Gujarat Heat Wave :અમદાવાદ સહિત રાજ્યમાં હીટવેવની આગાહી, 4 દિવસ પરસેવો છોડાવી દેશે યલો એલર્ટ

 

અમદાવાદઃ માર્ચની શરુઆતમાં રેકોર્ડ તોડ્યા બાદ ગરમી ઓછી થતા લોકો રાહત અનુભવી રહ્યા છે. પરંતુ હવે શુક્રવારથી ચાર દિવસ માટે યલો એલર્ટ સાથે હીટવેવ રહેવાની આગાહી કરવામાં આવી છે. ફરી એકવાર ગરમીનું પ્રમાણ વધતા ગરમીનો પારો 40ને પાર જવાની પ્રબળ શક્યતાઓ છે. આ સાથે લૂ લાગવાથી બચવા માટેના ઉપાયો કરવા માટે પણ હવામાન વિભાગ દ્વારા જણાવવામાં આવ્યું છે. આજે રાજ્યમાં લઘુત્તમ તપામાન 26 ડિગ્રી અને મહત્તમ તાપમાન 39 ડિગ્રી નોંધાયું છે. અમદાવાદ સહિત રાજ્યના સૌરાષ્ટ્ર, ઉત્તર ગુજરાત અને કચ્છમાં હીટવેવ રહેવ રહેવાની આગાહી કરવામાં આવી છે.

તારીખ 25થી 28 માર્ચ દરમિયાન યલો એલર્ટ આપવામાં આવ્યું છે, આ દરમિયાન બપોરના સમયે આકરી ગરમીનો અનુભવ થશે અને હીટવેવ રહેશે. આવતીકાલે રાજ્યના સૌરાષ્ટ્રના ગીર સોમનાથ અને કચ્છ હીટવેવની અસર રહેશે. જે બાદ શનિવારે બનાસકાંઠા, સાબરકાંઠા, મહેસાણા, પાટણ સહિત સૌરાષ્ટ્રના ભાવનગર, પોરબંદર, જૂનાગઢ, ગીર સોમનાથ, રાજકોટ અને કચ્છ તથા દીવમાં હીટવેવ અનુભવાશે.

ચોથા દિવસે એટલે કે 27 માર્ચના રોજ અમદાવાદ અને ગાંધીનગર સહિત રાજ્યના બાનાસકાંઠા, સાબરકાંઠા, મહેસાણા, પાટણમાં હીટવેવના કારણે ગરમીનો પારો ઊંચો જશે. આ દિવસે સૌરાષ્ટ્રના અમરેલી, સુરેન્દ્રનગર, બોટાદ, ભાવનગર, પોરબંદર, જૂનાગઢ, ગીર સોમનાથ, રાજકોટ અને કચ્છ તથા દીવમાં પણ હીટવેવના કારણે ગરમીનું પ્રમાણ ઊંચું રહેશે. જ્યારે 28 માર્ચે પણ ઉત્તર ગુજરાત, સૌરાષ્ટ્રના જિલ્લાઓમાં હીટવેવની અસર રહેશે.

હીટવેવ દરમિયાન શું સાવધાની રાખશો?

હવામાન વિભાગે કરેલી હીટવેવની આગાહી સાથે એક્સપર્ટ્સ દ્વારા સલાહ આપવામાં આવી છે કે, સામાન્ય સ્વસ્થ વ્યક્તિ માટે હીટવેવ દરમિયાન ગરમી સ્વાસ્થ્ય પર હળવી ખરાબ અસર કરી શકે છે. જોકે તાજેતરમાં જન્મેલા બાળકો, ઘરડી વ્યક્તિ અને જેઓ ગંભીર બીમારીથી પીડાય છે તેમણે ખાસ સાવધાની રાખવાની જરુર છે.

હીટવેવ દરમિયાન પડતી આકરી ગરમીના લીધે થનારી તકલીફોથી બચવા માટે બપોરના સમયે લાંબા સમય માટે સીધા સૂર્ય પ્રકાશના સંપર્કમાં રહેવાનું ટાળવું જોઈએ, આ સિવાય હળવા રંગના સૂતરાઉના કપડા પહેરવા જોઈએ અને બહાર નીકળવું જરુરી હોય તો માથું ઢંકાયેલું રાખવું જોઈએ.

યલો એલર્ટ દરમિયાન શરીરમાં પાણી ઓછું ના થઈ જાય તેની પણ કાળજી રાખવી જોઈએ. આ માટે છાશ, પાણીવાળા ફ્રૂટ, લીંબુ પાણી વગેરેનો ઉપયોગ કરી શકાય છે.

Source link