Cyclone Asani: વાવાઝોડાની અસર આંદામાનમાં દેખાવાનું શરુ, NDRFના 150 જવાનો તૈનાત

 

પોર્ટ બ્લેરઃ આંદામાન અને નિકોબાર ટાપુની (Andaman And Nicobar Islands) દરિયાયી પટ્ટી વિસ્તારમાં રહેતા લોકોને સુરક્ષિત જગ્યાઓ પર ખસેડવાની કામગીરી હાથ ધરવામાં આવી છે. આસની વાવાઝોડાના (Cyclone Asani) કારણે અહીં રવિવારથી ભારે પવન સાથે વરસાદ થઈ રહ્યો છે. કેટલાક વિસ્તારોમાં ભારે પવનના કારણે જનજીવન પ્રભાવિત થયું છે.

હવામાન વિભાગના જણાવ્યા પ્રમાણે ઉત્તર આંદામાન દરિયામાં રહેલું ડિપ્રેશન દક્ષિણ તરફ આગળ વધી રહ્યું છે. જે પોર્ટ બ્લેરથી 110 કિલોમીટર દૂર છે. જ્યારે કાર નિકોબારથી 320 કિલોમીટર દૂર છે. જે આગામી 12 કલાકમાં તોફાની વાવાઝોડામાં પરિવર્તિત થવાની સંભાવના છે. જે આગામી સમયમાં મ્યાનમાનના દરિયા કિનારા પર પહોંચશે તેવી સંભાવના છે.

સાંજ સુધીમાં ડિપ્રેશન વાવાઝોડામા થઈ શકે છે પરિવર્તિત

હવામાન વૈજ્ઞાનિક આરકે જેનામનીએ જણાવ્યું હતું કે, દક્ષિણ-પૂર્વ અને દક્ષિણ આંદામાન દરિયા પર બનેલું ડિપ્રેશન ઉત્તર તરફ આગળ વધી રહ્યું છે. આશંકા છે કે આજે સાંજ સુધીમાં તે ડિપ્રેશન તોફાની વાવાઝોડામાં પરિવર્તિત થઈ જશે. આ વિસ્તારમાં ભારેથી અતિભારે વરસાદની સંભાવના વ્યક્ત કરવામાં આવી છે.

માછીમારોને દરિયો ના ખેડવાની સૂચના અપાઈ

અધિકારીઓએ જણાવ્યું છે કે આ વર્ષનું પહેલું વાવાઝોડું ઝડપથી આંદામાન અને નિકોબાર તરફ આગળ વધી રહ્યું છે, જેને ધ્યાનમાં રાખીને ઈન્ટર-આઈલેન્ડ શિપિંગ સર્વિસ સિવાય ચેન્નાઈ અને વિશાખાપટ્ટનમ સહિત અન્ય વિસ્તારોમાં જહાજ સેવાઓને રોકી દેવામાં આવી છે. માછીમારોને દરિયો ના ખેડવાની પણ સૂચના આપવામાં આવી છે.

પોર્ટ બ્લેરમાં NDRFના 68 કર્મીઓ

NDRFના સચિવ પંકજ કુમારે જણાવ્યું છે કે, “હું લોકોને અપીલ કરું છું કે ગભરાશો નહીં, કારણ કે વહીવટી તંત્ર તેમની સુરક્ષા સુનિશ્ચિત કરવા માટે તમામ પગલા ભરી રહ્યું છે.” તેમણે કહ્યું પોર્ટ બ્લેરમાં NDRFના કુલ 68 કર્મીઓ, જ્યારે ડિંગલીપુર, રંગત અને હટબે વિસ્તારમાં 25-25 જવાનોને તૈનાત કરવામાં આવ્યા છે. આ સાથે 6 રિલીફ કેમ્પ પણ ઉભા કરવામાં આવ્યા છે. આમ કુલ 150 જેટલા જવાનોને તૈનાત કરવામાં આવ્યા છે.

આંદામાનમાં ભારે પવન સાથે તોફાની વરસાદ

અધિકારીઓએ જણાવ્યું કે પોર્ટ બ્લેરની સાથે ઉત્તર અને મધ્ય તથા દક્ષિણ આંદામાન જિલ્લાઓમાં ભારે પવન સાથે વરસાદ થઈ રહ્યો છે. ઉત્તર અને મધ્ય આંદામાનના દરિયાઈ પટ્ટી વિસ્તારમાં ફસાયેલા લોકોને એનડીઆરએફની ટીમ દ્વારા સુરક્ષિત સ્થળો પર ખસેડવામાં આવી રહ્યા છે.

Source link