Rocket Boys Review: સાયન્સમાં રસ ધરાવતા લોકોને ખૂબ પસંદ આવશે આ સિરીઝ!

 

રિવ્યુ: ‘રૉકેટ બૉય્ઝ’
એક્ટર- જિમ સરભ, ઈશ્વાક સિંહ, રાજિત કપૂર
ડિરેક્ટર- અભય પન્નુ
પ્રકાર- ઈતિહાસ, વિજ્ઞાન, ડ્રામા
ક્રિટિક રેટિંગ- 3.5/5

‘રૉકેટ બૉય્ઝ’ (Rocket Boys) 2 યુવકોની કહાણી છે કે જેમણે વિજ્ઞાન ક્ષેત્રે યાદગાર પ્રદાન આપ્યું છે. ડૉ. હોમી જહાંગીર ભાભા (Homi Jehangir Bhabha) જેમણે પરમાણુ કાર્યક્રમમાં દેશને અગ્રણી બનાવ્યો, તેઓ કેમ્બ્રિજમાં રિસર્ચર હતા. જ્યારે બીજા ડૉ. વિક્રમ સારાભાઈ (Vikram Sarabhai) કે જેમણે અંતરિક્ષ વિજ્ઞાન ક્ષેત્રે દેશનું નામ રોશન કર્યું. તેઓ ફિઝિક્સ અને એસ્ટ્રોનોમીમાં નિપુણ હતા. ત્યારે ‘રૉકેટ બૉય્ઝ’ એક બાયોગ્રાફી પર આધારિત ફિક્શન ડ્રામા છે. આ સિરીઝ ભૂતકાળની મહત્વની ઘટનાઓ દર્શાવે છે અને તેમાં બંને વૈજ્ઞાનિકોની રિયલ લાઈફની ઘટનાઓ દેખાડવામાં આવી છે. ‘રૉકેટ બૉય્ઝ’માં નવા ભારતને ટેક્નોલોજીની જર્ની પર લઈ જવાના પ્રયાસો સફળતાપૂર્વક રજૂ કરાયા છે.

‘રૉકેટ બૉય્ઝ’ સિરીઝના લેખક-ડિરેક્ટર બે મહાન વૈજ્ઞાનિક વચ્ચેની મિત્રતા અને દેશને વૈજ્ઞાનિક ક્ષેત્રે આગળ વધારવા માટેની એકતા દેખાડવામાં સફળ થયા છે. ‘રૉકેટ બૉય્ઝ’માં જે વાર્તા છે તે દર્શકો માટે પ્રેરણારૂપ છે. જેમાં ડૉ. ભાભા અને ડૉ. સારાભાઈનું શરૂઆતનું જીવન, તેમનો સંઘર્ષ, તેમની કૉલેજની કહાણી, તેમના વિચારો અને પ્રયોગો વગેરે ઝીણવટપૂર્વક રજૂ કરાયા છે.

કુલ 8 એપિસોડની ‘રૉકેટ બૉય્ઝ’ સિરીઝ ઝડપથી આગળ વધે છે. જેમાં આગળ જતાં ડૉ. એપીજે અબ્દુલ કલામનો પણ પરિચય કરાવાયો છે. જેમાં તેઓનો યુવાનીનો સમય દર્શાવાયો છે. તેઓ સારાભાઈ સાથે રૉકેટ લૉન્ચ પર કામ કરતા દેખાડાયા છે. ‘રૉકેટ બૉય્ઝ’ના સ્ક્રીનપ્લેમાં વર્ષ 1940થી 1960 વચ્ચે બનેલી ઐતિહાસિક ઘટનાઓની ક્લિપિંગ્સ પણ સામેલ કરાઈ છે. જે તમામ મૂળ કહાણી સાથે જોવા મળે છે. ‘રૉકેટ બૉય્ઝ’નું લેખન-ડિરેક્શન તો સારું જ છે પણ સાથે-સાથે તેનું કેમેરાવર્ક અને એડિટિંગ પણ શ્રેષ્ઠ છે. એડિટરે ‘રૉકેટ બૉય્ઝ’ના વિવિધ નેરેટિવ (કથા-વર્ણન), ટાઈમલાઈન, વાર્તાને એક સૂરમાં બાંધી છે. તેમજ કોસ્ચ્યુમ ડિઝાઈનર્સે પણ જૂના જમાનાના ડ્રેસ તૈયાર કરવામાં ખૂબ મહેનત કરી છે.

‘રૉકેટ બૉય્ઝ’માં વૈજ્ઞાનિક હોમી જહાંગીર ભાભાના રોલમાં એક્ટર જિમ સરભ સંપૂર્ણરીતે ફિટ છે જ્યારે એક્ટર ઈશ્વાક સિંહે ડૉ. સારાભાઈનું પાત્ર સારી રીતે ભજવ્યું છે. ‘રૉકેટ બૉય્ઝ’ સિરીઝમાં દરેક એપિસોડ અંદાજિત એક કલાકનો છે અને દરેક એપિસોડ સાથે વાર્તા ઝડપથી આગળ વધતા દર્શકો બંધાઈ રહે છે. જે લોકોને વિજ્ઞાનના વિષયમાં રુચિ છે તેઓને ‘રૉકેટ બૉય્ઝ’ થોડી વધારે પસંદ આવશે. ‘રૉકેટ બૉય્ઝ’ માત્ર એક સિરીઝ નથી પણ ભારતના દિગ્ગજો, તેમના સંઘર્ષ અને તેમની સતત મહેનતને એક શ્રદ્ધાંજલિ છે.

Source link