Drishyam 2 Movie Review: એક મિનિટ પણ ખુરશી પરથી હલવા નહીં દે વિજય સાલગાંવકરની વાર્તા, ટ્વિસ્ટ એન્ડ ટર્ન્સથી ભરપૂર

 

એક્ટર: અજય દેવગણ, તબ્બુ, અક્ષય ખન્ના, શ્રિયા સરન, ઈશિતા દત્તા, સૌરવ શુક્લા, મૃણાલ
ડાયરેક્ટર: અભિષેક પાઠક
શ્રેણી: હિન્દી, સસ્પેન્સ, એક્શન, ડ્રામા
સમય: 2 કલાક 20 મિનિટ
રેટિંગ: 3.5/5

તારીખ 2 ઓક્ટોબર મહાત્મા ગાંધી અને લાલ બહાદુર શાસ્ત્રીના જન્મદિવસ માટે જાણીતી છે. પરંતુ છેલ્લા સાત વર્ષોથી આ તારીખને એક નવું જ મહત્વ મળ્યું છે જે ફિલ્મ ‘દ્રશ્યમ’ના કારણે છે. વિજય સાલગાંવકર (અજય દેવગણ) પોતાના પરિવારને બચાવવા માટે જે યોજના બનાવે છે તે દિવસ પણ 2 ઓક્ટોબરનો જ હોય છે. ફિલ્મમાં 2 ઓક્ટોબરનો ઉલ્લેખ અનેકવાર થાય છે. જે બાદ આ ફિલ્મના ચાહકોના મનમાં આ તારીખ કાયમ માટે છવાઈ ગઈ છે.

‘દ્રશ્યમ 2’ની વાર્તા

‘હું મારા પરિવાર વિના જીવી નથી શકતો અને તેમના માટે કંઈપણ કરી શકું છું. પછી ભલેને દુનિયા મને સ્વાર્થી જ કેમ ના કહે.’ ‘દ્રશ્યમ’થી લઈને ‘દ્રશ્યમ 2’ સુધી ફિલ્મનો આ જ સંવાદ વાર્તાનું મૂળ છે. પાર્ટ-1માં પોતાના પરિવારને બચાવવા માટે વિજય સાલગાંવકરે બધી જ હદ પાર કરી હતી. હવે ફિલ્મના બીજા ભાગમાં ભૂતકાળનું કાળું સત્ય સામે આવી રહ્યું છે. એવામાં પરિવારને બચાવવા માટે પોતાને સ્વાર્થી કહે તો વિજય શું બધી જ હદ ઓળંગી જશે? આ જ રહસ્યના તાણાવાણામાં વણાયેલી છે ‘દ્રશ્યમ 2’ની વાર્તા.

‘દ્રશ્યમ 2’માં કેટલાય ટ્વિસ્ટ એન્ડ ટર્ન

આ જ કારણ છે કે દર્શકો આતુરતાથી ફિલ્મના બીજા ભાગની રાહ જોઈ રહ્યા હતા. ફિલ્મનો બીજો ભાગ ટ્વિસ્ટ એન્ડ ટર્ન્સથી ભરપૂર છે અને દર્શકોને નિરાશ નહીં કરે.

‘દ્રશ્યમ 2’નો રિવ્યૂ

‘દ્રશ્યમ 2’ આ જ નામની મલયાલમ થ્રિલરનું રૂપાંતરણ છે. ફિલ્મની વાર્તા ત્યાંથી જ શરૂ થાય છે જ્યાં સાત વર્ષ પહેલા વિજય એક પાવડો લઈને પોલીસ સ્ટેશનની બહાર નીકળે છે પરંતુ તે એ વાતથી અજાણ છે કે તેના અપરાધનું કોઈ સાક્ષી પણ હોઈ શકે છે. જોકે, તેનો સાક્ષી પોતે પણ હત્યાનો અપરાધી છે અને જેલની હવા ખાઈ ચૂક્યો છે. હવે વાર્તા આગળ વધે છે આજના સમયમાં. સાત વર્ષ પછી વિજયે પોતાના સપના પૂરા કરી લીધા છે. તે એક સિનેમા હોલનો માલિક બની ગયો છે. જે પોતે લખેલી વાર્તા પર ફિલ્મ બનાવવાની તૈયારી કરી રહ્યો છે. તેની દીકરી અંજુ (ઈશિતા દત્તા) હજી પણ ભૂતકાળને યાદ કરીને આઘાતમાં પહોંચી જાય છે અને આંચકીઓ આવે છે. નાની દીકરી અનુ (મૃણાલ જાધવ) કિશોરાવસ્થામાં આવી ગઈ છે. પત્ની નંદિની (શ્રિયા સરણ) પાડોશમાં રહેવા આવેલી જેની (નેહા જોષી) સાથે પોતાના સુખ-દુઃખ વહેંચ્યા કરે છે. જોકે, સાલગાંવકર પરિવાર એ વાતથી અજાણ છે કે ભૂતકાળે તેમનો પીછો નથી છોડ્યો. આર્થિક રીતે વિજય સમૃદ્ધ થઈ ગયો છે પરંતુ સામાજિક સ્તરે આજે પણ તેને શંકાની નજરે જોવામાં આવે છે. તે અપરાધી હતો કે કેમ તેવા સવાલ ઉઠે છે. એવામાં ગોવામાં નવા આઈજી તરુણ અહલાવત (અક્ષય ખન્ના)ની બદલી થાય છે. તરુણ મીરા દેશમુખ (તબ્બુ)નો મિત્ર છે. મીરા પોતાના પતિ (રજત કપૂર) સાથે લંડનમાં જઈને વસી ગઈ છે. પરંતુ દીકરાની પુણ્યતિથિએ ગોવા આવી છે. અહીં દીકરાની હત્યાના ઘા તાજા થાય છે. તે કોઈપણ કિંમતે વિજય સાલગાંવકર અને તેના પરિવારને જેલના સળિયા પાછળ ધકેલવા માગે છે. તરુણ તેનો સાથ આપે છે અને કેટલાક પુરાવા પણ મળે છે.

‘દ્રશ્યમ 2’માં ફરી ખુલે છે કેસ

2015ની ફિલ્મમાં વિજય સાલગાંવકર પોલીસ સ્ટેશનમાંથી પાવડો લઈને નીકળે છે. સાત વર્ષ પહેલા પૂર્ણ અપરાધનો એક સાક્ષી હતો અને આ જ કારણ છે કે પોલીસ આટલા વર્ષો પછી ફરીથી તપાસ કરવાનો વિચાર કરે છે. ફિલ્મનો પહેલો ભાગ જકડી રાખનારો હતો જ્યારે સિક્વલ પણ મજબૂતાઈથી ઊભી રહે છે. ફિલ્મમાં વાર્તા સહેજ પણ કળી શકાય તેવી નથી પરંતુ ક્યાંક ક્યાંક ફિલ્મ ખેંચવામાં આવી હોય તેવું લાગે છે. અમિતાભ ભટ્ટાચાર્યએ બનાવેલું ગીત ‘સહી ગલત’ અને ટાઈટલ ટ્રેક સારું છે. ફિલ્મનો બેકગ્રાઉન્ડ સ્કોર પણ સારો છે અને ડ્રામાને વધુ ઊંડાઈ આપે છે. એકદંરે ‘દ્રશ્યમ 2’માં આવતા ટ્વિસ્ટ અને ટર્ન્સ તમને એક મિનિટ પણ સીટ પરથી હલવા નહીં દે.

Source link