IPLમાં લસિત મલિંગાનું પુનરાગમન, મુંબઈ ઈન્ડિયન્સ નહીં પણ આ ટીમ સાથે જોડાયો!

 

ઈન્ડિયન પ્રીમિયર લીગની 15મી સિઝન શરૂ થવામાં હવે ગણતરીના દિવસો બાકી રહ્યા છે. આગામી સિઝન માટે મોટા ભાગની ટીમોએ આર્થિક રાજધાની મુંબઈ પહોંચવાનું શરૂ કરી દીધું છે. આઈપીએલ 2022 શરૂ થતા પહેલા રાજસ્થાન રોયલ્સ ટીમે મોટો નિર્ણય લીધો છે. આઈપીએલની પ્રથમ ચેમ્પિયન રાજસ્થાન રોયલ્સે વિશ્વની સૌથી લોકપ્રિય ટી20 ક્રિકેટ ટુર્નામેન્ટની આગામી સિઝન માટે શ્રીલંકાના ભૂતપૂર્વ ઝડપી બોલર લસિત મલિંગાને પોતાની ટીમનો બોલિંગ કોચ બનાવ્યો છે. નોંધનીય છે કે 2021ની સિઝન પહેલા મુંબઈ ઈન્ડિયન્સ ટીમે મલિંગાને રિલીઝ કર્યો હતો અને ત્યારબાદ તેણે ફ્રેન્ચાઈઝી ક્રિકેટમાંથી નિવૃત્તિ જાહેર કરી હતી. એટલે કે તે આઈપીએલમાંથી પણ નિવૃત્તિ લીધી હતી.

લસિત મલિંગાએ તાજેતરમાં જ ઓસ્ટ્રેલિયાના પ્રવાસે ગયેલી શ્રીલંકન ટીમનું બોલિંગ કોચ તરીકે માર્ગદર્શન કર્યું હતું. મલિંગા ઘણા વર્ષ સુધી આઈપીએલની સૌથી સફળ ટીમોમાં સામે મુંબઈ ઈન્ડિયન્સનો મહત્વનો ખેલાડી રહ્યો છે. મુંબઈની સફળતામાં મલિંગાનું યોગદાન ઘણું મહત્વની રહ્યું છે. મલિંગાએ 2009થી 2019 સુધી 122 મેચ રમી છે અને તેમાં 122 ઈનિંગ્સમાં 19.79ની એવરેજથી 170 વિકેટ ઝડપી છે. આ દરમિયાન તેણે એક વખત પાંચ અને છ વખત ચાર વિકેટે ઝડપી હતી.

લસિત મલિંગા આઈપીએલમાં સૌથી વધુ વિકેટ ઝડપનારો વિદેશી ખેલાડી છે. શ્રીલંકના ભૂતપૂર્વ ઝડપી બોલર બાદ વેસ્ટ ઈન્ડિઝનો ઓલ-રાઉન્ડર ડ્વેઈન બ્રાવો છે. બ્રાવોએ આઈપીએલમાં 2008થી 2021 દરમિયાન 151 મેચ રમી છે જેમાં તણે 148 ઈનિંગ્સમાં 24.31ની સરેરાશ સાથે 167 વિકેટ ઝડપી છે.

રાજસ્થાન રોયલ્સે ટીમમાં શ્રીલંકના બે દિગ્ગજ ખેલાડીને સામેલ કર્યા છે. મલિંગાને બોલિંગ કોચ બનાવ્યો છે જ્યારે શ્રીલંકાનો ભૂતપૂર્વ સુકાની અને દિગ્ગજ વિકેટકીપર બેટર કુમાર સંગાકરાએ પણ રાજસ્થાન રોયલ્સ સાથે જોડાયેલો છે. સંગાકરા ટીમમાં ડાયરેક્ટર ઓફ ક્રિકેટના પદે છે. તેવામાં આગામી સિઝનમાં તે જોવાનું રસપ્રદ રહેશે કે આ બંને શ્રીલંકન દિગ્ગજ પોતાની ટીમને ક્યાં સુધી લઈ જાય છે.

નોંધનીય છે કે 2008માં આઈપીએલનો પ્રારંભ થયો હતો અને ગત શુક્રવારે જ નિધન પામેલા ઓસ્ટ્રેલિયાના લિજેન્ડરી સ્પિનર શેન વોર્નની આગેવાનીમાં ટીમ પ્રથમ સિઝનમાં જ ચેમ્પિયન બની હતી. જોકે, ત્યારબાદ ટીમનું પ્રદર્શન એટલું પ્રભાવશાળી રહ્યું નથી.

Source link