IPL 2022: ગુજરાત ટાઈટન્સનો કેપ્ટન હાર્દિક પંડ્યા રમશે કે નહીં? સસ્પેન્સનો આવ્યો અંત

Dlight News

ભારતીય ક્રિકેટ ટીમનો સ્ટાર ઓલ-રાઉન્ડર હાર્દિક પંડ્યા (Hardik Pandya) છેલ્લા ઘણા સમયથી ઈજાથી પરેશાન રહ્યો છે. જેના કારણે તે બોલિંગ કરી શકતો નથી અને તે ત્રણેય ફોર્મેટની ભારતીય ટીમમાંથી બહાર થઈ ગયો છે. ભારતીય ક્રિકેટ કંટ્રોલ બોર્ડે જણાવ્યું હતું કે હાર્દિક પંડ્યાએ ઈન્ડિયન પ્રીમિયર લીગ (આઈપીએલ)ની આગામી સિઝનમાં રમતા પહેલા ફિટનેસ સાબિત કરવી પડશે. જોકે, હાર્દિક પંડ્યાએ ફિટનેસ ટેસ્ટ પાસ કરી દીધી છે અને હવે તે આઈપીએલ-2022 (IPL 2022)માં રમવાની તૈયારી કરશે. હાર્દિક પંડ્યાને ટુર્નામેન્ટની નવી ટીમ ગુજરાત ટાઈટન્સ (Gujarat Titans)નો કેપ્ટન બનાવવામાં આવ્યો છે.

બેંગલુરૂમાં આવેલી નેશનલ ક્રિકટે એકેડેમી (National Cricket Academy)માં હાર્દિક પંડ્યાનું જનરલ એસેસમેન્ટ કરવામાં આવ્યું હતું જ્યાં તેણે બોલિંગ પણ કરી હતી અને સરળતાથી યો-યો ટેસ્ટ (Yo-Yo Test) પણ પાસ કરી હતી. બીસીસીઆઈ આઈપીએલ અગાઉ સેન્ટ્રલ કોન્ટ્રાક્ટમાં સામેલ તમામ ખેલાડીઓની ફિટનેસ ચકાસી રહ્યું છે. એનસીએ ખાતે બે દિવસ હાર્દિક પંડ્યાનું પ્રદર્શન ભારતીય ક્રિકેટ ટીમ માટે પણ સારા સંકેત છે.

નામ જાહેર ન કરવાની શરતે બીસીસીઆઈના એક સૂત્રએ જણાવ્યું હતું કે, હું એક વાત સ્પષ્ટ કરી દેવા ઈચ્છું છું. જે લોકો ઈજામાંથી મુક્ત થઈને આવ્યા છે તેવા ખેલાડીઓ માટે જ ફિટનેસ ટેસ્ટ હોય છે. હાર્દિકના કેસમાં આઈપીએલ પહેલા તેનું આ જનરલ ફિટનેસ એસેસમેન્ટ હતું. તે ઘણો મહત્વનો ખેલાડી છે અને તેની વર્તમાન ફિટનેસ ચેક કરવાની જરૂર હતી.

હકિકતમાં તેના એસેસમેન્ટ મોડ્યુલમાં એનસીએની ટીમે તેને ફરજિયાત બોલિંગ કરવાનું પણ કહ્યું ન હતું પરંતુ વડોદરાના સ્ટાર ઓલ-રાઉન્ડરે જાતે જ બોલિંગ પર ભાર મૂક્યો હતો જેથી કરીને તે દેખાડી શકે કે તે ફિટનેસ મેળવી રહ્યો છે અને ટીમ ઈન્ડિયામાં કમબેક કરવા આગળ વધી રહ્યો છે. સૂત્રએ જણાવ્યું હતું કે, એનસીએ ખાતે તેને બોલિંગ કરવાની જરૂર ન હતી પરંતુ તેણે સારા એવા સમય સુધી બોલિંગ કરી હતી અને તેની રેન્જ 135 કિમીની રહી હતી. બીજા દિવસે તેણે 17થી વધુના સ્કોર સાથે યો-યો ટેસ્ટ પાસ કરી હતી જે કટ-ઓફ લેવલથી ઘણો સારો સ્કોર હતો.

નોંધનીય છે કે ઈજામુક્ત થયા બાદ પણ હાર્દિક પંડ્યા બોલિંગ કરી રહ્યો ન હતો. આઈપીએલની ગત સિઝનમાં તે મુંબઈ ઈન્ડિયન્સ માટે રમ્યો હતો પરંતુ તેમાં તેણે બોલિંગ કરી ન હતી. બાદમાં મુંબઈ ઈન્ડિયન્સે તેને રિલીઝ કરી દીધો હતો. બોલિંગ ન કરી શકવાના કારણે તેને ટેસ્ટ, વન-ડે કે ટી20 એમ ત્રણેય ફોર્મેટ માટેની ભારતીય ટીમમાં સ્થાન મળ્યું નથી. હવે તે આઈપીએલ-2022માં ગુજરાત ટાઈટન્સનું નેતૃત્વ કરતો જોવા મળશે.

Source link