પાસે ન હોય તો તમારે વીલા મોંઢે ઘરે પરત ફરવું પડતું હોય છે. એ પછી આ જ પ્રોસેસ માટે તેઓએ ફરીથી ઓનલાઈન અપોઈન્ટમેન્ટ લેવી પડતી હોય છે. એટલે કે એના માટે બે દિવસ બગાડો ત્યારે તમારૂ કામ પૂરુ થતુ હોય છે. ઘણી વાર એવું પણ બનતું હોય છે કે આરટીઓનું વાહન અને સારથી નામનું સર્વર પણ વારંવાર ડાઉન રહેતું હોય છે. તો ત્રીજો ધક્કો પણ ખાવો પડે એમાં બેમત નથી. આમ બે ચાર ધરમધક્કા ખાવ ત્યારે તમારુ કામ પૂરુ થતુ હોય છે.

RTOનો લૂલો બચાવ
આરટીઓ ઓફિસર આર.એસ.દેસાઈના જણાવ્યા મુજબ, દરેક વાહન ચાલકે પોતાના વાહનમાં આરસી બુક, પીયુસી, ઈન્સ્યોરન્સ કોપી રાખવી ફરજિયાત છે. કોઈ પણ વાહન ચાલક ગમે તે સગા વ્હાલા કે મિત્રનું વાહન લઈને આવે તો આ ડોક્યુમેન્ટ સાથે હોવા જરૂરી છે. સોમાંથી પાંચ લોકો એવા હોય છે કે અપોઈન્ટમેન્ટ લીધી હોવા છતા આવતા નથી. જ્યારે અન્ય લોકોની આ તમામ પ્રોસેસ પૂર્ણ થતી હોય છે. સર્વર ક્યારેક ડાઉન હોય તો વાહન ચાલકોએ થોડી રાહ જોવી પડતી હોય છે. જે બાદ આરટીઓને બદનામ કરવામાં આવે છે.

Source link