સાયન્સ સિટીમાં યોજાયેલી WSRO નેશનલ ચેમ્પિયનશિપમાં જોવા મળ્યાં રોબોટિક્સના અવનવાં મોડેલ્સ!

 

અમદાવાદ: સાયન્સ સિટીમાં આજે યોજાયેલી WSRO નેશનલ ચેમ્પિયનશિપમાં 300થી વધારે પાર્ટિસિપન્ટ્સે રોબોટિક્સના પોતાના અવનવા મોડેલ્સ રજૂ કર્યા હતા. જેમાં રિમોટ કંટ્રોલ સંચાલિત એરક્રાફ્ટ ઉપરાંત, સ્માર્ટફોનથી ઓપરેટ થઈ શકતું ઘોડિયું તેમજ બાયો હેન્ડ જેવા મોડેલ્સ આકર્ષણનું કેન્દ્ર બન્યા હતા. આ ઈવેન્ટમાં સ્ટૂડન્ટ્સે બનાવેલા રોબોટિક્સ મોડેલનું લાઈવ ડેમોન્સ્ટ્રેશન પણ યોજવામાં આવ્યું હતું, જેમાં ફુટબોલ રમતા રોબોટ્સ, ડ્રાઈવરલેસ કારની થીમ પર બનાવેલા રોબોટ્સે પણ આકર્ષણ જમાવ્યું હતું.

આ કાર્યક્રમનું ઉદ્ઘાટન રાજ્ય સરકારના વિજ્ઞાન અને ટેક્નોલોજી વિભાગના સચિવ વિજય નેહરા દ્વારા કરવામાં આવ્યું હતું, જેમાં RHFના પ્રમુખ વિશાલ ચિરિપાલ તેમજ સાયન્સ સિટીના એક્ઝિક્યુટિવ ડિરેક્ટર એચ.સી. મોદી પણ ઉપસ્થિત રહ્યા હતા. આ પ્રસંગે WSRO અને ગુજરાત કાઉન્સિલ ઓફ સાયન્સ સિટી વચ્ચે સમજૂતીકરાર (એમઓયુ) પણ થયા હતા, જેનો આશય રોબોટિક્સ અને STEM-સંબંધિત પ્રવૃત્તિઓ હાથ ધરવાનો છે, જેમાં મુખ્યત્વે અમદાવાદમાં ગુજરાત સાયન્સ સિટી કેમ્પસમાં વર્કશોપ અને કોમ્પિટિશન સામેલ છે.

WSRO championship 2022

આ કાર્યક્રમમાં સમગ્ર દેશમાંથી 80થી વધારે ટીમો, 300થી વધારે સહભાગીઓ, 100 કોચ, 30 સ્ટાર્ટઅપ્સ સહભાગી થયા હતા. લાઇન ફોલોઇંગ ચેન્જ, યંગ સાયન્ટિસ્ટ ચેલેન્જ, ક્વાર્કી પિક એન્ડ પ્લેસ, ચેલેન્જ અને આંતરપ્રિન્યોર ચેલેન્જ જેવા રસપ્રદ મોડ્યુલ્સ – આ કાર્યક્રમનાં મુખ્ય આકર્ષણો હતાં. કાર્યક્રમ દરમિયાન સ્ટાર્ટઅપ એક્ઝિબિશન, રોબોટિક્સ વર્કશોપ અને ટેકનિકલ સત્રોનું આયોજન પણ થયું હતું.

wsro science city ahmedabad

આ ઉદ્ઘાટન પ્રસંગે વિજય નેહરાએ કહ્યું હતું કે, “જે દેશ નોલેજ (જ્ઞાન, જાણકારી)માં રોકાણ કરે છે, તે ભવિષ્યમાં વધુ સંસાધનો સાથે અન્ય દેશોની સરખામણીમાં વધારે પ્રગતિ કરશે. ગુજરાત સરકાર અને વિજ્ઞાન અને ટેકનોલોજી વિભાગનો ઉદ્દેશ રાજ્યમાં વિજ્ઞાન અને STEM શિક્ષણની લોકપ્રિયતા વધારવાનો છે.” તેમણે ઉમેર્યું હતું કે, “સાયન્સ સિટી PM નરેન્દ્ર મોદીનું સ્વપ્ન અને વિઝન છે. અમે આગામી પાંચ વર્ષમાં દુનિયામાં સૌથી મોટું સાયન્સ સેન્ટર બનાવવા રૂ. 2,000 કરોડથી વધારેનો ખર્ચ કરીશું. આગામી પાંચ વર્ષમાં રાજ્યમાં તમામ મોટાં શહેરોમાં આઠ નવા પ્રાદેશિક સાયન્સ સેન્ટર બનશે. આ પ્રકારનું પ્રથમ સેન્ટરનું ઉદ્ઘાટન ગુજરાતના સ્થાપના દિવસે પાટણમાં થશે.”

WhatsApp Image 2022-04-30 at 2.56.34 PM.

રોબોટિક્સ અને સ્ટેમ શિક્ષણના મહત્વ વિશે HRFના પ્રેસિડન્ટ વિશાલ ચિરિપાલે કહ્યું હતું કે, “STEM (સાયન્સ, ટેકનોલોજી, એન્જિનીયરિંગ એન્ડ મેથેમેટિક્સ) અને રોબોટિક્સે આધુનિક દુનિયામાં નોલેજ અને માહિતીના ક્ષેત્રમાં ઘણું મહત્વ ધારણ કર્યું છે. આર્ટિફિશિયલ ઇન્ટેલિજન્સ (એઆઇ), રોબોટિક્સ, મશીન લર્નિંગ અને ઇન્ટરનેટ ઓફ થિંગ્સ (આઇઓટી) જેવી અદ્યતન ટેકનોલોજીઓએ દુનિયાભરમાં STEM શિક્ષણમાં તેની ક્ષિતિજો વિસ્તારી છે.”

Source link