વાવના કોંગી MLA ગેનીબેન ઠાકોરની ‘જનતા રેડ’, રાત્રે 3 વાગ્યે દારૂ લઈને જતી ગાડી પકડી!

 

પાલનપુર: દારૂબંધી હોવા છતાંય ગુજરાતમાં દારૂ ઘૂસાડવામાં આવે છે અને તેનું બેફામ વેચાણ પણ થઈ રહ્યું છે. આ દરમિયાન વાવના કોંગી ધારાસભ્ય ગેનીબેન ઠાકોરે આક્રમક બન્યા છે. તેમણે રાતે 3 વાગ્યે જનતા રેડ કરીને ભાભરથી કોતરવાડાની નર્મદા કેનાલ પાસે દારૂ લઈને જતાં બૂટલેગરની ઝડપી પાડ્યો હતો અને બૂટલેગર તેમજ ગૃહવિભાગ સામે રોષ ઠાલવ્યો હતો. ઉલ્લેખનીય છે કે, 15 માર્ચના રોજ વિધાનસભામાં બૂટલેગરોનાં નામ જાહેર કર્યાં બાદ હવે ધારાસભ્ય ગેનીબેન ઠાકોરે ખુદ બૂટલેગરને ઉઘાડા પાડવાની શરૂઆત કરી હોય તેમ લાગી રહ્યું છે.

આ અંગે ગેનીબેન ઠાકોરે જણાવ્યું કે, નર્મદા કેનાલની નજીક જનતા રેડ કરીને દારૂ પકડવામા આવ્યો છે. 15 માર્ચના રોજ વિધાનસભા ગૃહમાં ગૃહવિભાગની માંગણીઓ ઉપર બનાસકાંઠા જે દારૂ ઘૂસાડવામાં આવે છે અને બૂટલેગરો બેફામ દારૂનો ધંધો કરીને યુવાનોને બરબાદ કરી રહ્યા છે. વિધાનસભા ગૃહમાં મેં જે કહ્યું હતું અને ગુજરાતના ગૃહમંત્રીએ ખાતરી આપી હતી કે, પગલાં લઈશું. વિધાનસભાનું લાઈવ પ્રસારણ હોય, બનાસકાંઠા પોલીસને પણ સમાચાર મળ્યા હોય તેમ છતાંય એની અવગણના કરીને એની કોઈ ગંભીરતા લીધી નથી. વિધાનસભા ગૃહમાં ચર્ચા થયા પછી પણ પોલીસની રહેમ નજરથી બૂટલેગરો બનાસકાંઠામાં દારૂ ઘૂસાડવાનો પ્રયાસ કરે છે. રાજ્યના ગૃહમંત્રીને વિનંતી કરૂં છું કે, તમારા રાજમાં બૂટલેગરો બેફામ થયા છે, તેના પર તમે નિયંત્રણ લાવો.

ગેનીબેને વધુમાં કહ્યું કે, ગુજરાત સરકાર, ગૃહમંત્રી અને બનાસકાંઠા પોલીસને મારી માંગણી છે કે, આના માટે કાર્યવાહી થવી જોઈએ. અપેક્ષા રાખું છું કે, આવા બૂટલેગરોને જેલને હવાલે કરીને એક દાખલો બેસાડો તો ચાલુ વિધાનસભા ગૃહમાં અમે તમને અભિનંદન આપશું.

દારૂનો જથ્થો લઈને જતા બૂટલેગરને પૂછતાં તેણે જણાવ્યું કે, સાંચોરથી દારૂની ગાડી ભરી હતી અને વિનોદ સિંધી નામના બૂટલેગર માટે જથ્થો લાવવામાં આવ્યો હતો. તેના જણાવ્યા અનુસાર કેનાલ પાસે દારૂનો જથ્થો ઉતારવા માટે કહેવામાં આવ્યું હતું.

Source link