Darlings Movie Review: Alia Bhatt અને Shefali Shahની દમદાર એક્ટિંગ છેક સુધી જકડી રાખશે

એક્ટર– વિજય વર્મા, આલિયા ભટ્ટ, શેફાલી શાહ, રોશન મેથ્યૂ
ડાયરેક્ટર– જસમીત રીન
શ્રેણી– હિન્દી, કોમેડી, ડ્રામા, થ્રીલર
સમય– 2 કલાક 13 મિનિટ
રેટિંગ– 3.5/5

વાર્તા

બદરૂ પોતાના પતિ હમજાને ખૂબ પ્રેમ કરે છે. બદૂરના રોલમાં આલિયા ભટ્ટ છે અને હમજાના રોલમાં વિજય વર્મા છે. બદરૂનો પ્રેમ એટલો આંધળો છે કે તે પોતાના સંબંધમાં કેટલીય વસ્તુઓ આગળ આંખ આડા કાન કરે છે. તેની મમ્મી કેટલીયવાર તેને કહે છે કે, તેની સાથે ખોટું થઈ રહ્યું છે અને આ વાતોને નજરઅંદાજ ના કરવી જોઈએ. પરંતુ બદરૂને લાગે છે કે સમય જતાં બધું ઠીક થઈ જશે. પરંતુ એવું નથી થતું. સમય સાથે તેના પર અત્યાચાર વધતો જાય છે. પછી એક સમયે પરિસ્થિતિ હાથમાંથી નીકળી જાય છે. ફિલ્મમાં આલિયા ભટ્ટની મમ્મીના રોલમાં શેફાલી શાહ છે.

રિવ્યૂ

‘જો તમે કોઈ રેસ્ટોરાં કે થિયેટરમાં એકલા જઈ શકો તો તમે જીવનમાં કંઈ પણ કરી શકો છો’. જોકે, મહિલાઓ માટે ઘણી બાબતોમાં આ ઉક્તિ સાચી નથી. તે સમાજની અસહજ કરી નાખતી આંખો વચ્ચે પણ એક અસ્થિક અને ઝેરીલા સંબંધોનો બોજો ઉપાડે છે. સમાજની ખરાબ વિચારસરણીનું પરિણામ છે કે મહિલાઓ અપમાનજનક અને હિંસક વૈવાહિક સંબંધોને એકલા રહેવાથી વધુ સન્માનજનક માને છે. અથવા તો આપણો સમાજ તેને આ કરવા પર મજબૂર કરે છે.

ડાયરેક્ટર જસમીત કે. રીનની આ પહેલી ફિલ્મ છે. રાઈટર પરવેઝ શેખ સાથે મળીને તેણે આ ફિલ્મની વાર્તા લખી છે. જેના દ્વારા તે નિમ્ન મધ્યમ વર્ગની સામાજિક અને મનૌવૈજ્ઞાનિક સ્થિતિ વચ્ચે પિતૃસત્તા અને ઘરેલુ હિંસાની સમસ્યાને નજીકથી બતાવવાની કોશિશ કરે છે. ફિલ્મની વાર્તામાં પ્લોટ મુંબઈનો છે. એત તરફ અમીર લોકો જેમને વિશેષાધિકાર મળેલા છે જ્યારે બીજી તરફ બે મહિલાએ એક દીકરી અને એક મા, જે નરકમાં પણ પોતાના માટે સ્વર્ગ શોધી રહી છે. તેમની ચારેબાજુ કાળા ડિબાંગ વાદળો છે છતાં તેઓ જીવનમાં સુખરૂપી તડકો શોધી જ લે છે. આ બંને વિપરીત પરિસ્થિતિઓ હસાવે છે. તેમની સાથે જે છે, જેટલું છે તેમાં જ ખુશી શોધી લે છે.

બદરૂના પતિ હમજાને દારુની લત લાગી છે. નશાની હાલતમાં તે બદરૂને ખૂબ મારે છે, વિના કારણ ગુસ્સો કરે છે. પરંતુ બીજા દિવસે સવારે બદરૂ એક સારી પત્નીની જેમ તેના માટે આમલેટ બનાવે છે. હમજા પોતાની પત્ની પર પ્રેમ વરસાવે છે અને તેની માફી માગે છે. બદરૂ પણ ખુશી-ખુશી તેને માફ કરી દે છે. પરંતુ આ રોજનો નિત્યક્રમ થઈ ગયો છે. બદરૂ પોતાને યાદ અપાવતી રહે છે કે તેણે લવ મેરેજ કર્યા છે. તેનો તર્ક એ જ છે કે વૈવાહિક જીવનમાં આ પ્રકારનું વર્તન સામાન્ય છે. પરંતુ એક દિવસ એવી દુઃખદ ઘટના બને છે કે તે પોતાના વિશે વિચારવા લાગે છે, પોતાની જિંદગી, પતિ વિશે નવેસરથી વિચારવા મજબૂર થઈ જાય છે.

હિંસાથી હિંસા થાય છે પરંતુ શું બદલો લેવાથી તમે આઝાદ થઈ જાવ છો? પીડિત કોણ છે? એ જે લડે છે અથવા એ જે પ્રેમના નામે અપમાન અને ખરાબ વર્તન છતાં પણ બધું જ સામાન્ય બનાવવાની કોશિશ કરે છે? આલિયા ભટ્ટની ‘ડાર્લિંગ્સ’ ટ્રેલરથી વિપરીત ડાર્ક કોમેડી અથવા ટ્વિસ્ટવાળી સસ્પેન્સ થ્રિલર ફિલ્મ નથી. એક સામાન્ય અંદાજમાં સીધી વાત કહેવામાં આવી છે. આ ફિલ્મ પુરુષ વિરુદ્ધ મહિલાની લડાઈ છે, જેમાં બેમાંથી એક પોતાના પાર્ટનરનું શોષણ કરે છે. તેની સાથે ખરાબ વર્તન કરે છે. વાર્તાના વિષય અને તેને લઈને રાઈટર-ડાયરેક્ટર જે દર્શાવવા માગતા હતા તે પ્રભાવશાળી છે. પરંતુ વાર્તાની ઢબ અને એડિટિંગમાં થોડી વધુ મહેનતની જરૂર હતી.

ફિલ્મનો મોટોભાગ એક મોટી ચાલીના રૂમમાં ફિલ્માવાયો છે. ફિલ્મની વાર્તા એક સર્કલમાં ફરે છે. એટલે ફિલ્મ એક સમયે નીરસ લાગે છે. ક્લાઈમેક્સ વિરોધાભાસી છે. ‘ડાર્લિંગ્સ’ ઘરેલુ હિંસા પર એક કેસ સ્ટડી છે, જે તમને બાંધી રાખે છે. જોકે, ફિલ્મમાં આલિયા ભટ્ટ અને શેફાલી શાહ ના હોત તો કદાચ ફિલ્મ જકડી ના રાખી શકી હોત. આ બંને અભિનેત્રીઓની આંખો પણ જાણે તમારી સાથે વાત કરે છે. બંને એક્ટ્રેસે શાનદાર પર્ફોર્મન્સ આપ્યું છે. સાથે જ તેમની કેમેસ્ટ્રી પણ જબરદસ્ત છે. તેઓ નીરસ સીન્સમાં પણ દમ ભરી દે છે. મા અને દીકરીના સંબંધ પણ આ ફિલ્મને ગતિ આપે છે અને મૂડ સેટ કરે છે. ઈમોશનલ સીન્સ હોય કે મુશ્કેલ લાગતા દ્રશ્યો કોમેડી સાથે તેને પીરસવામાં આવ્યા છે.

પોતાના જીવનના પુરુષોથી નિરાશ થયા છતાં પણ આ બંને પાત્રો પોતાને પીડિતના રૂપે જોવા નથી માગતા. જે ડોમેસ્ટિક ડ્રામાનો સૌથી રસપ્રદ ભાગ છે. પુરુષોના વિશેષાધિકાર, શારીરિક-ભાવનાત્મક શોષણ અને ડરાવવા-ધમકાવા પર આ ફિલ્મ ધ્યાન ખેંચે છે.

કેમ જોવી જોઈએ?

ફિલ્મ જોવાના કેટલાય કારણ છે પરંતુ શેફાલી શાહ અને આલિયા ભટ્ટની શાનદાર એક્ટિંગ માટે ફિલ્મ ચોક્કસથી જોવી જોઈએ.

Source link