MLA કુમાર કાનાણીનો ગૃહમંત્રી હર્ષ સંઘવીને પત્ર, હેલ્મેટ-સીટબેલ્ટનો દંડ ન વસૂલવા અપીલ!

 

સુરત: સમગ્ર રાજ્યમાં ગત 6 માર્ચથી પોલીસ દ્વારા સ્પેશિયલ ટ્રાફિક ડ્રાઈવ શરૂ કરવામાં આવી છે. જેમાં હેલ્મેટ અને સીટ બેલ્ટ સહિતના નિયમોને ભંગ કરનારા નાગરિકો પાસેથી દંડ વસૂલવામાં આવી રહ્યો છે. આ દરમિયાન લોકો અને ટ્રાફિક પોલીસ વચ્ચે રકઝક પણ થતી હોવાનું સામે આવ્યું છે ત્યારે આ બધા વચ્ચે રાજ્યના પૂર્વ મંત્રી કુમાર કાનાણીએ ગૃહમંત્રી હર્ષ સંઘવીને એક પત્ર લખીને અપીલ કરી છે કે, હેલ્મેટ અને સીટ બેલ્ટનો દંડ બંધ કરવો જોઈએ.

બેફામ રીતે ટ્રાફિક દંડ ન વસુલવા અપીલ
પ્રાપ્ત માહિતી અનુસાર સુરતથી ધારાસભ્ય અને રાજ્યના પૂર્વ મંત્રી કુમાર કાનાણીએ ગૃહમંત્રીને લખેલા પત્રમાં હેલ્મેટ અને સીટબેલ્ટના દંડના નામે પોલીસ પર ગંભીર આક્ષેપો પણ કર્યા છે. તેમણે હેલ્મેટ અને સીટબેલ્ટનો દંડ બંધ કરાવવાની માંગ કરી છે. તેમણે પત્રમાં જણાવ્યું છે કે, સામાન્ય જનતા હાલજ આ બંધનોમાંથી મુક્ત થઈ છે. પોલીસ ટ્રાફિક ડ્રાઈવને નામે ઉઘરાણા કરી રહી છે તેવામાં સામાન્ય વ્યક્તિ માટે દંડ ભરવો મુશ્કેલ બન્યો છે.

‘હમણા જ પરિસ્થિતિ કાબૂમાં આવી છે’
પૂર્વ મંત્રી કુમાર કાનાણીએ હર્ષ સંઘવીને પત્ર લખીને જણાવ્યું કે, 6 માર્ચથી 15 માર્ચ સુધી હેલ્મેટ તથા સીટ બેલ્ટની ઝુંબેશ ચલાવવાનો પરિપત્ર ગૃહ વિભાગ દ્વારા કરવામાં આવ્યો છે જેને ઘ્યાનમાં લેતા કોવિડ-19ની પરિસ્થિતિ હમણાં જ કાબૂમાં આવી છે. સામાન્ય પ્રજા હાલ જ આ બંધનોમાંથી મુક્ત થઈ છે. તેથી હેલ્મેટ તથા સીટબેલ્ટ ભંગના કેસો અંગેની ડ્રાઈવ બાબતે સામાન્ય લોકો માટેનો દંડ ખૂબ જ મુશ્કેલ ભર્યો છે. તેમજ શહેરી વિસ્તારોમાં પોલીસના ટોળેટોળા ઉભા રહીને બેફામ પૈસાની ઉઘરાણી કરતા હોવાથી હેરાનગતિ વધી ગઈ છે. જેથી પ્રજાના સહયોગ માટે હેલ્મેટ તથા સીટ બેલ્ટના ભંગના કેસો અંગેની ડ્રાઈવ બંધ કરવામાં આવે તેવી અપીલ છે.

મહત્વનું છે કે રાજ્ય પોલીસ દ્વારા તમામ શહેર અને જિલ્લાઓમાં ટ્રાફિક ડ્રાઈવનું આયોજન કરાયું છે. 6થી 15 માર્ચ સુધીમાં જે બાઈક ચાલકો હેલ્મેટ વિના કે ફોર વ્હીલર ચલાવનારા સીટ બેલ્ટ વિના જોવા મળ્યા તો તેમણે એક હજાર રૂપિયા દંડ ચુકવવો પડશે. આ વિશેષ ડ્રાઈવ આખા ગુજરાતમાં શરૂ કરવા અંગે પોલીસને સૂચના આપવામાં આવી છે કે હેલ્મેટ અને સીટ બેલ્ટના નિયમનો ભંગ કરવાના વધુમાં વધુ કેસમાં કરવામાં આવે. એટલું જ નહીં, જિલ્લામાં દરરોજની કામગીરીની સમીક્ષા કરી અહેવાલ મોકલવા આદેશ પણ કરવામાં આવ્યો છે.

Source link