યુક્રેનમાં ભારતીય યુવાનોને ત્રિરંગાની તાકાતનો અનુભવ થઈ ગયોઃ PM મોદી

વડાપ્રધાન નરેન્દ્ર મોદી હાલમાં ગુજરાતની મુલાકાતે છે અને આ દરમિયાન શનિવારે તેમણે અમદાવાદના સરદાર પટેલ સ્ટેડિયમમાં ખેલ મહાકુંભ-2022નો પ્રારંભ કરાવ્યો હતો. આ પ્રસંગે તેમણે કહ્યું હતું કે આજે ગુજરાત અને દેશના ખેલાડીઓ વૈશ્વિક સ્તરે શ્રેષ્ઠ પ્રદર્શન કરીને ભારતને ગૌરવ અપાવી રહ્યા છે. આ કાર્યક્રમમાં તેમણે રશિયા અને યુક્રેન વચ્ચેના યુદ્ધમાં ફસાયેલા ભારતીય વિદ્યાર્થીઓને યાદ કર્યા.

 

હાઈલાઈટ્સ:

  • વડાપ્રધાન નરેન્દ્ર મોદીએ અમદાવાદમાં ખેલ મહાકુંભનો પ્રારંભ કરાવ્યો
  • આ પ્રસંગે વડાપ્રધાને યુક્રેનથી પરત આવેલા ભારતીય વિદ્યાર્થીઓનો અનુભવ શેર કર્યો
  • રશિયાએ યુક્રેન પર હુમલો કરતા હજારો ભારતીય વિદ્યાર્થીઓ ત્યાં ફસાઈ ગયા હતા
વડાપ્રધાન નરેન્દ્ર મોદી હાલમાં ગુજરાતની મુલાકાતે છે અને આ દરમિયાન શનિવારે તેમણે અમદાવાદના સરદાર પટેલ સ્ટેડિયમમાં ખેલ મહાકુંભ-2022નો પ્રારંભ કરાવ્યો હતો. આ પ્રસંગે તેમણે કહ્યું હતું કે આજે ગુજરાત અને દેશના ખેલાડીઓ વૈશ્વિક સ્તરે શ્રેષ્ઠ પ્રદર્શન કરીને ભારતને ગૌરવ અપાવી રહ્યા છે. આ કાર્યક્રમમાં તેમણે રશિયા અને યુક્રેન વચ્ચેના યુદ્ધમાં ફસાયેલા ભારતીય વિદ્યાર્થીઓને યાદ કરીને કહ્યું હતું કે તે લોકોને અનુભવ થઈ ગયો છે કે ભારતીય ત્રિરંગાની આન, બાન અને શાન શું છે.

તેમણે કહ્યું હતું કે યુક્રેનથી જે યુવાનો પાછા આવ્યા છે, યુદ્ધના મેદાનમાંથી આવ્યા છે, દારૂગોળાની વચ્ચેથી આવ્યા છે. આવીને તેમણે કહ્યું કે આજે ત્રિરંગાની આન, બાન અને શાન શું છે તે અમે યુક્રેનમાં અનુભવ્યું છે. નોંધનીય છે કે રશિયાએ યુક્રેન પર હુમલો કર્યો છે. જેના કારણે ત્યાં અભ્યાસ માટે ગયેલા હજારો ભારતીય વિદ્યાર્થીઓ ફસાઈ ગયા હતા. ભારતીય વિદેશ મંત્રાલયે પોતાની ગાઈડલાઈનમાં કહ્યું હતું કે ભારતીય યુવાનો પોતાની બેગ પર ત્રિરંગો લગાવી રાખે જેથી કરીને તેમને ત્યાંથી નીકળવામાં સરળતા રહેશે.

આ ઉપરાંત વડાપ્રધાન મોદીએ કહ્યું હતું કે, હું એક બીજા દ્રશ્ય તરફ તમને લઈ જવા ઈચ્છું છું, જ્યારે આપણા ખેલાડીઓ મેડલ મેળવીને પોડિયમ પર ઊભા રહેતા હતા અને ત્રિરંગો લહેરાતો હતો અને રાષ્ટ્રગાન ગવાતું હતું ત્યારે આપણા દેશના ખેલાડીઓની આંખોમાંથી ગૌરવ અને ખુશીના આંસુ છલકતા હોય છે. આ છે દેશભક્તિ. ભારત જેવા યુવા દેશને દિશા આપવામાં તમારા જેવા યુવાનોની મોટી ભૂમિકા છે.
નોંધનીય છે કે હાલમાં રશિયા અને યુક્રેન વચ્ચે યુદ્ધ ચાલી રહ્યું છે. રશિયન સૈન્ય યુક્રેન પર સતત આક્રમણ કરી રહ્યું છે પરંતુ સામે છેડે યુક્રેનના સૈનિકોની સાથે સાથે નાગરિકો પણ રશિયન સૈન્યને પડકાર આપી રહ્યા છે. બંને દેશો વચ્ચે શાંતિ માટે વાતચીત પણ થઈ હતી પરંતુ હજી સુધી તેનું કોઈ જ પરિણામ દેખાતું નથી. હાલ તો યુદ્ધ ચાલી રહ્યું છે અને તેનો ક્યારે અંત આવશે તે કહી શકાય તેમ નથી.

Source link