IPL: દિલ્હીનો દમદાર વિજય, કોલકાતા નાઈટ રાઈડર્સનો સળંગ પાંચમો પરાજય!

કુલદીપ યાદવ અને મુસ્તાફિઝુરની ઘાતક બોલિંગ બાદ ડેવિડ વોર્નર અને રોવમેન પોવેલની આક્રમક બેટિંગની મદદથી દિલ્હી કેપિટલ્સે આઈપીએલ ટી20 ક્રિકેટ ટુર્નામેન્ટમાં ગુરૂવારે કોલકાતા નાઈટ રાઈડર્સ સામે ચાર વિકેટે વિજય નોંધાવ્યો હતો. આઈપીએલ-2022માં ગુરૂવારે મુંબઈના વાનખેડે સ્ટેડિયમમાં દિલ્હી અને કોલકાતાની ટીમ આમને સામને થઈ હતી. દિલ્હીએ ટોસ જીતીને કોલકાતાને પ્રથમ બેટિંગનું આમંત્રણ આપ્યું હતું. કોલકાતાની બેટિંગ નિરાશાજનક રહી હતી પંરતુ નિતિશ રાણાના 57 અને સુકાની શ્રેયસ ઐય્યરના 42 રનની મદદથી ટીમે નિર્ધારીત 20 ઓવરમાં નવ વિકેટે 146 રનનો સ્કોર નોંધાવ્યો હતો. જેના જવાબમાં દિલ્હીએ વોર્નરની 42 અને પોવેલની અણનમ 33 રનની ઈનિંગ્સની મદદથી 19 ઓવરમાં છ વિકેટે 150 રન નોંધાવીને મેચ જીતી લીધી હતી. આઠ મેચમાં દિલ્હીનો આ ચોથો વિજય છે જ્યારે કોલકાતાનો સળંગ પાંચમો પરાજય હતો. કોલકાતા નવ મેચમાંથી છ મેચ હારી ચૂક્યું છે.

દિલ્હીના બોલર્સનું પ્રદર્શન દમદાર રહ્યું હતું અને કોલકાતાને 146 રનના સ્કોર સુધી જ મર્યાદિત રાખ્યું હતું. 147 રનના લક્ષ્યાંકના જવાબમાં ટીમની શરૂઆત ખરાબ રહી હતી. પ્રથમ બોલ પર જ પૃથ્વી શો આઉટ થયો હતો. જોકે, તેના સાથી ઓપનર ડેવિડ વોર્નરે બાજી સંભાળી હતી. જેમાં તેને મિચેલ માર્શનો થોડો સહકાર મળ્યો હતો. માર્શે 13 રન નોંધાવ્યા હતા. જ્યારે વોર્નરે 26 બોલમાં 42 રનનો તોફાની ઈનિંગ્સ રમી હતી. જેમાં આઠ ચોગ્ગા સામેલ હતા.

ડેવિડ વોર્નર આઉટ થયા બાદ લલિત યાદવ, રોવમેન પોવેલ અને અક્ષર પટેલની મહત્વની ઈનિંગ્સની મદદથી દિલ્હીએ વિજય નોંધાવ્યો હતો. લલિત યાદવે 29 બોલમાં 22 રનનું યોગદાન આપ્યું હતું. અક્ષર પટેલે 17 બોલમાં બે ચોગ્ગા અને એક સિક્સર સાથે 24 રન નોંધાવ્યા હતા. જ્યારે પોવેલે 16 બોલમાં અણનમ 33 રન ફટકારીને ટીમને જીતાડી હતી. તેણે એક ચોગ્ગો અને ત્રણ સિક્સર ફટકારી હતી. શાર્દુલ ઠાકુર આઠ રને નોટઆઉટ રહ્યો હતો. કોલકાતા માટે ઉમેશ યાદવે ત્રણ તથા હર્ષિત રાણા અને સુનીલ નરૈને એક-એક વિકેટ ઝડપી હતી.

કોલકાતા નાઈટ રાઈડર્સને પ્રથમ બેટિંગનું આમંત્રણ મળ્યું હતું પરંતુ નિતિશ રાણા અને સુકાની શ્રેયસ ઐય્યરને બાદ કરતા તમામ બેટરનું પ્રદર્શન નિરાશાજનક રહ્યું હતું. નિતિશ રાણા, ઐય્યર અને રિંકુ સિંહ ત્રણ બેટર જ બે આંકડાનો સ્કોર નોંધાવી શક્યા હતા. આ ત્રણેયની ઈનિંગ્સની મદદથી કોલકાતા નાઈટ રાઈડર્સ 20 ઓવરમાં નવ વિકેટે 146 રનનો સ્કોર નોંધાવી શકી હતી. ટીમની શરૂઆત ખરાબ રહી હતી. ટીમે 22 રનના સ્કોર પર પોતાના બંને ઓપનર ગુમાવી દીધા હતા. એરોન ફિંચ ત્રણ અને વેંકટેશ ઐય્યર છ રન નોંધાવીને આઉટ થયા હતા.

બાદમાં ટીમનો સ્કોર 35 રનનો થયો ત્યારે ટીમને ઉપરાઉપરી બે ઝટકા લાગ્યા હતા. ઈન્દ્રજીત છ રન નોંધાવીને આઉટ થયો હતો જ્યારે સુનીલ નરૈન ખાતું ખોલાવ્યા વગર પેવેલિયન ભેગો થયો હતો. શ્રેયસ ઐય્યરે 37 બોલમાં ચાર ચોગ્ગાની મદદથી 42 રન ફટકાર્યા હતા. જ્યારે નિતિશ રાણાએ અડધી સદી ફટકારતા 34 બોલમાં 57 રનની ઈનિંગ્સ રમી હતી. જેમાં ત્રણ ચોગ્ગા અને ચાર સિક્સર સામેલ હતી. આન્દ્રે રસેલ પણ ખાતું ખોલાવી શક્યો ન હતો. રિંકુ સિંહે 23 રનનું યોગદાન આપ્યું હતું. દિલ્હી માટે કુલદીપ યાદવે ચાર અને મુસ્તાફિઝુરે ત્રણ વિકેટ ઝડપી હતી. ચેતન સાકરીયા અને અક્ષર પટેલને એક-એક સફળતા મળી હતી.

Source link