AAPના 3 હજાર કાર્યકર્તા ભાજપમાં જોડાયા, પાર્ટીએ કહ્યું ‘ખોટી અફવા ના ફેલાવશો’!

 

અમદાવાદઃ ગુજરાત ભાજપમાં આજે ફરી એકવાર તહેવાર જેવો માહોલ બની ગયો છે, ભાજપના કાર્યકર્તાઓથી લઈને નેતાઓમાં આજે થનગનાટ જોવા મળી રહ્યો છે. આ પાછળનું કારણ છે કે ગુજરાત આમ આદમી પાર્ટીના 3000થી વધારે કાર્યકરો સફેદ ટોપી છોડીને કેસરિયા રંગથી રંગાઈ ગયા છે. બીજી તરફ આપ દ્વારા દાવો કરવામાં આવી છે કે જે કાર્યકરો ભાજપમાં જોડાઈ રહ્યા છે તેમને અગાઉ પાર્ટીમાંથી નિષ્ક્રિય અને સસ્પેન્ડ કરવામાં આવ્યા છે. ભાજપમાં કાર્યકર્તાઓને જોડવાના કાર્યક્રમ દરમિયાન ભાજપના પ્રદેશ પ્રમુખ સીઆર પાટીલ સહિતના નેતાઓ પણ ઉપસ્થિત રહ્યા છે.

ગુજરાતમાં ઉનાળાની સાથે-સાથે ચૂંટણીની મોસમ પણ શરુ થઈ ગઈ છે. ચાલુ વર્ષના અંતમાં રાજ્યમાં વિધાનસભા ચૂંટણી યોજાવાની છે ત્યારે ભાજપ એક્ટિવ થઈ ગયો છે. મોટા નેતાઓથી લઈને કાર્યકર્તાઓને ભાજપમાં જોડવાની પ્રક્રિયા તેજ બની ગઈ છે. આવામાં તાજેતરમાં પાંચમાંથી ચાર રાજ્યોમાં સફળતા મળ્યાનો અને વડાપ્રધાને અમદાવાદથી ગાંધીનગરમાં 10 કિલોમીટરનો જે રોડ શો કર્યો તેનો જુસ્સો પણ સ્થાનિક નેતાઓમાં જોવા મળી રહ્યો છે.

સફેદ ટોપી ઉતારીને કેસરી ટોપી પહેરી

મહત્વનું છે કે ગુજરાત આપ દ્વારા દાવો કરવામાં આવી રહ્યો છે કે જે ભાજપમાં જોડાઈ રહ્યા છે તે તેમના નિષ્ક્રિય અને સસ્પેન્ડ કરાયેલા કાર્યકરો છે, આમ છતાં અહીં પહોંચેલા કાર્યકરો આમ આદમી પાર્ટીની ટોપી પહેરીને કમલમ ખાતે પહોંચ્યા હતા. જે બાદ આ કાર્યકરોએ આપની ટોપી ઉતારીને ભાજપની કેસરી ટોપી પહેરી લીધી હતી.

ગુજરાત આપના કાર્યકરો ભાજપમાં જોડાયા

આપમાં રૂપિયા લઈને પદ અપાતું હોવાના આક્ષેપ

અહીં ઉપસ્થિત રહેલા ઉમરેઠના આપના લધુમતિ મોરચા સેલના પ્રમુખે આપના દાવાને ખોટો પાડીને કહ્યું કે, હજુ આપમાં મારું નામ બોલે છે અને હજુ અમને સસ્પેન્ડ કરવામાં આવ્યા નથી. તેમણે આપમાં ભ્રષ્ટાચાર વધી રહ્યો હોવાના અને રૂપિયા લઈને લોકોને જિલ્લા-તાલુકા પ્રમૂખ બનાવવામાં આવી રહ્યા હોવાના આક્ષેપ કર્યા હતા. આ સિવાય અન્ય કાર્યકર્તાઓએ આપમાં તેમનો અનાદર થતો હોવાના આક્ષેપો કર્યા હતા.

કાર્યક્રમમાં આપની ટોપી પહેરીને હાજર રહેલા કેટલાક કાર્યકર્તાઓને ભાજપના નેતાઓ દ્વારા તેમની ટોપી ઉતારીને ભાજપની ટોપી પહેરાવીને પાર્ટીમાં સ્વાગત કર્યું છે. પોતે આપને રાજીનામું આપીને ભાજપમાં જોડાઈ રહેલા એક મહિલા કાર્યકરે જણાવ્યું કે, અમે ભણેલા છીએ અને માટે ઉત્સાહથી આપમાં જાડાયા હતા પરંતુ ઉત્સાહ મોળો પડતા આખરે આપ જોડીને ભાજપમાં આવવાનો નિર્ણય કર્યો છે.

Source link