શ્રીસંતની નિવૃત્તિઃ થપ્પડથી લઈને સ્પોટ ફિક્સિંગ, વિવાદાસ્પદ રહી છે તેની કારકિર્દી!

 

ભારતીય ઝડપી બોલર શ્રીસંતે ક્રિકેટમાંથી નિવૃત્તિ જાહેર કરી છે. 39 વર્ષીય શ્રીસંતે ડોમેસ્ટિક ક્રિકેટના તમામ ફોર્મેટમાંથી નિવૃત્તિની જાહેરાત કરી છે. તે તાજેતરમાં જ રણજી ટ્રોફી ટુર્નામેન્ટમાં રમ્યો હતો. તેણે કેરળ માટે મેઘાલય સામે એક મેચ રમી હતી. કેરળ રણજી ટ્રોફી ટુર્નામેન્ટમાં ક્વાર્ટર ફાઈનલમાં પહોંચવામાં નિષ્ફળ રહ્યું હતું. મેઘાલય વિરુદ્ધ તેણે પ્રથમ દાવમાં બે વિકેટ ઝડપી હતી જ્યારે બીજા દાવમાં તેને કોઈ સફળતા મળી ન હતી. ભારત માટે રમી ચૂકેલા શ્રીસંતની કારકિર્દી વિવાદોમાં રહી છે.

ઈન્ડિયન પ્રીમિયર લીગની શરૂઆત 2008માં થઈ હતી અને આ પ્રથમ સિઝનમાં જ શ્રીસંતનો વિવાદ ઊભો થયો હતો. આ સિઝનમાં મુંબઈ ઈન્ડિયન્સ અને કિંગ્સ ઈલેવન પંજાબ વચ્ચે મેચ રમાઈ હતી. મેચ પૂરી થયા બાદ કોઈ બાબતને લઈને મુંબઈ માટે રમતા હરભજન સિંહે પંજાબ માટે રમી રહેલા શ્રીસંતને થપ્પડ મારી દીધી હતી.

મેચ પૂરી થયા બાદ બંને ટીમના ખેલાડી એક-બીજાનું અભિવાદન કરી રહ્યા હતા ત્યારે આ ઘટના બની હતી. આ દરમિયાન હરભજને શ્રીસંતને થપ્પડ મારી દીધી હતી. હરભજન સિંહે બાદમાં કહ્યું હતું કે શ્રીસંતના રિએક્શન જોઈને તે પોતાના પર નિયંત્રણ રાખી શક્યો ન હતો અને તેને થપ્પડ મારી દીધી હતી. થપ્પડ કાંડ બાદ હરભજનને આખી સિઝન માટે બેન કરી દેવામાં આવ્યો હતો.

સ્પોટ ફિક્સિંગમાં ફસાયો શ્રીસંત
પ્રતિભાશાળી ઝડપી બોલરના જીવનનો સૌથી ખરાબ સમય આઈપીએલની છઠ્ઠી સિઝનમાં આવ્યો હતો. આઈપીએલની છઠ્ઠી સિઝનમાં તેમની સામે સ્પોટ ફિક્સિંગ જેવા ગંભીર આરોપ લાગ્યા હતા અને ત્યારબાદ તેને ભારતીય ક્રિકેટ કંટ્રોલ બોર્ડ તરફથી આજીવન પ્રતિબંધનો સામનો કરવો પડ્યો. ત્યારે શ્રીસંત રાજસ્થાન રોયલ્સ માટે રમી રહ્યો હતો અને આ સ્પોટ ફિક્સિંગ વિવાદમાં અજીત ચંદેલા અને અકિંત ચવ્હાણનું નામ પણ સામે આવ્યું હતું. તેમને થોડા દિવસ જેલમાં પણ રહેવું પડ્યું હતું. સુપ્રીમ કોર્ટે બોર્ડને ખેલાડીઓ પર લગાવવામાં આવેલા પ્રતિબંધ અંગે ફેરવિચાર કરવાનો આદેશ આપ્યો હતો. બોર્ડે ત્યારે શ્રીસંત પર સાત વર્ષનો પ્રતિબંધ લગાવ્યો હતો.

આ બે મોટા વિવાદો ઉપરાંત શ્રીસંતના નામે અન્ય કેટલાક વિવાદો પણ છે. કેરળ ક્રિકેટ એસોસિયેશને પણ શ્રીસંતને કોડ ઓફ કન્ડક્ટનું પાલન ન કરવાના કારણે એક વખત વોર્નિંગ આપી હતી. ત્યારે તે કન્નૂરમાં યોજાયેલા કેરળ ક્રિકેટ કેમ્પમાં સામેલ થયો ન હતો. આ ઉપરાંત પણ ઘણી વખત મેચ બાદ મેચ રેફરી અને અમ્પાયર તરફથી તેને વોર્નિંગ મળી છે. 13 સપ્ટેમ્બર 2020ના રોજ તેનો પ્રતિબંધ સમાપ્ત થયો હતો અને તે સતત કેરળ તરફથી ડોમેસ્ટિક ક્રિકેટમાં પોતાનો હાથ અજમાવતો રહ્યો હતો. શ્રીસંતે યુવાન ખેલાડીઓને તક આપવા માટે ડોમેસ્ટિક ક્રિકેટમાંથી નિવૃત્તિ લેવાની જાહેરાત કરી છે.

6 ફેબ્રુઆરી 1983ના રોજ જન્મેલો શ્રીસંત ભારતીય ક્રિકેટ ટીમ ઉપરાંત કેરળ, કિંગ્સ ઈલેવન પંજાબ, રાજસ્થાન રોયલ્સ, કોચી ટસ્કર્સ કેરળ માટે રમ્યો છે. ભારત માટે તેણે 27 ટેસ્ટ મેચ રમી છે જેમાં તેણે 37.59ની સરેરાશ સાથે 87 વિકેટ ઝડપી હતી. જ્યારે 53 વન-ડેમાં તેણે 75 વિકેટ ઝડપી હતી. તે 10 ટી20 મેચ પણ રમ્યો છે જેમાં તેના નામે સાત વિકેટ છે. શ્રીસંત 2007માં ટી20 વર્લ્ડ કપ અને 2011ની વન-ડે વર્લ્ડ કપ વિજેતા ભારતીય ટીમનો ભાગ રહ્યો છે. તેણે 74 ફર્સ્ટ ક્લાસ મેચમાં 213 વિકેટ ઝડપી છે.

Source link