સુરતઃ 212 કરોડના ખર્ચે ઉધના રેલવે સ્ટેશનની કાયાપલટ થશે, એરપોર્ટ જેવી સુવિધાઓ મળશે

 

Udhna Railway Station Redevelopment: સુરતમાં ઉધના રેલવે સ્ટેશનની 212 કરોડના કાયાપલટ કરવામાં આવશે. ઉધના રેલવે સ્ટેશનના રિડેવલપમેન્ટ માટેના ટેન્ડર પણ બહાર પાડી દેવામાં આવ્યા છે. ઉધના રેલવે સ્ટેશન પર એરપોર્ટ જેવી સુવિધાઓ પણ આપવામાં આવશે. આ ઉપરાંત વારાણસી બાદ દેશનું બીજું અને ગુજરાતનું પ્રથમ એલિવેટેડ કોનકોર્સ પણ તૈયાર કરાશે. આ ઉપરાંત રેલવે સ્ટેશન પર બાળકો માટે રમવાના સાધનો અને રેસ્ટોરન્ટનું પણ નિર્માણ કરવામાં આવશે. 2060 સુધી ઉધના રેલવે સ્ટેશન પરથી રોજના 1 લાખથી વધુ લોકો અવરજવર કરશે તેવો અંદાજ વ્યક્ત કરવામાં આવ્યો છે.

ઉધના રેલવે સ્ટેશનના રિવડેલપમેન્ટ માટે મે 2022 સુધી ટેન્ડર ફાળવી દેવામાં આવશે તેવો દાવો મીડિયા રિપોર્ટમાં કરવામાં આવ્યો છે. ગુજરાતના પ્રથમ એલિવેટેડે કોનકોર્સ માટે ઉધનાના પ્લેટફોર્મ નંબર 1 અને 2ની ઉપર 9 મીટની ઊંચાઈએ 40 મીટર પહોળો અને 60 મીટર લાંબો એલિવેટેડ એરિયા બનાવશે અને તેમાં ચાર લિફ્ટ તેમજ ત્રણ એસ્કેલેટર્સ પણ હશે. આ ઉપરાંત અહીંથી તમામ પ્લેટફોર્મ પર પહોંચી શકાય તે રીતે એસ્કેલેટર્સ પણ મુકવામાં આવશે.

ઉધના રેલવે સ્ટેશન આધુનિક સુવિધાઓથી સજ્જ હશે અને તેમાં એરપોર્ટમાં હોય તેવી સુવિધા આપવામાં આવશે. એરપોર્ટના વેઈટિંગ લોંજ એરિયામાં જે રીતે પ્લેન કયા ટર્મિનલ પર આવશે તે જ રીતે રેલવે સ્ટેશનના વેઈટિંગ એરિયામાં ટ્રેન કયા પ્લેટફોર્મ પર આવશે તેની માહિતી એલઈડી સ્ક્રીન પર જણાવવામાં આવશે. રેલવે સ્ટેશનના વેઈટિંગ લોંજમાં બેઠાં-બેઠાં મુસાફરો ટ્રેનોને પસાર થતી જોઈ શકશે તે રીતની વ્યવસ્થા પણ ગોઠવવામાં આવશે.

આ ઉપરાંત બાળકોના મનોરંજન માટેની પણ તમામ વ્યવસ્થા કરવામાં આવશે. જેમાં બાળકો માટે રમતના સાધનો પણ રેલવે સ્ટેશન પર ગોઠવવામાં આવશે. જ્યારે લોકોને સારું ખાવાનું મળી રહે તે માટે રેસ્ટોરન્ટ પણ બનાવવામાં આવશે. તેમજ 2060માં દૈનિક 1 લાખ લોકોની અવરજવરના અંદાજ સાથે રેલવે સ્ટેશનની કાયાપલટ કરવામાં આવનાર છે.

Source link