સુરતના ઉદ્યોગપતિ અને AAPના પૂર્વ નેતા મહેશ સવાણીને હાર્ટએટેક આવતા હોસ્પિટલ ખસેડાયા

 

સુરત: સુરત આમ આદમી પાર્ટી (AAP)ના પૂર્વ નેતા અને ઉદ્યોગપતિ મહેશ સવાણીને હાર્ટ એટેક આવતા હોસ્પિટલમાં દાખલ કરવામાં આવ્યા છે. મીડિયા રિપોર્ટ અનુસાર મહેશ સવાણીએ ગત મોડી રાતે હાર્ટમાં દુખાવો ઉપડ્યો હતો. દુખાવો વધતા પરિવાર દ્વારા તેમને પી.પી.સવાણી હોસ્પિટલમાં સારવાર માટે દાખલ કરાયા હતા, જ્યાં તેમને હાર્ટ-એટેક આવ્યા હોવાનું સામે આવ્યું હતું. હાલ તેમની હાલત સ્થિર હોવાનું જાણવા મળી રહ્યું છે.

ઉદ્યોગપતિ મહેશ સવાણીને હાર્ટએટેક આવતા દાખલ
મહેશ સવાણીને હાર્ટએટેક આવતા પરિવાર ચિંતામાં મૂકાયો છે. પ્રાપ્ત માહિતી અનુસાર ડોક્ટરોની એક ટીમ દ્વારા સતત તેમનું મોનિટરિંગ કરવામાં આવી રહ્યું છે. સવારે ડૉક્ટરોએ તપાસ્યા બાદ તેમની સ્થિતિ સ્થિર હોવાનું કહેતાં પરિવારને હાશકારો થયો છે. ઉલ્લેખનીય છે કે, આમ આદમી પાર્ટીમાંથી રાજીનામું આપ્યા બાદ મહેશ સવાણીએ મીડિયાને જણાવ્યું હતું કે હેલ્થ ઈશ્યુના કારણે તેઓ પાર્ટી છોડી રહ્યા છે.

પ્રાપ્ત અહેવાલો અનુસાર મહેશ સવાણીની લગભગ 2 દિવસથી તકલીફ હોવાથી ગઈકાલે સવારે મહેશભાઈએ પત્નીને જણાવ્યું કે, તેમને ગમે ત્યારે એટેક આવશે તેવું લાગે છે. જેથી તેમના રિપોર્ટ કરાવવામાં આવ્યા હતા. જેમાં શુગર હાઈ આવતા તેમને તપાસ માટે હોસ્પિટલ લઈ જવાયા હતા. જ્યાં ડોક્ટરે તપાસ કરતા હાર્ટએટેક આવ્યાની જાણ થતાં થતાં તરત જ એડમિટ કરીને સારવાર શરૂ કરવામાં આવી હતી.

જણાવી દઈએ કે, મહેશ સવાણી સુરતના જાણીતા પાટીદાર ઉદ્યોગપતિ છે. તેઓ મૂળ ભાવનગરના જિલ્લાના રાપરડા ગામના વતની છે અને પીપી. સવાણી ગ્રુપના સંચાલક છે. તેઓ ડાયમંડ, એજ્યુકેશન, રિયલ એસ્ટેટના બિઝનેસ સાથે સંકળાયેલા છે. દિલ્હીના નાયબ મુખ્યમંત્રી મનીષ સિસોદિયાની જૂન, 2021ની સુરતની મુલાકાતે વખતે તેઓ આમ આદમી પાર્ટીમાં જોડાયા હતા. ‘આપ’નો ખેસ પહેર્યા બાદ રાજ્યમાં ભારતીય જનતા પાર્ટીની સરકાર પ્રત્યે સવાણીએ ભારોભાર નારાજગી વ્યક્ત કરી હતી. તેઓ આમ આદમી પાર્ટીમાં જોડાતા સુરતના રાજકારણમાં ગરમાવો આવી ગયો હતો.

Source link