Brahmastra Part One: Shiva Movie Review: મોટા બજેટ અને વર્ષોની મહેનતનું વળતર મળશે? પડદા પર જામી રણબીર-આલિયાની કેમેસ્ટ્રી?



એક્ટર:
રણબીર કપૂર, આલિયા ભટ્ટ, અમિતાભ બચ્ચન, નાગાર્જુન, શાહરૂખ ખાન, મૌની રોય
ડાયરેક્ટર: અયાન મુખર્જી
શ્રેણી: એડવેન્ચર, ફેન્ટસી, સાઈ-ફાઈ
સમય: 2 કલાક 47 મિનિટ
ભાષા: હિન્દી, તમિલ, તેલુગુ, મલયાલમ, કન્નડ
રેટિંગ: 3.5/5

બોલિવુડને ‘વેક અપ સિડ’ અને ‘યે જવાની હૈ દિવાની’ જેવી સફળ ફિલ્મો આપનારા ડાયરેક્ટર અયાન મુખર્જીનું 10 વર્ષનું સપનું આખરે આજે સાકાર થયું છે. ફિલ્મ ‘બ્રહ્માસ્ત્ર’ સિનેમાઘરોમાં રિલીઝ થઈ છે. અયાન મુખર્જીએ આ મહત્વાકાંક્ષી માયથોલોજીકલ ફેટન્સી એડવેન્ચર ફિલ્મ પાછળ આઠ વર્ષ ખર્ચ્યા છે. ફિલ્મની રિલીઝ પહેલા અયાન જણાવ્યું હતું કે, આશરે બે દિવસ પહેલા સુધી તો તે ફિલ્મે આખરી ઓપ આપવામાં વ્યસ્ત હતો. આટલા વર્ષોની મહેનત પછી અયાન મુખર્જી ‘બ્રહ્માસ્ત્ર પાર્ટ 1: શિવા’ (Brahmastra Part One: Shiva) સાથે કેટલો ન્યાય કરી શક્યો છે તેની ચર્ચા જરૂરી છે. જોકે, ફિલ્મના રિવ્યૂ પહેલા અયાન મુખર્જીના વખાણ કરવા જ રહ્યા કારણકે તેણે ભારતીય પૌરાણિક કથાઓને આધારે આ ફિલ્મ બનાવીને સિનેમાના ચાહકોને એક વિઝ્યુઅલ ટ્રીટ આપવાનો પ્રયાસ કર્યો છે.

વિરાટ કોહલીએ 71મી સદીનો શ્રેય પત્ની-દીકરીને આપ્યો, ભાવુક થયેલી અનુષ્કાએ શું કહ્યું?

અયાને કરી નવી પહેલ

‘બ્રહ્માસ્ત્ર’ પાસેથી ફેન્સ, સિનેમાપ્રેમીઓ અને બોક્સઓફિસને પણ ઢગલાબંધ અપેક્ષાઓ છે. દર્શકો માટે આ ફિલ્મ વિઝ્યુઅલ ટ્રીટ બની રહેશે તેમાં બેમત નથી. સામાન્ય રીતે ફેન્ટસી ફિલ્મોથી અત્યાર સુધી દૂર જ રહેલી હિન્દી ફિલ્મ ઈન્ડસ્ટ્રીમાં અયાને એક નવી પહેલ કરી છે. જોકે, ક્યાંક ને ક્યાંક વિઝ્યુઅલ ઈફેક્ટ્સ પર વધુ ભાર આપવાના ચક્કરમાં અયાને ફિલ્મની વાર્તા પર થોડું ઓછું ધ્યાન આપ્યું હોય તેવું લાગી રહ્યું છે.

‘બ્રહ્માસ્ત્ર’ના પહેલા ભાગની વાર્તા

ફિલ્મની કહાની ઋષિ-મુનીઓને વરદાનમાં મળેલા અસ્ત્રોના દેવતા બ્રહ્માસ્ત્રની છે, જેની રક્ષાની જવાબદારી તેના રક્ષકોએ એટલે બ્રહ્માંશની છે. આ બ્રહ્માસ્ત્રના ત્રણ ટુકડા છે જે બ્રહ્માંશના અલગ-અલગ સભ્યો પાસે સુરક્ષિત છે. બ્રહ્માંશના આ સભ્યોમાં વૈજ્ઞાનિક મોહન ભાર્ગવ (શાહરૂખ ખાન), કલાકાર અનીશ (નાગાર્જુન) અને મસ્તમૌલા ડીજે શિવા (રણબીર કપૂર) સામેલ છે. ‘બ્રહ્માસ્ત્ર’નો આ પહેલો ભાગ શિવાની જર્ની પર આધારિત છે. શિવાને પોતાના ગુરુ (અમિતાભ બચ્ચન) અને પ્રેમિકા ઈશા (આલિયા ભટ્ટ)ને આધારે પોતાની શક્તિઓનો અહેસાસ થાય છે. બીજી તરફ અંધારાના દેવતાને પૂજતી જૂનૂન (મૌની રોય) બ્રહ્માસ્ત્રના ત્રણેય ટુકડાને કોઈપણ ભોગે પ્રાપ્ત કરવા માગે છે. જૂનૂન પોતાના મનસૂબામાં સફળ થશે કે શિવા તેને રોકી લેશે? આ જ ફિલ્મનો સાર છે.

શાહિદ કપૂરે પત્ની ‘મીરા બેલ’ માટે રાખી શાનદાર બર્થ ડે પાર્ટી, કેક છોડી ડિનરનું મેનૂ જોવામાં વ્યસ્ત

‘બ્રહ્માસ્ત્ર પાર્ટ 1: શિવા’નો રિવ્યૂ

‘બ્રહ્માસ્ત્ર’ની વાર્તા અયાન મુખર્જીએ લખી છે. વાર્તામાં કહેવા માટે ઘણું છે પરંતુ તેને સ્ક્રીનપ્લેમાં જે રીતો પરોવાયી છે તે જટિલ લાગે છે. ફિલ્મમાં બ્રહ્માસ્ત્રને મેળવવાની લડાઈ દેખાડવામાં આવી છે પરંતુ બ્રહ્માસ્ત્રનો ઉદય કેવી રીતે થયો અને તેની પાછળનો ઉદ્દેશ શું છે જેવા કેટલાય સવાલોના ઊંડાણમાં ઉતર્યા વિના જ ફિલ્મ આગળ વધી જાય છે. ફિલ્મમાં બ્રહ્માસ્ત્રના ટુકડાની રક્ષા કરતાં બ્રહ્માંશો પોતાના સુપરપાવરથી ફક્ત બ્રહ્માસ્ત્રને બચાવવા માટે લડતા રહે છે. દુનિયા, સમાજ, લોકો પરત્વે તેમનું શું યોગદાન છે તેના પર સહેજ પણ ભાર અપાયો નથી. ફિલ્મમાં મુખ્ય પાત્રો ઉપરાંત સામાન્ય જનતા દેખાતી નથી. ફિલ્મમાં ઈશા અને શિવાની પ્રેમકહાણી મહત્વનો ભાગ છે પરંતુ તે એટલી આકર્ષક નથી બની શકી. રણબીર અને આલિયા વચ્ચેની કેમેસ્ટ્રી ખાસ છાપ છોડતી નથી.

ડાયલોગ્સ નબળા

ફિલ્મનું સૌથી નબળું પાસું ડાયલોગ લખનારા હુસૈન દલાલ સાબિત થયા છે. ફિલ્મ જેટલી ભવ્ય અને આકર્ષક છે તેના ડાયલોગ એટલા જ સાધારણ છે. ફિલ્મની ઝડપી ગતિ, શાનદાર વીએફએક્સ, દમદાર એક્શન સીન અને પ્રીતમના પહેલા જ હિટ થઈ ચૂકેલા કેસરિયા, દેવા દેવા અને ઈશ્ક કા ભૂત જેવા ગીતો તેમજ બ્રેકગ્રાઉન્ડ સ્કોર મળીને ઘણા ખરા અંશ સુધી સ્ક્રીનપ્લેની ખામીઓને દૂર કરે છે. ફિલ્મ મોટા પડદા પર એક શાનદાર સિનેમેટિક અનુભવ કરાવે છે.

એક્ટિંગ

એક્ટિંગની વાત કરીએ તો, રણબીર કપૂરે પોતાના પાત્રમાં જીવ રેડી દીધો છે. આ જ વાત નેગેટિવ રોલમાં દેખાયેલી મૌની રોય માટે લાગુ પડે છે. જોકે, આલિયા ભટ્ટ ફિલ્મમાં પોતાની પ્રતિભા સાથે ન્યાય નથી કરી શકી. તે ડાયલોગ અનુભવ્યા વિના માત્ર બોલતી હોય એવું લાગે છે. અમિતાભ બચ્ચને ગુરુજીના રોલમાં પર્ફેક્શન સાથે કામ કર્યું છે. શાહરૂખ ખાનનો કેમિયો ફિલ્મનું સરપ્રાઈઝ પેકેજ છે. નંદી અસ્ત્રના રૂપે નાગાર્જુનનો રાઈટર-ડાયરેક્ટર અયાન મુખર્જી પૂરતો ઉપયોગ નથી કરી શક્યો.

કેમ જોવી જોઈએ?

એકદંરે ‘બ્રહ્માસ્ત્ર પાર્ટ 1: શિવા’ વિઝ્યુઅલ ટ્રીટ છે. સિનેમાના પડદા પર વિઝ્યુઅલનો એક શાનદાર અનુભવ કરવો હોય તો ફિલ્મ જોવી જોઈએ. આલિયા ભટ્ટ અને રણબીર કપૂરની રિયલ લાઈફ જોડીને પડદા પર જોવી હોય તો ચોક્કસથી થિયેટરમાં જવું જોઈએ.

Source link