AC ઉત્પાદકે ફ્રીમાં ઇન્સ્ટોલેશન કરી આપવું પડેઃ ગ્રાહક પંચનો ઠંડક આપતો ચુકાદો

 

બળબળતા ઉનાળામાં એસીની ડિમાન્ડ વધી જતી હોય છે અને અમદાવાદ જેવા ગરમ શહેરોમાં તો ઉનાળામાં ધમધોકાર એસી વેચાય છે. જોકે, એસી ઉત્પાદકોની મનમાનીના કારણે ગ્રાહકોને ક્યારેક કડવા અનુભવો પણ થતા હોય છે. ખાસ કરીને એસીના ઇન્સ્ટોલેશન (AC installation) નો કેટલો ખર્ચ આવશે તે વિશે ઘણી અનિશ્ચિતતા હોય છે અને ગ્રાહકોનું મન કડવું થઈ જાય છે.

અમદાવાદમાં પણ એક ગ્રાહકે AC ખરીદ્યા પછી ઇન્સ્ટોલેશન માટે પરેશાની વેઠવી પડી, પરંતુ કન્ઝ્યુમર કમિશને ગ્રાહકનો પક્ષ લીધો અને તેને વળતર ચુકવવા માટે એસી ઉત્પાદકને આદેશ આપ્યો છે.

અમદાવાદના ગોતા વિસ્તારમાં રહેતા સુનિલકુમાર સિંહે જૂન 2016માં 41,000 રૂપિયામાં ડાઈકિનનું એસી (Daikin AC) ખરીદ્યું હતું. બે દિવસ પછી ટેકનિશિયન એસી ઇન્સ્ટોલ કરવા આવ્યો ત્યારે સુનિલકુમાર જ્યાં એસી ફીટ કરાવવા માંગતા હતા ત્યાં એસી ઇન્સ્ટોલ કરવાની તેણે ના પાડી દીધી. ટેકનિશિયને એસી ઇન્સ્ટોલ કરવા માટે સ્ટીલની ફ્રેમ માટે વધારાના 4000 રૂપિયાની માંગણી કરી. સુનિલકુમારે વધારાના રૂપિયા આપવાની ના પાડી દીધી અને કંપનીને આ અંગે ફરિયાદ કરતો મેઈલ કર્યો.

ત્યાર બાદ તેમણે બે દિવસ પછી 43500 રૂપિયા આપીને હિટાચીનું એસી (Hitachi AC) ખરીદ્યું. હિટાચીના ટેકનિશિયને વધારાનો ચાર્જ લીધા વગર સુનિલકુમારે જ્યાં કહ્યું ત્યાં એસી ફીટ કરી આપ્યું. ત્યાર પછી સુનિલકુમાર ગ્રાહક ફરિયાદ નિવારણ કમિશનમાં ગયા અને તેમણે નવા એસી માટે વધારાનો 2500 રૂપિયાનો ખર્ચ કરવો પડ્યો તે બદલ વળતર માંગ્યું. આ ઉપરાંત તેમણે જે પરેશાની વેઠવી પડી અને તેમના પરિવારે બે દિવસ ગરમી સહન કરવી પડી તે બદલ ડાઇકિન કંપની અને એસી વેચનાર વેન્ડર વિજય સેલ્સ (Vijay Sales) પાસે વળતર માંગ્યું.

વિજય સેલ્સે કહ્યું કે તે માત્ર ઇલેક્ટ્રિક સાધનો વેચવા માટે જવાબદાર છે. એસીનું ઇન્સ્ટોલેશન કરવું એ એસી ઉત્પાદકની જવાબદારીમાં આવે છે. ડાઈકિને દલીલ કરી કે ગ્રાહક જ્યાં એસી ઇન્સ્ટોલ કરાવવા માંગતા હતા તે જગ્યા યોગ્ય ન હતી તેથી ત્યાં સ્ટીલની ફ્રેમ બેસાડવાનો વધારાનો ખર્ચ આવે તેમ હતો.

જોકે, ગ્રાહક કમિશને ગ્રાહકનો પક્ષ લીધો અને સવાલ કર્યો કે ડાઇકિનના ટેકનિશિયને જ્યાં એસી ઇન્સ્ટોલ કરવાની ના પાડી દીધી ત્યાં હિટાચીએ કેવી રીતે કોઈ પણ ચાર્જ વગર એસી ઇન્સ્ટોલ કરી આપ્યું? ડાઈકિન આ પ્રોડક્ટની ઉત્પાદક હોવાથી ઇન્સ્ટોલેશન પણ તેની જ જવાબદારીમાં આવે.

આ બાબતને ધ્યાનમાં રાખીને કમિશને ડાઈકિનને એસીના ભાવ વચ્ચેનો 2500 રૂપિયાનો તફાવત ચુકવવા જણાવ્યું છે. આ ઉપરાંત ગ્રાહકના પરિવારને જે તકલીફ પડી અને જે કાનૂની ખર્ચ કરવો પડ્યો તે માટે પણ 4000 રૂપિયા ચુકવવા આદેશ અપાયો છે.

Source link