સુરત: મહિલા પર ત્રણ રાઉન્ડ ફાયરિંગ, પરંતુ શરીરમાંથી ચોથી ગોળી મળતાં પોલીસ પણ ચોંકી!

 

સુરત: શહેરના માન દરવાજા વિસ્તારમાં શનિવારે એક મહિલા પર ફાયરિંગ થયાની ઘટનામાં એક ચોંકાવનારો ખુલાસો થયો છે. પોલીસના જણાવ્યા અનુસાર, આ ઘટનામાં નંદા મોરે નામની મહિલા પર ત્રણ રાઉન્ડ ફાયર કરવામાં આવ્યા હતા. જેમાં એક ગોળી તેના ડાબા પડખા પર, જ્યારે બે ગોળી ડાબા હાથ પર વાગી હતી. જોકે, રવિવારે જ્યારે ઈજાગ્રસ્ત મહિલાનો એક્સ-રે લેવાયો ત્યારે તેના જમણા પગમાં ચોથી ગોળી દેખાતા પોલીસની સાથે ખુદ મહિલા પણ આશ્ચર્યમાં પડી ગઈ હતી.

આ સમગ્ર ઘટનાની વિગત એવી છે કે, નંદા મોરે નામની મહિલા શનિવારે સાંજે માન દરવાજા વિસ્તારમાંથી પસાર થઈ રહી હતી. તે સમયે બાઈક પર આવેલા અજાણ્યા શખ્સોએ તેના પર જાહેરમાં ફાયરિંગ કર્યું હતું. પોલીસ રિપોર્ટ અનુસાર, આ ઘટનામાં મહિલાને ત્રણ ગોળી વાગી હતી. જોકે, ઈજાગ્રસ્ત મહિલાને હોસ્પિટલ લઈ જવામાં આવી ત્યારે એક્સ-રેમાં તેના જમણા પગમાં ચોથી ગોળી ફસાયેલી જોવા મળી હતી.

ચોથી ગોળી અંગે ખુદ મહિલાએ પોલીસ સમક્ષ આશ્ચર્ય વ્યક્ત કરતાં જણાવ્યું હતું કે તેના પર તાજેતરના દિવસમાં ફાયરિંગ થયું હોવાની તેને કોઈ જાણકારી નથી. જોકે, મહિલાએ એવો પણ દાવો કર્યો હતો કે, 15 દિવસ પહેલા તે બામરોલી વિસ્તારમાંથી પસાર થઈ રહી હતી ત્યારે તેની પાસેથી એક બાઈક નીકળ્યું હતું. તે વખતે તેને ફટાકડો ફુટવા જેવો અવાજ સંભળાયો હતો. પરંતુ આ અવાજ બાઈકના સાયલેન્સરનો હશે તેમ તેને લાગ્યું હતું. એટલું જ નહીં, તે વખતે તેને પગમાં કંઈક વાગ્યું પણ હતું, પરંતુ તેને એમ હતું કે કદાચ પથ્થર જેવું કંઈક વાગ્યું હશે.

બીજી તરફ, મહિલાના પરિવારજનોએ ફાયરિંગની ઘટના પાછળ તેના પતિ વિનોદ મોરે અને સાસરિયાં પર શંકા વ્યક્ત કરી છે. વિનોદ CRPFમાં નોકરી કરે છે અને હાલ સુરતની બહાર તેનું પોસ્ટિંગ છે. જોકે, ફાયરિંગ પાછળ કોનો હાથ છે તે અંગેની પોલીસ તપાસમાં હજુ સુધી કોઈ નક્કર વિગતો બહાર નથી આવી. તપાસ અધિકારીએ એવી પણ શંકા વ્યક્ત કરી હતી કે, મહિલા પર શનિવારે જેમણે ફાયરિંગ કર્યું હતું તે જ લોકો 15 દિવસ પહેલાની ઘટનામાં પણ સંડોવાયેલા હોઈ શકે છે.

Source link