ભરૂચમાં વહેલી સવારે મકાન ધરાશાયી થતાં ત્રણ બાળકોના મોત, માતા સારવાર હેઠળ

 

ભરૂચઃ ભરૂચના બંબાખાના વિસ્તારમાં એક મકાન ધરાશાયી થવાની ઘટના બની છે, જેમાં ત્રણ બાળકોના કાટમાળ નીચે દબાઈ જવાથી મોત થયા છે. જ્યારે ઘરમાં રહેતી મહિલા હાલ સારવાર હેઠળ છે. બનાવની જાણ થતા પોલીસ અને ફાયર બ્રિગેડનો કાફલો ઘટના સ્થળ પર પહોંચ્યો હતો. આ મકાન જર્જરીત હોવાથી વહેલી સવારે ધરાશાયી થયાની વિગતો મળી રહી છે.

બે માળનું મકાન ધરાશાયી થયું, ત્રણના મોત થયા

રિપોર્ટ્સ મુજબ બંબાખાના વિસ્તારમાં આવેલું બે માળનું મકાન જર્જરીત હતું જેમાં ચાર લોકો રહેતા હતા, સવારે મકાન ધરાશાયી થતા આસપાસના લોકો દોડી આવ્યા હતા, કાટમાળ નીચે દટાયેલા ચાર લોકોને બહાર કાઢીને ભરૂચની સિવિલ હોસ્પિટલમાં સારવાર માટે ખસેડવામાં આવ્યા હતા, જેમાંથી ત્રણ બાળકોને મૃત જાહેર કરવામાં આવ્યા છે જ્યારે બાળકોની માતા હાલ સારવાર હેઠળ છે.

આ મકાન જર્જરીત હતું ત્યારે પાલિકા દ્વારા નોટિસ આપવામાં આવી હતી કે નહીં તે અંગે કોઈ વિગતો સામે આવી નથી. હાલ આ અંગે વધારે તપાસ કરવામાં આવી રહી છે. એવું પણ જાણવા મળી રહ્યું છે કે નોટિસની કામગીરી બાદ કાયદાકીય પરિસ્થિતિ ઉભી થતી હોય છે અને તેવામાં ભયગ્રસ્ત મકાન તે જ સ્થિતિમાં રહી જતા હોય છે અને પછી તે લોકો માટે જોખમી સાબિત થાય છે.

આ દુર્ઘટનામાં એક છોકરો અને બે યુવતીઓના મોત થયા હોવાની વિગતો મળી રહી છે. પરિવાર ઘરમાં ઊંઘતો હતો ત્યારે આ દુર્ઘટના બની હતી જેથી કોઈને બહાર નીકળવાનો સમય મળ્યો નહોતો. એક જ પરિવારના ત્રણ લોકોના મોતથી આસપાસના વિસ્તારોમાં અરેરાટી વ્યાપી ગઈ છે. હવે આગામી સમયમાં શહેરમાં આવેલા જર્જરીત મકાનને ઉતારી લેવાની અને નોટિસ આપવાની ઝડપી કામગીરી હાથ ધરવામાં આવી શકે છે.

આ મકાન જર્જરીત હતું તો તેને ઉતારવાની કામગીરી કેમ નહોતી કરાઈ? શું મકાન માલિકને મકાન ઉતારી લેવા માટે નોટિસ આપવામાં આવી હતી કે નહીં સહિતના સવાલો લોકોને થઈ રહ્યા છે અને તે અંગે પાલિકા દ્વારા તપાસ કરવામાં આવી શકે છે.

Source link