IPL 2022 DC vs MI: ભારે રસાકસી બાદ દિલ્હીની ટીમે મુંબઈને ઘરઆંગણે ચખાડ્યો હારનો સ્વાદ

 

IPL 2022 DC vs MI: IPL 2022ની બીજી મેચમાં દિલ્હી કેપિટલ્સ અને મુંબઈ ઈન્ડિયન્સ વચ્ચે ટક્કર થઈ હતી. દિલ્હી કેપિટલ્સે ટોસ જીતીને પ્રથમ બોલિંગનો નિર્ણય કર્યો હતો. પ્રથમ બેટિંગ કરતાં મુંબઈની ટીમે ધમાકેદાર શરૂઆત કરી હતી. ઈશાંત કિશનની વિસ્ફોટક 81 રનોની ઈનિંગ્સને કારણે મુંબઈ ઈન્ડિયન્સની ટીમ 20 ઓવરના અંતે 5 વિકેટ ગુમાવીને 177 રન બનાવ્યા હતા. જો કે, દિલ્હી કેપિટલ્સની ટીમે 18.2 ઓવરમાં 6 વિકેટ ગુમાવીને 179 રન બનાવી મુંબઈને ઘરઆંગણે જ હારનો સ્વાદ ચખાડતાં 4 વિકેટથી મેચ જીતી લીધી હતી. ગુજરાતી અક્ષર પટેલે અંતિમ ઓવર્સમાં 38 રનોની વિસ્ફોટક ઈનિંગ્સ રમી મુંબઈ પાસેથી મેચ છીનવી લીધી હતી.

દિલ્હી કેપિટલ્સની ઈનિંગ્સઃ 178 રનોના ટાર્ગેટનો પીછો કરવા ઉતરેલી દિલ્હીની ટીમની સારી શરૂઆત થઈ હતી. પૃથ્વી શૉએ 38 રન જ્યારે ટિમ સીફર્ટે 21 રન બનાવ્યા હતા. જો કે ત્રીજા નંબરે આવેલ મનદીપ સિંહ 0 રન બનાવીને પેવેલિયન પરત ફર્યો હતો, જ્યારે કેપ્ટન રિષભ પંત પણ 1 રન બનાવીને કેચ આઉટ થયો હતો. રોવમેન પોવેલ પણ 0 રન બનાવી આઉટ થઈ ચૂક્યો હતો. જો કે, આ સમયે દિલ્હીની જીત મુશ્કેલ લાગી રહી હતી. પણ લલિત યાદવે શાર્દુલ ઠાકુર સાથે પાર્ટનરશિપ કરી મેચની જીતવાની આશા જીવંત રાખી હતી. જો કે, શાર્દુલ પણ 11 બોલમાં 4 ચોગ્ગાની મદદથી 22 રન બનાવી કેચ આઉટ થયો હતો. જો કે, છેલ્લી ઓવર્સમાં ગુજરાતી અક્ષર પટેલે ભુક્કા બોલાવતાં મુંબઈ પાસેથી જીત છીનવી લીધી હતી. લલિત યાદવે 38 બોલમાં 4 ચોગ્ગા અને 2 સિક્સની મદદથી 48 રન બનાવી અણનમ રહ્યો હતો, જ્યારે અક્ષર પટેલે વિસ્ફોટક ઈનિંગ્સમાં 17 બોલમાં 2 ચોગ્ગા અને 3 સિક્સની મદદથી 38 રન બનાવી દિલ્હીને શાનદાર જીત અપાવી હતી.

મુંબઈની ઈનિંગ્સઃ હોમ ગ્રાઉન્ડમાં મુંબઈની ટીમની ધમાકેદાર શરૂઆત થઈ હતી. કેપ્ટન રોહિત શર્મા અને વિકેટકીપર ઈશાન કિશનની ઓપનિંગ જોડીએ દિલ્હી કેપિટલ્સના બોલર્સને બરાબરના ધોઈ નાખ્યા હતા. રોહિત શર્માએ 32 બોલમાં 4 ચોગ્ગા અને 2 સિક્સ ફટકારી 41 રન બનાવ્યા હતા. જ્યારે ઈશાન કિશને વિસ્ફોટક ઈનિંગ્સ રમતાં 48 બોલમાં 11 ચોગ્ગા અને 2 સિક્સ સાથે 81 રન બનાવીને અણનમ રહ્યો હતો. ત્રીજા નંબરે આવેલ અનમોલપ્રીત સિંહ કાંઈ કમાલ કરી શક્યો ન હતો અને માત્ર 8 રન બનાવીને આઉટ થયો હતો. આ ઉપરાંત જેની ચર્ચા હતી તે તિલક વર્મા પણ 22 રન બનાવીને પેવેલિયન પરત ફર્યો હતો. કેઈરોન પોલાર્ડ પણ 3 રન બનાવીને તો, ટિમ ડેવિડ 12 રન બનાવીને આઉટ થયો હતો. ડેનિયલ સેમ્સ 7 રન બનાવીને અણનમ રહ્યો હતો. દિલ્હી તરફથી કુલદીપ યાદવે 3 વિકેટ તો ખલીલ અહેમદે 2 વિકેટ ઝડપી હતી.

દિલ્હી કેપિટલ્સની ટીમઃ પૃથ્વી શૉ, ટિમ સીફર્ટ, મનદીપ સિંહ, રિષભ પંત (કેપ્ટન અને વિકેટકીપર), રોવમેન પોવેલ, લલિત યાદવ, અક્ષર પટેલ, શાર્દુલ ઠાકુર, ખલીલ અહેમદ, કમલેશ નાગરકોટી

મુંબઈ ઈન્ડિયન્સની ટીમઃ રોહિત શર્મા (કેપ્ટન), ઈશાન કિશન (વિકેટકીપર), તિલક વર્મા, અનમોલપ્રીત સિંહ, કાઈરોન પોલાર્ડ, ટિમ ડેવિડ, ડેનિયલ સેમ્સ, મુરુગન અશ્વિન, જસપ્રિત બુમરાહ, ટાયમલ મિલ્સ, બસીલ થંપી

Source link