સાવધાન! તમારી કારમાં સફેદ LED હેડ લાઈટ તો નથીને? કરાઈ રહી છે કાર્યવાહી

ગાંધીનગરઃ રાતના સમયે તમે વાહન લઈને નીકળ્યા હોવ અને તમારી પાછળથી આવતું વાહન નજીક આવીને સફેદ LED હેડ લાઈટથી ડીપર મારે તો જાણી વીજળી પડી હોય તેવો ચમકારો થવા લાગતો હશે. આ સિવાય જો રોડની વચ્ચેનું ડિવાઈડર સામેના રોડેથી જતા વાહનોના પ્રકાશને રોકી ના શકતું હોય ત્યારે સફેદ LED હેડ લાઈટ વિક્ષેપ ઉભો કરતી હોય છે અને આવી હેડ લાઈટના લીધે અકસ્માત થવાનો ભય વધી જતા હોય છે. આ પ્રકારની લાઈટ લગાવી હોય તેમની સામે કાર્યવાહી કરવામાં આવી રહી છે. જેમાં પાછલા બે વર્ષની અંદર 4,000 જેટલા વાહન માલિકો સામે કાર્યવાહી કરવામાં આવી છે. જોકે, હજુ પણ હાઈવે પર ઘણાં વાહનો સફેદ LED હેડ લાઈટવાળા વાહનો જોવા મળે છે. જેમની સામે આગામી સમયમાં કાર્યવાહી કરવામાં આવી શકે છે.

સરકારી અને ખાનગી વાહનોમાં વાહનોમાં સફેદ LED લાઈટ ગેરકાયદેસર રીતે લગાાડવામાં આવતી હોવાનું વાહન વ્યવહાર વિભાગ દ્વારા સ્વીકારવામાં આવ્યું છે. જરુર કરતા વધારે પ્રકાશવાળી સફેદ લાઈટના કારણે અન્ય વાહનચાલકની આંખો અંજાઈ જતી હોય છે. જેના કારણે રોડ અકસ્માત થવાનો ભય વધી જાય છે.

આ પ્રકારના અકસ્માત થઈ શકે તેવા જોખમને ટાળવા માટે સફેદ LED લગાવી હોય તેવા 3,792 વાહનના માલિકો સામે કાર્યવાહી કરવામાં આવી છે. આગામી સમયમાં પણ આ પ્રકારના અકસ્માતનું જોખમ ઉભું કરનારા વાહનચાલકો સામે કાર્યવાહી કરવામાં આવી શકે છે. આ સિવાય વાહનોમાં વધારાની ગેરકાયદેસર લાઈટો, હોર્ન, સાઈલેન્સરના અવાજ, બ્લેક ફિલ્મ સહિતના લીધે પણ વાહન વ્યવહાર નિયમોના ભંગ થતા હોય છે.

અમદાવાદમાં છેલ્લા બે વર્ષમાં કોરોના ગાઈડલાઈનનો ભંગ કરનારા 83 હજારથી વધારે વાહનો જપ્ત કરવામાં આવ્યા હતા. જેમાંથી હજુ ઘણાં વાહનો એવા છે કે તેના માલિક દ્વારા દંડ ભરવામાં આવ્યો નથી. જાન્યુઆરી 2022 સુધીમાં 6,531 વાહનો એવા છે કે જે તેમના માલિકો દ્વારા છોડાવવામાં આવ્યા નથી 2020ની સ્થિતિમાં 62,993 વાહનોમાંથી 58,959 વાહનો 7.15 કરોડ રૂપિયાનો દંડ ભરીને વાહનના માલિકો દ્વારા છોડાવવામાં આવ્યા છે. જ્યારે વર્ષ 2021માં 20,891 વાહનોમાંથી 18,349 વાહનો 3.86 રૂપિયાનો દંડ ભરીને વાહનના માલિકો દ્વારા છોડાવવામાં આવ્યા છે.

Source link