Ahmedabad: બોડકદેવનો પ્લોટ પચાવી પાડવા માટે ખોટા દસ્તાવેજો ઉભા કરનાર ચાર પકડાયા

 

અમદાવાદઃ ઝડપથી પૈસાવાળા બની જવા માટે ગુનાહિત કૃત્યો કરવામાં આવતા હોય છે. આવી જ વધુ એક ઘટના અમદાવાદમાં બની હોવાનું પ્રકાશમાં આવ્યું છે. વિવાદના કારણે અટવાઈ પડેલા બોડકદેવમાં આવેલા પ્લોટના ખોટા દસ્તાવેજ બનાવીને તેને વેચવાનો પ્રયાસ કરનારા ચાર ઝડપાયા છે. આ ચારમાં એક પંચ અને રજિસ્ટ્રાર પંચનો પણ સમાવેશ થાય છે કે જેમણે ખોટા દસ્તાવેજનો ઉપયોગ કરીને પ્લોટ વેચવાનો પ્રયાસ કર્યો હતો. આ મામલે વસ્ત્રાપુર પોલીસે ચારને પકડીને વધારે કાર્યવાહી હાથ ધરી છે. આ કેસમાં તપાસ દરમિયાન અન્ય કેટલાક મોટા ખુલાસા થયે તેવી પણ સંભાવનાઓ દેખાઈ રહી છે.

પોલીસ ફરિયાદ મુજબ બુધાલાલ ઝવેરીએ એક રિજસ્ટર્ડ દસ્તાવેજ કરીને પ્લોટ ખરીદ્યો હતો. તેમણે ભાગીદારીમાં વેપાર શરુ કર્યો પરંતુ તે નિષ્ફળ જતા ભાગીદારોમાં જમીન વહેંચી દીધી હતી.

તેમણે 10 ફેબ્રુઆરી 1987માં ભાગીદાર નારણ દંતાણીને 2, 4 અને 5 નંબરના પ્લોટ આપ્યા હતા. બુધાલાલ ઝવેરીનું 18 ઓક્ટોબર, 1987માં મોત થઈ ગયું.

નારણ દંતાણીનું 1997માં મોત થઈ ગયું, તેમની ઘાટલોડિયામાં રહેતી દીકરી વર્ષાને વસિયતમાં આ પ્લોટ મળ્યો. તેમણે કોર્ટ સમક્ષ નારણ દંતાણીના કાયદેસરના વારસદાર હોવાનો દાવો કર્યો હતો. આમ, આ કેસમાં તપાસ કરતા માલુમ પડ્યું કે બુધાલાલે અગાઉથી જ આ પ્લોટ કોઈને 27 જાન્યુઆરી 1976માં કોઈને વેચી દીધો છે.

આ બધાની વચ્ચે એવી વિગતો સામે આવી કે વર્ષાએ આ પ્લોટ અશોક લુહાર નામના વ્યક્તિને પાવર ઓફ એટર્ની પર આપી હતી અને તેણે આ હકીકત છૂપાવી રાખી કે આ મામલે કોર્ટમાં કેસ ચાલે છે, આ પછી જમીન પચાવી પાડવા માટે ગોટાળા કરાયા હોવાનું કોર્ટ કેસ દરમિયાન સામે આવ્યું. જે બાદ વસ્ત્રાપુર પોલીસ ઈન્સ્પેક્ટર એસજી ખાંબલાએ વર્ષા, રોહિત પટેલ, શાહ અને અશોક લુહાર સામે ફરિયાદ નોંધીને કાર્યવાહી હાથ ધરી છે.

Source link