ભાજપનો મુકાબલો કરવા કોઈપણ પાર્ટીએ 50-60 વર્ષની તપસ્યા કરવી પડશે: જે પી નડ્ડા

 

ગાંધીનગર: ભાજપના રાષ્ટ્રીય અધ્યક્ષ જે પી નડ્ડા શુક્રવારે એક દિવસની ગુજરાત મુલાકાતે આવ્યા છે. સવારે એરપોર્ટ પર આગમન થતાં સીઆર પાટીલ, મુખ્યમંત્રી ભૂપેન્દ્ર પટેલ, રાષ્ટ્રીય ઉપાધ્યક્ષ ભાવનાબેન શિયાળ, પ્રદેશ આગેવાનો અને મંત્રીમંડળ દ્વારા તેમનું સ્વાગત કરવામાં આવ્યું હતું. તેમણે કહ્યું કે, આ મારું નહીં પરંતુ ભાજપની વિચારધારાનું સ્વાગત છે. તેમણે વધુમાં કહ્યું કે, કોઈપણ પાર્ટીએ ભાજપનો સામનો કરવો હોય તો 50-60 વર્ષની તપસ્યા કરવી પડશે. ભાજપની ચાર પેઢીઓ ખપી ગઈ, જેમણે યશની અપેક્ષા વગર કામ કર્યું છે.

દિવસ દરમિયાન વિવિધ કાર્યક્રમોમાં હિસ્સો લઈ રાતે તેઓ પરત દિલ્હી જવા રવાના થશે. તો બીજા દિવસે કેન્દ્રીય ગૃહમંત્રી અમિતભાઇ શાહ પણ આખો દિવસ જુદા જુદા કાર્યક્રમો માટે આવી રહ્યા છે. એટલે જ આ સપ્તાહ રાજકીય દ્રષ્ટિએ મહત્વનું બની રહેશે.

મહત્વનું છે કે, ગુજરાત વિધાનસભા ચૂંટણી 2022 માટે હવે રોજેરોજ અનેક પ્રકારની રાજકીય ગતિવિધિ નવા સમીકરણો રચી રહી છે. ચાલુ સપ્તાહે જ કોંગ્રેસ, ભાજપ અને આમઆદમી પાર્ટીના રાષ્ટ્રીય નેતાઓ ગુજરાતના પ્રવાસે આવી રહ્યા છે તેના પગલે આ રાજકીય પક્ષોના કાર્યકરોમાં એક નવી હલચલ પેદા કરી રહ્યો છે. સાથોસાથ આ નેતાઓના આગમનથી રચાનારી ધરીથી નવા રાજકીય સોગઠાં ગોઠવાય તેવી પૂરેપૂરી શક્યતા છે.

ઉલ્લેખનીય છે કે, રાષ્ટ્રીય અધ્યક્ષનો અગાઉ બે દિવસનો કાર્યક્રમ તૈયાર થઈ રહ્યો હતો પરંતુ હવે તેઓ એક જ દિવસ માટે ગુજરાતના પ્રવાસે આવ્યા છે. નડ્ડા દિવસ દરમિયાન એક ધાર્મિક કાર્યક્રમ ઉપરાંત અન્ય ચાર મહત્વની બેઠકો યોજવાના છે. જેમાં ડિસેમ્બર 2022માં યોજાનારી વિધાનસભાની ચૂંટણીને લઈને પક્ષના પ્રદેશ આગેવાનોથી ળઈને મંડલ સ્તર સુધીના કાર્યકરોને માર્ગદર્શન આપશે. રાત્રે દિલ્હી જતં પહેલા વડોદરાના ધાર્મિક કાર્યક્રમમાંથી પરત ફરી ગાંધીનગરમાં મુખ્યમંત્રી નિવાસસ્થાને કોર કમિટી તથા પ્રદેશ ચૂંટણી સમિતિના સભ્યો સાથે બેઠક કરશે.

નડ્ડાના કાર્યક્મો
બપોરે 12.30- અમદાવાદ ગુજરાત યુનિવર્સિટી કન્વેશન સેન્ટરમાં આઠ હજારથી વધુ કાર્યકરોના વિશાળ સંમેલનો ચૂંટણીલક્ષી માર્ગદર્શન આપશે. ત્યારબાદ સાંજે 4 વાગ્યે તેઓ વડોદરા જવા રવાના થશે. જ્યાં તેઓ માંજલપુરમાં વ્રજધામ મંદિર ખાતે વૈષ્ણવ સંપ્રદાયના ધાર્મિક કાર્યક્રમમાં હાજરી આપશે અને ત્યાંથી પરત ગાંધીનગરમાં બેઠક બાદ રાતે પરત દિલ્હી જવા રવાના થશે.

Source link