મૂવી રિવ્યૂ: Attack

 

એક્ટર– જોન અબ્રાહમ, રકુલ પ્રીત સિંહ, પ્રકાશ રાજ, રત્ના પાઠક શાહ, કિરણ કુમાર, જેક્લીન ફર્નાન્ડિઝ
ડાયરેક્ટર– લક્ષ્ય રાજ આનંદ
શ્રેણી– હિન્દી, સાય-ફાઈ, એક્શન
સમય– 2 કલાક 3 મિનિટ
રેટિંગ– 3.5/5

‘સર્જિકલ સ્ટ્રાઈક અને એરસ્ટ્રાઈકથી કંઈ બદલાયું નથી. હવે જડબાતોડ જવાબ આપવાનો નહીં જડબું તોડવાનો સમય છે….’ ફરી એકવાર દુશ્મન દેશે ભારત પર હુમલો કર્યો છે. આ વખતે ભારતે દુશ્મનોને ધૂળ ચડાવા માટે નવી ટેક્નિક આર્ટિફિશિયલ ઈન્ટેલિજન્સની મદદ લીધી છે. વિજ્ઞાનના આ ચમત્કારને નિર્દેશનના ક્ષેત્રમાં ડેબ્યૂ કરવા જઈ પહેલા લક્ષ્ય રાજ આનંદે 2 કલાક 3 મિનિટ અને 13 સેકંડની ફિલ્મ ‘અટેક’ (Attack) પરોવ્યો છે. ફિલ્મમાં જોન અબ્રાહમ, રકુલ પ્રીત સિંહ, પ્રકાશ રાજ, રત્ના પાઠક શાહ, કિરણ કુમાર અને જેક્લીન ફર્નાન્ડિઝ જેવા કલાકારો છે. જે તમને સુપરસોલ્જર્સની કહાણી જણાવે છે.

 

વાર્તા

‘અટેક’ની શરૂઆત આતંકવાદીઓના અડ્ડા પર ઈન્ડિયન આર્મી સ્ટ્રાઈક કરે છે તેનાથી થાય છે. આર્મી ઓફિસર અર્જુન શેરગિલ (જોન અબ્રાહમ) ખૂંખાર આતંકવાદીને પકડવામાં સફળ થાય છે. અર્જુન મિશન પૂરું કરીને લાંબા સમય બાદ ઘરે રજાઓ ગાળવા જાય છે. ફ્લાઈટમાં તેની મુલાકાત એર હોસ્ટેસ આયશા (જેક્લીન ફર્નાન્ડિઝ) સાથે થાય છે. બંને એકબીજાના પ્રેમમાં પડે છે અને વાત જીવનસાથી બનવા સુધી પહોંચી જાય છે. પરંતુ દેશના સૌથી વ્યસ્ત એરપોર્ટ પર આતંકી હુમલો થતાં બંનેની જિંદગીમાં તોફાન આવે છે. આ આતંકી હુમલાના કારણે અર્જુનની જિંદગી પલટાઈ જાય છે. તેનો પ્રેમ વિખૂટો પડી જાય છે અને અર્જુનની લાઈફ નવા ટ્રેક પર ચાલવા માંડે છે. બીજી તરફ આરડીઓ (ફિલ્મમાં DRDOનો ઉલ્લેખ આ સાંકેતિક નામ દ્વારા કરવામાં આવ્યો છે)ની વૈજ્ઞાનિક જિયા (રકુલ પ્રીત સિંહ)એ આર્ટિફિશિયલ ઈન્ટેલિજન્સ રોબોટ બનાવ્યો છે જે ચીપના રૂપમાં છે. આ ટેક્નિકની મદદથી એક સોલ્જર કેટલીય બટાલિયન તરીકે લડત આપી શકે છે. આ એક સિમકાર્ડ જેવું છે. આ આર્ટિફિશિયલ ઈન્ટેલિજન્સ ચીપની મદદથી વૈજ્ઞાનિકો અર્જુનને સુપર સોલ્જર બનાવે છે. જે કેટલાક અંશે આયરમેનના ‘જાર્વિસ’ જેવો AI આસિસ્ટન્ટ છે. ફિલ્મમાં જોનની એઆઈ આસિસ્ટન્ટનું નામ ઈરા છે અને તેનો હાજરજવાબી સ્વભાવ ઘણીવાર હસાવી પણ જાય છે. ફિલ્મમાં અર્જુન અને ઈરાનો મુકાબલો દુનિયાના સૌથી મોટા આતંકી સરગાના સાથે થાય છે, જે ભારતની સંસદ પર હુમલો કરે છે અને દેશના વડાપ્રધાન સહિત 300થી વધુ સાંસદોને બંધક બનાવી લે છે. ફિલ્મમાં તમે જોશો કે અર્જુન નવી ટેક્નિકની મદદથી દેશને આતંકવાદીઓથી બચાવે છે.

અભિનય

જોન અબ્રાહમ અત્યાર સુધીમાં કેટલીય એક્શન ફિલ્મોમાં કામ કર્યું છે. તે આ જોનરની ફિલ્મોમાં નિષ્ણાત બની ગયો છે. પહેલીવાર તે સુપર સોલ્જરના રોલમાં જોવા મળી રહ્યો છે. જોન અબ્રાહમે દમદાર એક્શન, ફાઈટ સીન અને બાઈકવાળા દ્રશ્યોથી પૈસા વસૂલ ફિલ્મ બનાવી છે. સાયન્ટિસ્ટના રોલમાં રકુલ પ્રીત સિંહ પણ ઠીક ઠીક જામે છે. ફિલ્મમાં જોનની પ્રેમિકાના રૂપે જેક્લિન યોગ્ય નથી લાગતી. બંનેના રોમેન્ટિક સીન રમૂજી લાગે છે. પ્રકાશ રાજ જેવા દિગ્ગજ અભિનેતાએ પોતાનું કામ ઈમાનદારીથી કર્યું છે.

નિર્દેશન અને લેખન

આ ફિલ્મનું નિર્દેશન લક્ષ્ય આનંદ રાજે કર્યું છે. લક્ષ્ય આનંદ રાજે સલમાન ખાનની ‘એક થા ટાઈગર’ અને ઋતિક રોશનની ‘બેંગ બેંગ’ જેવી ફિલ્મોમાં આસિસ્ટન્ટ ડાયરેક્ટર તરીકે કામ કર્યું છે. નિર્દેશનની બાબતે લક્ષ્ય સફળ થાય છે. તેણે અપેક્ષા કરતાં સારું કામ કર્યું છે. ‘લવ શવ તે ચિકન ખુરાના’ જેવી ફિલ્મ લખનારા સુમિત બેથજા અને ‘છોરી’ના રાઈટર વિશાલ કપૂરે સાથે મળીને ‘અટેક’નું લેખન કર્યું છે. ફિલ્મમાં ઘણી જગ્યાએ સારા પંચ આવે છે જે દર્શકોને ખૂબ હસાવે છે. એઆઈ આસિસ્ટન્ટ ઈરા માટે લખવામાં આવેલા ભાગની પ્રશંસા ચોક્કસથી કરવી જોઈએ. ઈરાના દરેક ડાયલોગ દર્શકોને હસાવશે. ડાયરેક્ટરે જબરદસ્તી રોમાન્સ ના ઘૂસાડ્યો હોત તો ફિલ્મ વધુ સારી બની શકી હોત.

ટેક્નિકલ પક્ષ

‘અટેક’ સાય-ફાઈ ફિલ્મ છે તેમ છતાં ઘણી જગ્યાએ સાયન્ટિફિક ટેમ્પરામેન્ટની કમી દેખાય છે. ફિલ્માં એકલદોકલ દ્રશ્યો એવા પણ છે જેની સાથે નિર્દેશક ન્યાય નથી કરી શક્યા. કેટલાક સીનમાં બેકગ્રાઉન્ડ સ્કોર મેળ નથી ખાતો જેના કારણે સાયન્ટિફિક મિજાજ નબળો પડી જાય છે. સંગીતની વાત કરીએ તો શાશ્વત સહદેવે ‘અટેક’નું મ્યૂઝિક આપ્યું છે. સંવાદથી લઈને એક્શન સીન ખૂબ સારા છે અને એડિટિંગ પણ વખાણવાલાયક છે. એકદંરે ફિલ્મ નિરાશ નહીં કરે.

કેમ જોવી ‘અટેક’?

આ ફિલ્મ વિજ્ઞાનના ચમત્કાર પર આધારિત છે. ફિલ્મમાં એક ડાયલોગ છે કે, ‘આ નવા હિન્દુસ્તાનની સેના છે’, જે ફિલ્મના સારને સમજાવવાની કોશિશ કરે છે. શરૂઆતમાં તમને લાગશે કે ધડમાથા વિનાની વાર્તા છે પરંતુ ટેક્નિક એક-એક સીનને એવી રીતે જોડે છે દર્શકોનો રસ જળવાઈ રહે છે. જો તમે એલેક્સા કે ગૂગલ આસિસ્ટન્ટનો ઉપયોગ કરતા હશો તો થોડું હકીકતની નજીક જેવું લાગશે. કોઈપણ અપેક્ષા રાખ્યા વિના ફિલ્મ જોશો તો સરેરાશ કરતાં સારી લાગશે પરંતુ લોજિક શોધવા જશો તો ફિલ્મના એક્શનની મજા નહીં માણી શકો.

ક્યાં ખામી રહી?

‘અટેક’ની મૂળ વાર્તા માર્વેલ સિનેમેટિક યુનિવર્સના સૌથી લોકપ્રિય પાત્ર આયરનમેનથી પ્રેરિત લાગે છે. આયરમેન અને ‘અટેક’ની તુલના ના થાય તે જ યોગ્ય છે. કારણકે ડાયરેક્ટરે ફિલ્મ ભારતીય મસાલા પીરસી છે. ફિલ્મની કાસ્ટિંગ સુધારી શકાઈ હોત. ફિલ્મમાં જબરદસ્તી ઘૂસાડેલો કિસિંગ સીન પણ નડતરરૂપ લાગે છે.

Source link