Grishma Murder Case: હત્યા પહેલાનો ગ્રીષ્માનો કોલેજના છેલ્લા દિવસનો વિડીયો સામે આવ્યો

 

સુરત: શહેરના પાસોદરા વિસ્તારમાં ગ્રીષ્મા વેકરિયા નામની યુવતીની ફેનિલ ગોયાણી નામના યુવકે જાહેરમાં ગળું કાપીને હત્યા કરી હતી. તે દિવસનો હત્યા પહેલાનો ગ્રીષ્માનો ક્લાસરૂમનો એક વિડીયો સામે આવ્યો છે. જેમાં તેણીએ કોલેજમાં બપોરે હાજરી પુરાવી હતી અને સાંજે તેની કરપીણ હત્યા કરવામાં આવી હતી. સામે આવેલો વિડીયો કોલેજના ક્લાસરૂમના સીસીટીવીનો હોવાનું સામે આવ્યું છે, જેમાં જોઈ શકાય છે કે, ગ્રીષ્મા તેની બહેનપણીઓ સાથે ક્લાસમાં બેઠી છે અને હાથ ઉંચો કરીને હાજરી પુરાવતી જોવા મળી રહી છે. ઉલ્લેખનીય છે કે, આ કેસમાં પોલીસ દ્વારા 2500 પાનાની ચાર્જશીટ દાખલ કરવામાં આવી છે અને હજી ફેનિલની વધુ પૂછપરછ પણ કરાઈ રહી હોવાનું જાણવા મળી રહ્યું છે.

કોલેજમાં ઓફલાઈન શિક્ષણ શરૂ થતાં ગ્રીષ્મા 12 ફેબ્રુઆરીના રોજ કોલેજ ગઈ હતી. સીસીટીવી ફૂટેજમાં જોઇ શકાય છે કે, તે હાજરી માટે પોતાનો હાથ ઊંચો કરે છે. કોલેજ સ્ટાફના અનુસાર ગ્રીષ્મા એક સંસ્કારી હતી અને તે નિયમિત કોલેજ જતી અને ફરી ઘરે જતી રહેતી હતી. તેની કોઈ ફરિયાદ ક્યારે સાંભળવા મળી હોય એવું કોઈના ધ્યાન પર નથી. જ્યારે બીજી તરફ હત્યારા ફેનિલ ગોયાણી કોલેજના પહેલા વર્ષ સુધી ભણ્યો છે. એવું કહેવાય છે કે, તેને કોલેજમાંથી કાઢી મુકવામાં આવ્યો હતો.

પોલીસ અધિકારી બનવા માંગતી હતી ગ્રીષ્મા
પિતાના જણાવ્યા અનુસાર ગ્રીષ્મા પહેલાથી જ પોલીસ અધિકારી બનવા માંગતી હતી, સ્કૂલમાં જ પોલીસ કેડેટના પ્રોગ્રામમાં ભાગ લેનારી ગ્રીષ્માને સુરતના તત્કાલીન પોલીસ કમિશનર રાકેશ અસ્થાના તેમજ જોઇન્ટ પોલીસ કમિશનર આશિષ ભાટીયા અને નિપૂર્ણા તોરવણેએ પ્રમાણપત્રો આપ્યા હોવાનું સામે આવ્યું છે.

શું છે ઘટના?
અત્રે ઉલ્લેખનીય છે કે ગત 12મી ફેબ્રુઆરીની સાંજે એક તરફી પ્રેમમાં પાગલ ફેનિલે ગ્રીષ્માના ઘર પાસે પહોંચી જઇ હોબાળો મચાવતા સમજાવવા ગયેલા ગ્રીષ્માના ભાઈ અને મોટા પપ્પા પર ચપ્પુથી હુમલો કરી દીધો હતો. વચ્ચે પડેલી ગ્રીષ્માને પકડી લઈ તેણે જાહેરમાં જ તેણીનું ગળું કાપી હત્યા કરી નાખ્યા બાદ પોતે હાથની નસ કાપી અને ઝેરી દવા પી આત્મહત્યાનો પ્રયાસ કર્યો હતો. જો કે સારવાર બાદ તે સાજો થઈ જતાં પોલીસે કસ્ટડીમાં લઈને આગળની તપાસ હાથ ધરી હતી.

 

CCTV વિડીયો: ગ્રીષ્માએ બપોરે કોલેજમાં હાજરી પુરાવી અને સાંજે ફેનિલે હત્યા કરી

 

Source link