સાણંદમાં ગર્ભવતી બહેન અને બનેવીની હત્યા કરનારા હાર્દિક ચાવડાને ફાંસીની સજા!

 

અમદાવાદ: સાણંદમાં ગર્ભવતી બહેન અને બનેવીની હત્યા કરનારા હાર્દિક ચાવડાને અમદાવાદની લોકલ કોર્ટે ફાંસીની સજા ફટકારી છે. ઉલ્લેખનીય છે કે, લવમેરેજથી નારાજ હાર્દિકે વર્ષ 2018માં પોતાની જ ગર્ભવતી બહેન અને જીજાજીને મોતને ઘાટ ઉતારી દીધા. આ કેસમાં સ્થાનિક કોર્ટે પોતાનો ચુકાદો સંભળાવ્યો છે.

ચાર વર્ષ પહેલા થયેલા હત્યાકાંડમાં ચુકાદો
હાર્દિક ચાવડાએ તેની બહેન તરુણા અને તેના પતિ વિશાલ પરમારને સાણંદમાં તેમના ઘરે જ હત્યા કરી હતી. (વર્ષ 2018 અનુસાર) તરુણા અને વિશાલ છ મહિના પહેલા છારોડી ખાતેના ઘરેથી ભાગી ગયા હતા અને 5 માર્ચના રોજ લગ્ન કર્યા હતા. આ દંપતી ભાગતા હતા અને વિવિધ સ્થળોએ આશ્રય મેળવ્યો હતો, કારણ કે મહિલાનો ભાઈ લગ્નનો વિરોધ કરતો હતો. આ દંપતી ત્રણ દિવસ પહેલા જ સાણંદમાં સ્થાયી થયું હતું અને મજૂરી કરીને ગુજરાન ચલાવતું હતું.

2018માં બની હતી ઘટના
આ દરમિયાન 5 સપ્ટેમ્બર 2018ના રોજ તરુણાના ભાઈ હાર્દિકને ખબર પડી કે તે સાણંદમાં રહે છે અને તે ઘરે દોડી ગયો હતો અને તરુણા અને વિશાલને લગ્ન કેમ કર્યા છે કહીને જીવલેણ હુમલો કર્યો હતો અને ત્યારબાદ તે સ્થળ પરથી ભાગી ગયો હતો. ઘટના બાદ પોલીસે દંપતીના માતા-પિતાના નિવેદનો લીધા હતા, જે અનુસાર તે ઓનર કિલિંગનો કેસ હોવાનું સામે આવ્યું હતું. પોલીસે બંનેની લાશને પોસ્ટમોર્ટમ માટે મોકલી આરોપીને પકડવા ટીમ બનાવી હતી અને બાદમાં તેણે ઝડપી લઈને કોર્ટમાં હાજર કરાયો હતો. જ્યાં તે કેટલાક પુરાવાઓ અને જુબાનીના આધારે દોષી જાહેર થતાં કોર્ટે તેને ફાંસીની સંજા સંભળાવી છે.

ઉલ્લેખનીય છે કે, દેત્રોજના કોઇન્તિયાના તરુણા ચાવડા અને સાણંદના છારોડીના વિશાલ પરમાર પ્રેમલગ્ન કર્યા હતા, જેથી તરુણાનો પરિવાર નારાજ હતો. તરુણા તથા વિશાલ પર હુમલા બાદ ઉતારવામાં આવેલો એક વિડીયો પણ વાયરલ થયો હતો, જેમાં આજુબાજુના લોકો પીડિતોને હોસ્પિટલે લઈ જવાને બદલે મોબાઇલ પર તેમનો વિડીયો ઉતારતા નજરે પડતા હતા.

Source link