માતાના પગ નીચે દબાઈ જતાં 40 દિવસનો પુત્ર મોતને ભેટ્યો, પરિવારમાં આક્રંદ

 

રાજકોટ: રાજકોટમાં માતા-પિતા માટે લાલબત્તી સમાન ઘટના સામે આવી છે. પ્રાપ્ત માહિતી અનુસાર પગ નીચે દબાઈ જતાં 40 દિવસનો પુત્ર મોતને ભેટ્યો હોવાથી માતા જ વ્હાલસોયા પુત્રના મોતનું કારણ બની ગઈ. બનાવને પગલે આખા પરિવારમાં આક્રંદ ફેલાયો છે. પુત્રના જન્મ બાદ જે ઘરમાં ખુશીઓનો માહોલ હતો ત્યાં હવે શોકનું મોજું ફરી વળ્યું છે. બનાવની જાણ થતાં પોલીસ દ્વારા આગળની કાર્યવાહી હાથ ધરવામાં આવી હોવાનું જાણવા મળ્યું છે.

શરદીની દવા લઈને સૂૂઈ ગઈ હતી માતા
મીડિયા રિપોર્ટ અનુસાર કોઠારિયા રોડ પરના નીલકંઠ પાર્કમાં રહેતા પરિવારમાં ચાલીસ દિવસનો માસૂમ વેદ માતાના પગ નીચે દબાઇ જતાં ગૂંગળાઇ ગયો હતો, જેથી તેને તાત્કાલિક હોસ્પિટલ ખસેડાયો હતો. પરંતુ ત્યાં સુધી તેનું મોત થઈ ચૂક્યું હતું. સૂત્રો પાસેથી પ્રાપ્ત માહિતી અનુસાર પૂઠા બનાવવાનું કારખાનું ધરાવતાં રવિ જાનિયાણીની પત્ની કાજલને બે દિવસથી શરદી હતી. પુત્રને પણ ઈન્ફેક્શન ન લાગે માટે પુત્રને પડખાથી નીચે બાજુમાં સૂવડાવ્યો હતો અને પોતે શરદીની દવા પીને સૂઈ ગઈ હતી.

40 દિવસના પુત્રનું મોત થતાં પરિવારમાં શોક
આ દરમિયાન રવિવારે વહેલી સવારે પતિ જાગ્યો ત્યારે પત્ની પાસે સૂતેલા પુત્રની સ્થિતિ જોઈને તે સ્તબ્ધ થઈ ગયો હતો. પતિએ જોયું કે, પુત્ર વેદ તેની માતા કાજલબેનના પગ નીચે દબાયેલો હતો. જેથી તેણે તાત્કાલિક પત્નીને ઉઠાડી પુત્રે વેદને બહાર કાઢ્યો હતો અને જોયું તે બેભાન થઈ ગયો હતો. પરિવારે તાત્કાલિક સારવાર માટે હોસ્પિટલ દોડી ગયા હતા જ્યાં ફરજ પર હાજર ડોક્ટરોએ તેને મૃત જાહેર કરતા પરિવારમાં શોકનો માહોલ ફેલાયો છે.

Source link