સિલ્વર ઓક કૉલેજના એસ્ટેટ મેનેજર પર જીવલેણ હુમલો, 3 વિદ્યાર્થીઓની ધરપકડ

 

અમદાવાદઃ શહેરના સોલા વિસ્તારમાં આવેલી સિલ્વર ઓક કૉલેજના વિદ્યાર્થીઓની દાદાગીરી સામે આવી છે. સિલ્વર ઓક કૉલેજના (Silver oak college) એસ્ટેટ મેનેજર પર કૉલેજના જ ત્રણ વિદ્યાર્થીઓએ જીવલેણ હુમલો (Attack on college estate manager) કરવાની ઘટના પ્રકાશમાં આવી છે. આ મામલે કૉલેજના એસ્ટેટ મેનેજરે સોલા પોલીસને ફરિયાદ કરી હતી. જે બાદ સોલા પોલીસે ગુનો નોંધીને કાર્યવાહી હાથ ધરી હતી. જેમાં પોલીસે કૉલેજના ત્રણેય વિદ્યાર્થીઓની ધરપકડ (Ahmedabad crime) કરી છે. પોલીસ તપાસમાં સામે આવ્યું કે, વિદ્યાર્થીઓએ કૉલેજમાં ગઈ 31મી ડિસેમ્બરની પાર્ટીના બનેરો લગાવ્યા હતા. આ બેનરો એસ્ટેટ મેનેજરે હટાવ્યા હતા અને મેનેજમેન્ટને ફરિયાદ કરી હતી. બસ, આ વાતની અદાવત રાખીને એસ્ટેટ મેનેજર પર હુમલો કરવામાં આવ્યો હતો.

પ્રાપ્ત રિપોર્ટ મુજબ, સોલા વિસ્તારમાં (Ahmedabad News) આવેલી સિલ્વર ઓક કૉલેજમાં વિવેક ગોસાઈ એસ્ટેટ મેનેજર તરીકે ફરજ બજાવે છે. એસ્ટેટ મેનેજર વિવેક ગોસાઈએ કૉલેજના વિદ્યાર્થી પ્રજવલ તિવારી, નિહાર દેસાઈ અને જય પટેલ વિરૂદ્ધ સોલા પોલીસ સ્ટેશનમાં ફરિયાદ નોંધાવી છે. વિવેક ગોસાઈએ કરેલી ફરિયાદ મુજબ, ગયા શુક્રવારે સવારે તેઓ કૉલેજમાં હાજર હતા. એ સમયે ફરિયાદમાં ઉલ્લેખ કરવામાં આવેલા ત્રણેય વિદ્યાર્થીઓ તેમની પાસે આવ્યા હતા. બાદમાં વિવેક ગોસાઈને અપશબ્દો કહીને માર માર્યો હતો. એટલું જ નહીં ત્રણેય વિદ્યાર્થીઓએ તેમને માથાના ભાગમાં છૂટ્ટી ટાઈલ્સ મારી હતી અને જાનથી મારી નાખવાની ધમકી આપી હતી.

એ પછી વિવેક ગોસાઈને સારવાર માટે ખસેડવામાં આવ્યા હતા. પોલીસ ફરિયાદ બાદ તપાસ હાથ ધરાઈ હતી. પોલીસ તપાસમાં સામે આવ્યું કે, કૉલેજ કેમ્પસમાં મિલકત કે અન્ય વસ્તુઓને નુકસાન પહોંચાડતા વિદ્યાર્થીઓના નામજોગ ફરિયાદ વિવેક ગોસાઈ મેનેજમેન્ટને કરતા હતા. જે બાદ મેનેજમેન્ટ દ્વારા કૉલેજના વિદ્યાર્થીઓ સામે કાર્યવાહી કરવામાં આવતી હતી. આ સિવાય ગઈ 31મી ડિસેમ્બરની પાર્ટી માટે વિદ્યાર્થીઓએ કૉલેજમાં બનેરો લગાવ્યા હતા. આ બેનરો એસ્ટેટ મેનેજર વિવેક ગોસાઈએ હટાવી દેવડાવ્યા હતા. આ વાતને લઈને વિદ્યાર્થીઓ ઉશ્કેરાયા હતા અને અદાવત રાખી હતી. વિવેક ગોસાઈએ ફરિયાદમાં એવું પણ જણાવ્યું છે કે, આ ત્રણેય વિદ્યાર્થીઓ સંગઠન સાથે સંકળાયેલા હોવાથી મનફાવે એવું વર્તન કરે છે અને દાદાગીરી કરે છે. અદાવત રાખીને તેઓએ તેમના પર હુમલો કર્યો હતો. જો કે, આ મામલે પોલીસે ત્રણેય વિદ્યાર્થીઓની ધરપકડ કરીને આગળની કાર્યવાહી હાથ ધરી છે.

Source link