ભાડે આપેલા ઘરમાં પીએમ મોદીની તસવીર જોઈને મકાન માલિક ભડક્યા, ભાડુઆતને આપી ધમકી

 

ઈન્દોરઃ સામાન્ય રીતે વ્યક્તિ જેને પોતાના આદર્શ માનતી હોય તેમની તસવીરો કે તેમના પુસ્તકો, લખાણ વગેરે પોતાની સાથે રાખતી હોય છે. પરંતુ મધ્યપ્રદેશમાં એક મકાનમાં વડાપ્રધાન મોદીની તસવીર લગાવવા બદલ તેમાં રહેતા વ્યક્તિને ધમકીઓ મળવાની શરુ થઈ જતા તેમણે આ અંગે પોલીસને જાણ કરી છે. મકાન માલિકે ઘરમાંથી પીએમ મોદીની તસવીર દૂર કરવા માટે ભાડુઆતને દબાણ કરતા મામલો ગરમાયો હતો. આ પછી ભાડુઆતે મકાન માલિક સહિત અન્ય લોકો સામે પોલીસ ફરિયાદ નોંધાવી છે.

દેશના વડાપ્રધાન નરેન્દ્ર મોદીની વિચારધારાથી પ્રેરિત એક વ્યક્તિએ પોતાને મળતી ધમકીઓ બદલ પોલીસ સ્ટેશન જવું પડ્યું છે. આ ઘટના ઈન્દોરના પીરગલી વિસ્તારની છે કે જ્યાં વર્ષોથી એક ઘરમાં ભાડે રહેતા મોહમ્મદ યુસુફે પોતાના ઘરમાં પીએમ મોદી અને સરદાર વલ્લભભાઈ પટેલની તસવીરો લગાવી હતી. આ જોઈને મકાન માલિક ભડકી ગયા હતા.

ઈન્દોરમાં બનેલી ઘટનામાં મકાન માલિક શરીફ મનસુરી, યાકુબ મનસુરી અને સુલ્તાન મનસુરી દ્વારા એ વાતને લઈને ત્રાસ આપવામાં આવી રહ્યો છે કે, તમે ઘરમાં વડાપ્રધાન નરેન્દ્ર મોદીની તસવીર શું કામ લગાવી છે? આ ત્રણે યુસુફને પીએમની તસવીર નહીં હટાવવામાં આવે તો મારઝુડ કરવાની પણ ધમકીઓ આપી હતી. આ સાથે ઘરમાંથી સામાન ફેંકીને કાઢી મૂકવાની પણ ધમકી આપી હતી. રમઝાનનો મહિનો આવી રહ્યો છે ત્યારે અહીં તસવીર લગાવવી યોગ્ય નથી તેમ કહીને યુસુફને ત્રાસ આપવામાં આવ્યો હતો.

યુસુફે જણાવ્યું કે શરીફ, યાકુબ અને સુલ્તાન દ્વારા પાછલા 8 દિવસથી ત્રાસ આપવામાં આવી રહ્યો છે, આ કારણે મારી માતાને હાર્ટ એટેક પણ આવી ગયો છે અને તેમને સારવાર માટે હોસ્પિટલમાં ખસેડવા પડ્યા છે.

કમિશનર કાર્યાલયમાં થયેલી જનસુનાવણી દરમિયાન યુસુફે કરેલી ફરિયાદ જાણીને અધિકારીઓને પણ ભારે આશ્ચર્ય થયું હતું. તેમણે આ કેસમાં તપાસના આદેશ આપ્યા છે. એડિશનલ ડીસીપીએ આ મામલે જણાવ્યું કે, કોઈ પણ તસવીરને લગાવવા કે દૂર કરવા માટે કોઈ દબાણ ના કરી શકે. સ્થાનિક પોલીસને આ મામલે તપાસના આદેશ આપવામાં આવ્યા હોવાનું પણ તેમણે જણાવ્યું છે. આગામી દિવસોમાં મકાન માલિક સામે આ કેસમાં કાર્યવાહી કરવામાં આવી શકે છે.

Source link