CMના અગ્રસચિવના નામે 4.35 કરોડ પડાવનાર વિજય ટાંકે જેલવાસથી બચવા કારસ્તાન કર્યું!

 

અમદાવાદ: રાજ્ય સરકારના ઉચ્ચ અધિકારીના નામે પૈસા પડાવનાર વિજય ટાંકને ધરપકડ કરી જેલહવાલે કરવામાં આવ્યા પછી તેણે નકલી કોરોના સર્ટીફિકેટ રજૂ કરીને જેલમાંથી બહાર રહેવા હાઈકોર્ટની આંખમાં પણ ધૂળ ઝોંકવા પ્રયાસ કર્યો હોવાનું સામે આવ્યું છે. જો કે, કોર્ટે વચગાળાના જામીન લંબાવવાનો કારસો પકડી પાડ્યો હતો. પ્રાપ્ત માહિતી અનુસાર વિજય ટાંક સામે ગાંધીનગર સેક્ટર-7માં લેન્ડ ગ્રેબિંગનો કેસ પણ નોંધાયો હોવાનું જાણવા મળ્યું છે.

મીડિયા રિપોર્ટ અનુસાર ગાંધીનગરમાં લેન્ડ ગ્રેબિંગ ઉપરાંત જમીનના કામ કરાવી આપવાના બહાને સરકારના ઉચ્ચ અધિકારીના નામે પૈસા પડાવનાર સરકારી ઠગ વિજય ટાંકે જેલવાસથી બચવા માટે કોરોના હોવાનો નકલી રિપોર્ટ બનાવ્યો હતો. હાઈકોર્ટમાંથી મેળવેલાં વચગાળાના જામીન લંબાવવા માટે વિજય ટાંક અને તેના પત્ની વિણાબહેને હાઈકોર્ટમાં બનાવટી રિપોર્ટ રજૂ કરતા સોલા હાઈકોર્ટમાં ફરિયાદ પણ નોંધાઈ છે.

તપાસમાં એવું જાણવા મળ્યું છે કે, અમદાવાદની લેબોરેટરીએ વિજય ટાંકને કોરોના નેગેટિવ હોવાનો રિપોર્ટ આપ્યો હતો. આ રિપોર્ટમાં ચેડાં કરી કોરોના પોઝીટિવ હોવાનો બનાવટી રિપોર્ટ હાઈકોર્ટમાં રજૂ કરી વચગાળાના જામીન લંબાવાયા હતા. કોરોના નેગેટિવ રિપોર્ટને પોઝિટિવ બનાવી વિજય ટાંક રાયસણ ખાતે આવેલી હોસ્પિટલમાં તા. 28 ફેબુ્રઆરીથી તા. 2 માર્ચ સુધી ઈનડોર પેશન્ટ તરીકે દાખલ પણ રહ્યો હતો. જો કે, ગાંધીનગર એલસીબીએ કોરોના RTPCR સર્ટીફિકેટ ફ્રોડ હોવાનું જણાઈ આવ્યાનો રિપોર્ટ રજૂ કરાતા વિજય ટાંકનો ભાંડો ફૂટી ગયો હતો.

પોલીસના જણાવ્યા અનુસાર ચીટિંગ કેસના આરોપી વિજય ટાંક અને તેના પત્ની વિણાબહેને કોરોના સર્ટીફિકેટ બનાવી કે બનાવડાવી ગુનો આચર્યા અંગે તપાસ કરી બન્ને આરોપીને ઝડપી લેવા માટે અમદાવાદ અને ગાંધીનગર પોલીસ કાર્યરત છે. ઉલ્લેખનીય છે કે, મુળ સિહોરનો અને ગાંધીનગરમાં રહેતા વિજય હરીભાઈ ટાંક સામે ગાંધીનગર પોલીસે બે ગુના નોંધાયા છે. વિજય ટાંકે વડોદરાના એક વ્યક્તિની જમીનનું કામ કરાવી આપવા માટે પોતાને મુખ્યમંત્રીના અગ્રસચિવ સાથે ઘરોબો હોવાની વાત કરીને 4.35 કરોડ રૂપિયા પડાવ્યા હતા.

Source link