રાજકોટ PGVCLની બેદરકારી! 1-BHK ફ્લેટમાં રહેતા વ્યક્તિને મોકલ્યું 10.41 લાખનું બિલ

 

રાજકોટ: રાજકોટમાં પીજીવીસીએલ કંપનીએ 1 BHK ફ્લેટ ધારકને 10.41 લાખથી વધુનું બિલ ફટકારતા વિવાદ ઉભો થયો છે. મીડિયા રિપોર્ટ અનુસાર રેસકોર્સ પાર્કમાં રહેતા જયંતભાઈ વાડોદરિયાને 10.41 લાખનું બિલ આવ્યું હતું. મસમોટું બિલ આવતા મધ્યમવર્ગીય પરિવાર ચિંતામાં આવી ગયો હતો. પીજીવીસીએલનું આ બિલ સોશિયલ મીડિયા ઉપર પણ વાયરલ થયું છે, જેમાં બિલ ચૂકવવાની છેલ્લી તારીખ 15 માર્ચ હોવાનું જાણવા મળ્યું છે.

સામાન્ય રીતે દર બે મહિને બે હજાર જેટલું બિલ આવતું હતું અને અચાનક….
પ્રાપ્ત અહેવાલો અનુસાર રાજકોટના બેડીનાકા સબ ડિવિઝન હેઠળ રેસકોર્સ પાર્ક ફ્લેટ આવેલા છે. જેમાં વીજગ્રાહક જયંતભાઈ વાડોદરિયાના ઘરે તારીખ 5 માર્ચને શનિવારે પીજીવીસીએલના જ કર્મચારી મીટર રીડિંગ કરવા આવ્યા હતા. આ દરમિયાન કર્મચારીએ જાન્યુઆરી-ફેબ્રુઆરીનું વીજબિલ આપ્યું હતું. ગ્રાહકે જ્યારે બિલની રકમ જોઈ ત્યારે તેમના પગ નીચેથી જમીન સરકી ગઈ હતી. કારણ કે, સામાન્ય રીતે દર બે મહિને બે હજાર જેટલું બિલ આવતું હતું પરંતુ અહીં તેમને PGVCL દ્વારા 10.41 લાખનું બિલ અપાયું હતું. જેથી પરિવાર મુંઝવણમાં મુકાઈ ગયો હતો.

10.41 લાખ રૂપિયાનું બિલ ભરવાની છેલ્લી તારીખ 15 માર્ચ
ઉલ્લેખનીય છે કે, પશ્ચિમ ગુજરાત વીજકંપનીએ તાજેતરમાં જ ગેરરીતિ આચરી કૌભાંડો કરતા અને મીટર રીડિંગ પેન્ડિંગ રાખી દેતા એજન્સીનો કોન્ટ્રાક્ટ રદ કરી દીધો છે અને હવે વીજકંપનીના જ માણસો મીટર રીડિંગ કરી રહ્યા છે પરંતુ પીજીવીસીએલના કર્મચારીએ પણ બિલિંગમાં લોચો મારતા શહેરના રેસકોર્સ પાર્કમાં 1 બીએચકેના ફ્લેટમાં રહેતા વીજગ્રાહકને 10.41 લાખનું વીજબિલ ફટકારી દેતા વીજગ્રાહક સહિત સૌ આશ્ચર્યચકિત થઈ ગયા છે. સમગ્ર મામલે તપાસ કરવામાં આવી રહી છે, કે સામાન્ય રીતે દર બે મહિને જે 2000-3000 બિલ આવતું હતું તેની સામે 10 લાખથી પણ વધુનુ બિલ કેવી રીતે આવી ગયું.

Source link