10 દિવસની અંદર જ અશ્વિનનો બીજો ધમાકો, તોડી નાંખ્યો આ દિગ્ગજનો રેકોર્ડ!

 

ભારતીય ક્રિકેટ ટીમના અનુભવી ઓફ સ્પિનર રવિંચદ્રન અશ્વિને 10 દિવસની અંદર જ બે લિજેન્ડરી બોલર્સના રેકોર્ડ તોડી નાંખ્યા છે. અશ્વિને પહેલા તો ભારતના દિગગ્જ કપિલ દેવનો રેકોર્ડ તોડ્યો હતો જ્યારે હવે તેણે સોમવારે સાઉથ આફ્રિકન સ્ટાર ડેલ સ્ટેઈનને પાછળ રાખી દીધો છે. ભારત અને શ્રીલંકા વચ્ચે બેંગલુરૂના ચિન્નાસ્વામી સ્ટેડિયમમાં રમાયેલી ટેસ્ટના ત્રીજા દિવસે અશ્વિને ધનંજય ડીસિલ્વાને આઉટ કર્યો તે સાથે જ તેણે ડેલ સ્ટેઈનના રેકોર્ડને તોડી નાંખ્યો હતો.

ધનંજય ડીસિલ્વા અશ્વિનની 440મી વિકેટ હતો અને આ સાથે ભારતીય ઓફ સ્પિનરે ડેલ સ્ટેઈનના 439 વિકેટના રેકોર્ડને પાછળ રાખી દીધો છે. અશ્વિને 162 ઈનિંગ્સમાં 440 વિકેટ ઝડપી છે જ્યારે ડેલ સ્ટેઈને 171 ઈનિંગ્સમાં 439 વિકેટ ખેરવી હતી. ટેસ્ટમાં સૌથી વધુ વિકેટ ઝડપવાનો રેકોર્ડ શ્રીલંકાના દિગ્ગજ સ્પિનર મુથૈયા મુરલીધરનના નામે છે. તેણે 800 વિકેટ ઝડપી છે. જ્યારે બીજા ક્રમે તાજેતરમાં જ મૃત્યુ પામેલા ઓસ્ટ્રેલિયન લિજેન્ડ શેન વોર્ન છે. વોર્ને 709 વિકેટ ઝડપી હતી.

ભારતીય ક્રિકેટ ટીમે ઘરઆંગણે પોતાની વિજયકૂચ જારી રાખતા બેંગલુરૂમાં રમાયેલી બીજી ટેસ્ટમાં શ્રીલંકાને 238 રને પરાજય આપ્યો છે. આ ડે-નાઈટ ટેસ્ટ હતી જેમાં તેનો આસાન વિજય થયો છે. ભારતે અત્યાર સુધી ઘરઆંગણે બે ડે-નાઈટ ટેસ્ટ રમી છે અને બંનેમાં તેણે વિજય નોંધાવ્યો છે.

બેંગલુરૂ ટેસ્ટમાં રોહિત શર્માની આગેવાનીવાળી ટીમે શ્રીલંકા સામે 447 રનનો લક્ષ્યાંક મૂક્યો હતો જેના જવાબમાં સુકાની ઓપનર દિમુથ કરૂણારત્નેએ લડાયક સદી ફટકારી હોવા છતાં શ્રીલંકન ટીમ તેના બીજા દાવમાં 208 રનમાં આઉટ થઈ ગઈ હતી. બંને દાવમાં શ્રીલંકન બેટર્સ ઝડપી બોલર જસપ્રિત બુમરાહના ઝંઝાવાત અને સ્પિનર અશ્વિનની સ્પિન બોલિંગ સામે લાચાર જોવા મળ્યા હતા. વિકેટકીપર બેટર રિશભ પંતને પ્લેયર ઓફ ધ સીરિઝ અને શ્રેયસ ઐય્યરને પ્લેયર ઓફ ધ મેચ જાહેર કરવામાં આવ્યા હતા.

Source link