મહેસાણા-ઊંઝા હાઈવે પર બની રહેલો બ્રિજ બેસી જતાં કોન્ટ્રાક્ટરની પોલ ખૂલી!

 

મહેસાણાઃ મહેસાણા-ઉંઝા હાઈવે પર આપેલી રૂપેણ નદી પર એક નવો બ્રિજ બની રહ્યો છે. આ બ્રિજનો કેટલોક ભાગ બેસી જતા કોન્ટ્રાક્ટરની (Mehesana News) પોલ સામે આવી છે. મહેસાણા-ઉંઝા હાઈવે પર આવેલા સોનેરીપુરા પાટીયા પાસે રૂપેણ નદી પર રણજિત બિલ્ડકોન કંપની દ્વારા આ બ્રિજનું નિર્માણ કરવામાં આવી રહ્યું છે. નિર્માણધીન બ્રિજનો કેટલોક ભાગ બેસી જતાં (Bridge collapsed) કંપની સામે અનેક સવાલો ઉભા થયા છે. મહત્વની વાત એ છે કે, અમદાવાદમાં બની રહેલાં બ્રિજનો કોન્ટ્રાક્ટ પણ આ જ કંપનીને આપવામાં આવ્યો હતો. અમદાવાદમાં પણ બ્રિજ તૂટી પડ્યો હતો. ત્યારે કંપની સામે હલકી ગુણવત્તાની સામગ્રીનો ઉપયોગ કરવામાં આવ્યો હોવાનો આક્ષેપ પણ થઈ રહ્યો છે.

પ્રાપ્ત રિપોર્ટ મુજબ, મહેસાણા ઉંઝા હાઈવે પર આવેલા સોનેરીપુરા પાટિયા પાસે રણજિત બિલ્ડકોન કંપની આ બ્રિજ બનાવી રહી છે. ત્યારે આજે નવનિર્માણ બ્રિજનો કેટલોક ભાગ બેસી જતા કંપનીની કામગીરી પર અનેક સવાલો થઈ રહ્યા છે. રણજિત બિલ્ડકોન દ્વારા અમદાવાદમાં પણ બ્રિજ બનાવવાની કામગરી ચાલી રહી હતી અને ત્યારે પણ બ્રિજનો કેટલોક ભાગ બેસી ગયો હતો. એટલું જ નહીં રાજકોટમાં પણ રણજિત બિલ્ડકોન કંપની વિવાદમાં સપડાઈ ચૂકી છે. રણજિત બિલ્ડકોન કંપની દ્વારા બ્રિજ બનાવવાનો રેકોર્ડ એકદમ નકારાત્મક હોવા છતા પણ તેને આ બ્રિજ બનાવવા માટે કોન્ટ્રાક્ટ આપવામાં આવ્યો હતો. ત્યારે આ મુદ્દે તપાસ થયા એવી લોકમાંગ પણ ઉઠવા પામી છે.

આ બ્રિજમાં મોટા પાયે ભ્રષ્ટાચાર થયો હોવાનો આક્ષેપ પણ લાગ્યો છે. રણજિત બિલ્ડકોન દ્વારા અમદાવાદના બોપલ રિંગ રોડ પર બનાવવામાં આવેલો બ્રિજ પણ થોડા સમય પહેલાં બેસી ગયો હતો. જો કે, એ સમયે મોડી રાત્રિ હોવાથી કોઈ જાનહાનિ થઈ નહોતી. ત્યારે ફરી એકવાર રણજિત બિલ્ડકોન કંપની વિવાદમાં સપડાઈ છે. બ્રિજ બેસી જવાની ઘટના બાદ કોંગ્રેસ દ્વારા પણ સરકાર પાસે જવાબ માંગવામાં આવ્યો છે. કોંગ્રેસે આ કોન્ટ્રાક્ટ મેળવનારી રણજિત બિલ્ડકોન કંપની સામે તપાસની માંગ કરી છે. કોંગ્રેસના પ્રવક્તા મનિષ દોશીએ જણાવ્યું કે, અમદાવાદમાં પણ આ કંપની દ્વારા બ્રિજ બનાવવામાં આવી રહ્યો હતો. એ સમયે પણ બ્રિજનો કેટલોક ભાગ તૂટી પડ્યો હતો. જો આ કંપનીને કોન્ટ્રાક્ટ આપવામાં આવ્યો ન હોત તો કદાચ મહેસાણાની આ ઘટના બની ન હોત. ભાજપ સરકારની ગોઠવણમાં વારંવાર બ્રિજ તૂટી રહ્યા છે. ત્યારે આ એક તપાસનો વિષય બની ગયો છે.

Source link