સુરતઃ બાઈક પરથી ઉતરવાની નજીવી વાતે થયેલા ઝઘડામાં કોમામાં સરી પડેલા યુવકનું મોત

 

સુરતઃ સામાન્ય ઝઘડામાં યુવાનો ઝનુની બની જતા હોવાના કિસ્સા વધી રહ્યા છે. નાની-નાની વાત પર હથિયાર ઉડવાના અને માર મારવાના કિસ્સામાં સતત વધારો થઈ રહ્યો છે. આવો જ એક કિસ્સો સુરતમાં બન્યો છે કે જેમાં પાર્ક કરેલા બાઈક પર બેસવા બાબતે થયેલી સામાન્ય રકઝકમાં યુવકે અન્ય યુવકનું ગળું દબાવી દેતા તેનું એક અઠવાડિયા બાદ મોત થઈ ગયું છે. આ મામલે પોલીસે આરોપી યુવકની શોધખોળ માટે તપાસ શરુ કરી છે.

આ ઘટના સુરતના પુણા ગામ પાસેના સરોલીમાં બની છે. કે જેમાં પુણા ગામમાં રહેતો યુવક અજય રાઠોડ ગત શનિવારે રાત્રે પોણા 10 વાગ્યે તેના બે મિત્રો હિતેષ સંજયભાઈ પાર્કર અને પાર્થ ભરતભાઈ મહાજન સાથે હિતેષ સાથે સરોલી ભરત કેન્સર હોસ્પટલની પાછળ બાઈક પાર કરીને નાસ્તો કરવા માટે ગયા હતા. જ્યારે હિતેષ અને તેના મિત્રો નાસ્તો કરીને પરત આવ્યા તો હિતેષના બાઈક પર 22 વર્ષનો સીમાડા ગામમાં રહેતો જયવીર અશોકભાઈ માઢક નામનો યુવક બેઠો હતો.

હિતેષે જયવીરને બાઈક પરથી ઉતરવા માટે કહ્યું તો તેને ગમ્યું નહોતું. આ દરમિયાન ત્યાં હિતેષનો પરિચિત મિત્ર કેવલ પણ ત્યાં હતો જેની સાથે હિતેષ, અજય અને પાર્થ વાતો કરવા લાગ્યા હતા. આ જોઈને જયવીરને લાગ્યું કે તેઓ તેની વાત કરી રહ્યા છે. જેથી તે ગિન્નાયો હતો.

જ્યારે હિતેષ અને તેના મિત્રો બાઈક પર બેઠા ત્યારે જયવીરે બાઈકના ટાયરને પાછળથી લાત મારી હતી. જેથી હિતેષે જયવીરને આમ કરવાનું કારણ પૂછ્યું તો તેણે ગુસ્સામાં ગાળો બોલવાનું શરુ કર્યું હતું. આ પછી હિતેષે પણ જયવીરને ગાળો બોલી હતી. આ પછી વધારે ગુસ્સે થયેલા જયવીરે હિતેષનું ગળું પકડીને તેને નીચે પાડ્યો હતો, આમ થતાં હિતેષને ખેંચ આવી ગઈ હતી, વચ્ચે પડેલા અજયને પણ જયવીરે મારીને નીચે પાડ્યો હતો અને ત્યાંથી ભાગી ગયો હતો.

હિતેષ જમીન પર ઢળી પડ્યો હતો તેને સારવાર માટે તેના મિત્રો નજીકમાં આઈમાતા રોડ પર આવેલી ખાનગી હોસ્પિટલમાં લઈ ગયા હતા. અહીં હિતેષ કોમામાં હોવાનું માલુમ પડતા જયવીર સામે પોલીસે હત્યાનો પ્રયાસનો ગુનો દાખલ કર્યો હતો, જોકે, રવિવારે હિતેષનું સારવાર દરમિયાન મોત થઈ જતા પોલીસે જયવીર સામે હત્યાની કલમ નોંધીને તેની શોધખોળ શરુ કરી છે.

Source link