વડોદરાની 16 વર્ષની ડિંકલના ડાબા પગમાં અકસ્માત બાદ ખોડ રહી ગઈ પણ તે હિંમત હારી નહીં અને કિકબોક્સર બની!

 

વડોદરાઃ બાળપણમાં તેના કેટલાક મિત્રો તેને ચીડવતા હતા, કારણ કે જ્યારે તે ત્રણ વર્ષની હતી ત્યારે થયેલા અકસ્માતમાં તેના પગમાં ખોડ રહી ગઈ હતી. પણ હવે તેને કોઈ ચીડાવવાની હિંમત કરતું નથી. ડિંકલ ગોરખાને હવે ‘ડિંકુ બોક્સર’ નામ મળ્યું છે. અકસ્માતના લીધે 16 વર્ષની છોકરી ડિંકલને ડાબા પગમાં ખામી થઈ હતી, જે હવે કિકબોક્સિંગ ચેમ્પિયન છે. મહત્વની વાત એ છે કે ડિંકલની માતાએ હાલમાં બૂટલેગર તરીકેના ધંધાને છોડી દીધો છે, તેઓ હવે પોતાની દીકરી બોક્સિંગમાં વધારે આગળ વધે તેના પર ધ્યાન કેન્દ્રીત કરી રહ્યા છે.

અમારા સહયોગી ટાઈમ્સ ઓફ ઈન્ડિયા સાથે ડિંકલે કરેલી વાચચીતમાં જણાવ્યું છે કે, “જ્યારે નાનપણમાં મારી ઉંમરના બાળકો પગની ખોડના કારણે મને ખીજવતા હતા તો મને બહુ શરમ આવતી હતી. હું એવું સાબિત કરવા માગતી હતી કે હું બીજા લોકોની જેમ જ શારીરિક રીતે સક્ષમ છું. જયારે હું 9 વર્ષની હતી ત્યારે મેં મેરી કોમ ફિલ્મ જોઈ હતી અને તેમાંથી મને ઘણી પ્રેરણા મળી હતી. તેમણે બોક્સિંગની રમત માટે જે સંઘર્ષ કર્યો હતો તેનાથી મારો જુસ્સો વધ્યો હતો.”

ડિંકલે ચાર વર્ષ પહેલા બોક્સિંગની ટ્રેનિંગ લેવાનું શરુ કર્યું હતું. તેણે ટ્રેનિંગના શરુઆતના દિવસોને યાદ કરીને વધુમાં જણાવ્યું કે, “મારા પગમાં ખામી હોવાના કારણે મને કિકબોક્સિંગ ના કરવા માટે ઘણી સલાહો મળી હતી. પરંતુ હું તે તમામ લોકોને ખોટા સાબિત કરવા માગતી હતી. થોડા મહિનાઓ પછી મને પગમાં પ્રક્ટિસના કારણે ઘણો દુખાવો રહેતો હતો.”

વધુમાં ડિંકુ બોક્સર જણાવે છે કે, “શરુઆતમાં બધુ ઘણું જ પીડાદાયક હતું પરંતુ હું મારા ડાબા પગને કિકબોક્સિંગ માટે વધારે મજબૂત બનાવવા પ્રયત્નો કરતી રહી હતી. મને કિકબોક્સિંગમાં યલો બેલ્ટ મળ્યો અને હાલ હું મારા કોચ સિદ્ધાર્થ ભાલેગરની ટ્રેનિંગ હેઠળ રાજ્ય કક્ષાની ખેલ મહાકુંભ સ્પર્ધા માટે તૈયારી કરી રહી છું.”

આ ઘાતક છોકરીને ચેમ્પિયનશિપ સુધી પહોંચવા માટે તેની માતાનો ધંધો અડચણરુપ બનતો હતો. વર્ષ 2009માં થયેલા અકસ્માતમાં તેની માતાએ બન્ને પગ ગુમાવ્યા હતા અને ડિંકલના પગમાં ખોડ રહી ગઈ હતી. તેણે દુઃખ વ્યક્ત કરતા જણાવ્યું કે, “મારી મમ્મી રૂપિયા કમાવવા માટે બૂટલેગર બની હતી, પરંતુ લોકો ઘણી વખત હું મારા બોક્સિંગના ઉત્સાહ અંગે વાત કરું ત્યારે મજાક ઉડાવતા હતા. મારી માતાએ બૂટલેગિંગનો ધંધો છોડ્યો પણ એ પછી અમે પુરતા પ્રમાણમાં રૂપિયા કમાવવા માટે સક્ષમ નહોતા.”

ડિંકલ માટે બોક્સિંગના સાધનો ખરીદવા અને કોચિંગ કરવું ઘણું જ મુશ્કેલીભર્યું હતું. ડિંકલની મોટી બહેન ખુશી જણાવે છે કે, “ડિંકલ મજબૂત છોકરી છે અને તેનાથી મને પણ પ્રેરણા મળી છે કારણ કે ક્યારેય તે પોતાના ખોડવાળા પગને પોતાનું સપનું સાકાર કરવા માટે અડચણરુપ બનાવા દેતી નથી.”

Source link