IPL 2022: Gujarat Titansને મોટો ફટકો, ટુર્નામેન્ટમાં નહીં રમે આ આક્રમક ખેલાડી

 

નવી દિલ્હીઃ આઈપીએલ-2022નો પ્રારંભ થવામાં હવે એક મહિના જેટલો સમય બાકી છે તે પહેલા જ ટુર્નામેન્ટની નવી ટીમ ગુજરાત ટાઈટન્સને મોટો ફટકો પડ્યો છે. ગુજરાત ટાઈટન્સમાં સામેલ ઈંગ્લેન્ડના સ્ટાર ખેલાડી જેસન રોયે આઈપીએલમાંથી પોતાનું નામ પાછું ખેંચી લીધું છે. રોયે બબલ ફટિગના કારણે પોતાનું નામ પાછું ખેંચી લીધું છે. મીડિયા અહેવાલ પ્રમાણે જેસન રોયે ગત સપ્તાહે જ ગુજરાત ટાઈટન્સને પોતાનો નિર્ણય જણાવી દીધો હતો. ગુજરાત ટાઈટન્સ ટીમે હજી સુધી તેના બદલે કયો ખેલાડી સામેલ કરવામાં આવશે તે નક્કી કર્યું નથી. 31 વર્ષીય ઈંગ્લિશ ક્રિકેટરને ગુજરાત ટાઈટન્સ ટીમે તેની બેઝ પ્રાઈઝ 2 કરોડ રૂપિયામાં ખરીદ્યો હતો.

ગુજરાત માટે જેસન રોયનું ટુર્નામેન્ટમાંથી હટી જવું મોટો ફટકો છે. જેસન રોય ટી20 ફોર્મેટમાં આક્રમક ઓપનર્સમાં સામેલ છે. જેસન રોયે બીજી વખત આઈપીએલમાંથી પોતાનું નામ પાછું ખેંચી લીધું છે. અગાઉ 2020ની સિઝનમાં પણ તેણે અંગત કારણોસર ટુર્નામેન્ટમાંથી નામ પાછુ ખેંચી લીધું હતું. 2020ની સિઝનમાં દિલ્હી કેપિટલ્સે તેને 1.5 કરોડ રૂપિયામાં ખરીદ્યો હતો.

ભારતીય ક્રિકેટ કંટ્રોલ બોર્ડે આઈપીએલ-2022ની તારીખ જાહેર કરી દીધી છે. આઈપીએલ-2022નો પ્રારંભ 26 માર્ચે થશે અને મેના અંતિમ સપ્તાહમાં તે સમાપ્ત થશે. ગત સિઝનમાં જેસન રોય સનરાઈઝર્સ હૈદરાબાદ માટે રમ્યો હતો અને કેટલીક શાનદાર ઈનિંગ્સ રમી હતી. બાદમાં તેણે પાકિસ્તાન સુપર લીગમાં ભાગ લીધો હતો જ્યાં તે ક્વેટા ગ્લેડિયેટર્સ માટે રમ્યો હતો.

પાકિસ્તાન સુપર લીગ પણ બાયો-સિક્યોર બબલમાં રમાઈ હતી. તેણે ક્વેટા માટે ફક્ત છ જ મેચ રમી હતી તેમ છતાં તેણે 170.22ની સ્ટ્રાઈક રેટ સાથે 303 રન ફટકાર્યા હતા. નોંધનીય છે કે રોય જાન્યુઆરીમાં બીજી વખત પિતા બન્યો હતો. નોંધનીય છે કે આ વખતે આઈપીએલમાં 10 ટીમો ભાગ લેશે. ગુજરાત ટાઈટન્સ ઉપરાંત લખનૌ સુપર જાયન્ટ્સ ટીમ પ્રથમ વખત આઈપીએલમાં ભાગ લેશે.

Source link