‘ભૂરાભાઈ બ્રહ્મચારી'(શ્વાન)ના અવસાનથી શોકગ્રસ્ત બન્યું આખું ગામ, યોજાઈ ખાસ પ્રાર્થના સભા!

 

મહેસાણા: શ્વાનને માણસ પ્રત્યેનું સૌથી વફાદાર પ્રાણી માનવામાં આવે છે. ઘણા પરિવારોમાં તો ડૉગને ફેમિલી મેમ્બરનો દરજ્જો પણ અપાય છે, પરંતુ શેરીમાં ફરતા ડૉગને કોઈ પોતાના બાળકની જેમ સાચવે, અને તેના મોત બાદ તેની અંતિમવિધિ યોજી તેના માનમાં બેસણું પણ રાખે તેવી ઘટના જવલ્લે જ જોવા મળતી હોય છે. કંઈક આવું જ થયું છે મહેસાણા જિલ્લાના કરણનગર ગામમાં, જ્યાં રવિવારે ‘ભૂરિયા’ની આત્માને શાંતિ મળે તે માટે પ્રાર્થના સભા યોજવામાં આવી હતી. આ ભૂરિયો બીજો કોઈ નહીં, પણ ગામનો એક ડૉગ હતો, જેનું તાજેતરમાં જ અવસાન થયું હતું.

bhuriyo dog

કરણનગર ગામના વાડીપતિ વાસમાં રહેતા અલ્કાબેન પટેલ જણાવે છે કે, ગામમાં કૂતરા તો ઘણા છે પરંતુ ભૂરિયો બધાથી અલગ હતો. ગામના બધા બાળકોનો ભૂરિયા માનિતો હતો, અને તેની સાથે તેઓ કોઈ ડર વિના રમતા હતા. કોઈ તોફાની બાળક ભૂરિયા પર સવારી કરવા ચઢી જાય તો પણ ભૂરિયો ક્યારેય ગુસ્સે નહોતો થતો. આમ તો, કૂતરા કોઈ અજાણ્યા વ્યક્તિને જોઈ ભસતા હોય છે, ક્યારેક કરડતાં પણ હોય છે પરંતુ ભૂરિયાએ ક્યારેય એવું નહોતું કર્યું. ગામના લોકોનું તો ત્યાં સુધી કહેવું છે કે, ભૂરિયાનો અવતાર માત્ર કૂતરાનો હતો, બાકી તેનું જીવન તો કોઈ બ્રહ્મચારી જેવું હતું.

આખા ગામના ચહિતા ભૂરિયાના અવસાન બાદ તેને આવતા ભવમાં સારી જગ્યાએ જન્મ મળે તે માટે યોગ્ય વિધિથી તેના અંતિમ સંસ્કાર કરવાની સાથે તેના માટે ખાસ પ્રાર્થનાસભા પણ યોજવામાં આવી હતી. ભૂરિયાની અંતિમ યાત્રા 15મી માર્ચે તેનું અવસાન થયા બાદ ગામમાંથી નીકળી હતી. તેને કોઈ રોગ નહોતો, પરંતુ ઉંમર થઈ જતાં તેણે અંતિમ શ્વાસ લીધા હતા. ભૂરિયો અશક્ત બન્યો હતો ત્યારે પણ ગામના લોકોએ તેને ખવડાવવા-પીવડાવવા તેમજ સેવા-ચાકરી કરવામાં કોઈ કસર બાકી નહોતી રાખી. કોઈ માણસની માફક ભૂરિયાની બારમાની વિધિ કરવા માટે પણ ગામના લોકોએ તૈયારી કરી લીધી છે.

Bhurabhai brahmchari.

રવિવારે યોજાયેલા તેના બેસણામાં પણ 100થી વધારે લોકો હાજર રહ્યા હતા. બેસણામાં ભૂરિયાનો હાર ચઢાવેલો ફોટો પણ મૂકવામાં આવ્યો હતો, જેને લોકોએ નમન પણ કર્યું હતું.

મહેસાણાના કરણનગર ગામના વાડીપતિ વાસના લોકોનો માનિતો હતો ભૂરિયો

Source link