ભરતસિંહ સોલંકીનું મોટું નિવેદન- ‘હાર્દિકભાઈ મુખ્યમંત્રી બને તો પણ મને આનંદ છે’!

 

અમદાવાદ: ગુજરાત કોંગ્રેસના દિગ્ગજ નેતા ભરતસિંહ સોલંકીએ હાલમાં જ એક સ્થાનિક ન્યૂઝ ચેનલને આપેલા ઈન્ટરવ્યુમાં હાર્દિક પટેલ અને નરેશ પટેલને લઈને મોટી વાત કરી છે. ભરતસિંહ સોલંકીએ એક વાતચીતમાં કહ્યું કે ‘પહેલી વાત એ કે હું કોઈ વ્યક્તિ માટે કોમેન્ટ આપવા માટે સમર્થ જ નથી. તમારે જેને પણ કંઈ પૂછવું હોય તો તમારે હાર્દિકભાઈને પૂછવું. મને જ્યારે એક સ્થાનિક ન્યૂઝ ચેનલમાં પૂછ્યું કે હાર્દિક ભાઈ નેતા બને તો? મેં કહ્યું કે હાર્દિકભાઈ મુખ્યમંત્રી બને તો પણ મને આનંદ છે. કારણકે, કોંગ્રેસના મુખ્યમંત્રી બનશે અને આ વાત સૌથી અગત્યની છે. નરેશભાઈ પટેલ મુખ્યમંત્રી બને કોંગ્રેસના મુખ્યમંત્રી બને, કોઈ વણિકભાઈ બને, કોઈ બ્રાહ્મણ બને, કોઈ આદિવાસી બને, કોઈ દલિત બને, કોઈ બક્ષીપંચમાંથી મુખ્યમંત્રી બને, પણ કોંગ્રેસના મુખ્યમંત્રી ગુજરાતની પ્રજાનું કલ્યાણ ભારતીય જનતા પાર્ટીની સરકાર કરતા અનેકગણું કરશે તેનો અનુભવ વર્ષ 1960થી આજ દિન સુધી ગુજરાતની પ્રજાએ જોયો છે.

અહીં નોંધનીય છે કે ગત વર્ષે 2021માં ડિસેમ્બર મહિનામાં કોંગ્રેસના વરિષ્ઠ નેતા ભરતસિંહ સોલંકીએ આડકતરો ઈશારો કર્યો હતો કે, કોંગ્રેસ આવે તો દારૂબંધી હટી શકે છે. તેમણે કહ્યું હતું કે, સમય સાથે દારૂબંધીમાં પણ પરિવર્તન આવી શકે. સાથે જ તેમણે કહ્યું હતું કે, ગુજરાતની જનતા અને મહિલાઓ મંજૂરી આપે તો દારૂબંધી હટાવવી જોઈએ. અમદાવાદના ઓગણજમાં રાહુલ ગાંધી પ્રીમિયર લીગ ક્રિકેટ ટૂર્નામેન્ટના ઉદ્ધાટન સમયે ભરતસિંહે કહ્યું હતું કે, ઠંડીમાં જમવાની વ્યવસ્થા તો અમે કરી છે, પરંતુ અન્ય વ્યવસ્થા થઇ શકે તેમ નથી. ઠંડી બહું છે પણ ગુજરાતમાં હાલ મનાઇ છે, માટે વ્યવસ્થા થઇ શકે નહીં. તેમની આ વાત પર હાસ્યનું મોજું ફરી વળ્યું હતું. તેમણે એમ પણ ઉમેર્યુ હતું કે, યુગ પરિવર્તનની સાથે કદાચ ગુજરાતની પ્રજા જ્યારે આવું કંઇ ઇચ્છશે ત્યારે ગુજરાતની પ્રજાને એવો મોકો પણ મળશે, તે ભવિષ્યની માન્યતા મને લાગે છે. આમ આડકતરી રીતે અમારી સરકાર આવે તો દારૂબંધી હટાવવાનો તેમણે ઇશારો કર્યો હતો.

જોકે તેઓએ કટાક્ષ પણ કર્યો હતો અને જણાવ્યું હતું કે, હાલમાં ગુજરાતમાં દારૂબંધી છે. પરંતુ કેટલી બંધી છે તે તો સૌ કોઇ જાણે છે. ગુજરાતમાં બિનકાયદેસર રીતે જોઈએ તેટલો દારૂ મળે છે. જો દારૂ કાયદેસર રીતે વેચાતો હોત તો સરકારને ટેક્ષની પણ આવક થાત. જો કે હાલ તો ભાજપના મળતીયાઓ જ દારૂ વેચીને આર્થિક લાભ મેળવી રહ્યા છે. તેમણે કહ્યું હતું કે, ‘ગુજરાતમાં ગેરકાયદેસર દારૂ વેચાય છે અને તે પણ ભાજપના નેતાઓના માથા નીચે. સરકારને ટેક્ષ રૂપી ફાયદો થઇ શકે અને વચ્ચે જે મળતિયાઓ પૈસા થાય છે તે ના ખાઈ શકે.

કોંગ્રેસના નેતાએ કહ્યું હતું કે, દારૂબંધી અંગે 7 કરોડ ગુજરાતીઓમાં મારા એકલાનો મત નિર્ણાયક નથી. પણ દારૂબંધી વચ્ચે દારૂ વેચાય છે તે સૌ કોઇ જાણે છે.’ તેમણે કહ્યું હતું કે, ગુજરાતમાં ગેરકાયદે રીતે જોઇએ તેટલો દારૂ મળે છે. સ્વાભાવિક રીતે લોકચર્ચામાં વાત છે. સરકારના ઓથા નીચે જ એમના મળતિયા અને બુટલેગરો દારૂ વેચે છે અને આર્થિક લાભ મેળવે છે. આ પૈસા સરકારમાં જમા થાય તો સરકારને ટેક્સની આવક થાય.

Source link