Gujarat Files બનાવવાની વાત કરી વિનોદ કાપડીએ PMને પૂછ્યું, ‘રિલીઝ નહીં રોકોને’

 

નવી દિલ્હી: કાશ્મીરી પંડિતો પર બનેલી વિવેક અગ્નિહોત્રીની ફિલ્મ ‘ધ કાશ્મીર ફાઈલ્સ’ આજકાલ ખૂબ જ ચર્ચામાં છે. ફિલ્મ દર્શકોને ખાસ્સી પસંદ આવી રહી છે. ત્યારે હવે બોલિવુડના અન્ય એક નિર્દેશક વિનોદ કાપડીએ ગુજરાત ફાઈલ્સ નામની ફિલ્મ બનાવવાની તૈયારી બતાવી છે. આ બાબતે તેમણે એક ટ્વીટ પણ કર્યું છે, જેમાં તેમણે પીએમ મોદીને સીધો સવાલ પૂછ્યો છે.

પીહુ, મિસ ઠનકપુર હાજીર હો જેવી ફિલ્મો બનાવી ચૂકેલા વિનોદ કાપડીએ પીએમ મોદીને પોતાના ટ્વીટમાં ટેગ કરીને લખ્યું છે કે, ‘ગુજરાત ફાઈલ્સ #GujaratFiles નામથી તથ્યો પર આધારિત આર્ટ ફિલ્મ બનાવવા માટે તૈયાર છું, તેમાં આપની ભૂમિકાનો પણ સત્યતાથી વિસ્તારપૂર્વક ઉલ્લેખ થશે. શું આપ આજે દેશ સામે મને ભરોસો આપશો કે આ ફિલ્મની રિલીઝને રોકવામાં નહીં આવે?’

યુપી બાદ હવે ગુજરાત! પીએેમે ભવ્ય રોડ શો કરી પ્રચારના શ્રીગણેશ કરી

આ ટ્વીટ બાદ વિનોદ કાપડીએ બીજું એક ટ્વીટ કર્યું છે. જેમાં તેમણે લખ્યું છે કે ‘મારા આ ટ્વીટ બાદ કેટલાક નિર્માતાઓ સાથે મારી વાત થઈ ગઈ છે. તેઓ #GujaratFilesને પ્રોડ્યૂસ કરવા માટે તૈયાર છે. તેમને બસ એ વાતનું આશ્વસન જોઈએ કે જે અભિવ્યક્તિના સ્વાતંત્ર્યની પીએમ મોદી વાત કરી રહ્યા છે, તે જ ભરોસો તેઓ આ ફિલ્મ માટે પણ આપે.’

વિનોદ કાપડીએ આ ટ્વીટ પીએમ મોદીના એક વિડીયોવાળા ટ્વીટ પર કર્યું છે, જેમાં ધ કાશ્મીર ફાઈલ્સ પર પીએમ મોદી પોતાની પ્રતિક્રિયા આપી રહ્યા છે. પીએમ મોદી કહે છે કે જે લોકો ફ્રીડમ ઓફ એક્સપ્રેશનના ઝંડા લઈને ફરે છે તેમની સમગ્ર જમાત છેલ્લા 5-6 દિવસથી ધૂંઆપૂંઆ થઈ ગઈ છે. તેઓ તથ્યોના આધાર પર, આર્ટ્સના આધાર પર તેની વિવેચના નથી કરી રહ્યા. કોઈ સત્ય ઉજાગર કરવાનું સાહસ કરે, તેને જે સત્ય લાગ્યું તે પ્રસ્તુત કરવાની કોશીશ કરે, પરંતુ તે સત્યને ના સમજવાની તૈયારી, તેમજ દુનિયા તેને ના જૂએ તે પ્રકારનું ષડયંત્ર છેલ્લા 5-6 દિવસથી ચાલી રહ્યું છે.

Source link