‘બોય્ઝ નહીં ગર્લ્સ હોસ્ટેલમાં રહેવાની વ્યવસ્થા કરી આપો’, વિદ્યાર્થીની રજૂઆતથી અવઢવમાં મૂકાયા મેડિકલ કોલેજના સત્તાધીશો

 

અમદાવાદ: NHL મેડિકલ કોલેજની બોય્ઝ હોસ્ટેલમાં રહેતા એક છોકરાએ ગર્લ્સ હોસ્ટેલમાં રહેવાની વ્યવસ્થા કરી આપવાની વિનંતી કરતાં મેનેજમેન્ટ અવઢવમાં મૂકાયું છે. બોય્ઝ હોસ્ટેલમાં સમસ્યા હોવાનું કહી આ છોકરાએ ગર્લ્સ હોસ્ટેલમાં તેને શિફ્ટ કરી દેવાની વિનંતી સત્તાધીશોને કરી હતી. આ વિદ્યાર્થીએ સેક્સ રિઅસાઈન્મેન્ટ સર્જરી (જેન્ડર બદલાવા માટે ઓપરેશન) કરાવવાની પણ ઈચ્છા વ્યક્ત કરી હતી. પહેલા વર્ષમાં અભ્યાસ કરતાં આ વિદ્યાર્થીએ સત્તાધીશોને જણાવ્યું કે, તે અંદરથી મહિલા છે અને બોય્ઝ હોસ્ટેલમાં રહેવું સહજ નથી લાગતું, જેથી તેને ગર્લ્સ હોસ્ટેલમાં મોકલી દેવામાં આવે. વિદ્યાર્થીની આ રજૂઆત બાદ તેને કન્સલ્ટેશન અને કાઉન્સિલિંગ માટે મનોચિકિત્સા વિભાગમાં મોકલવામાં આવ્યો હતો.

મનોચિકિત્સા વિભાગના ઓપીડીમાં વિદ્યાર્થીની તપાસ કરવામાં આવી હતી. 17 ફેબ્રુઆરીએ આઉટ-પેશન્ટ સમરી તૈયાર કરવામાં આવી જેમાં લખ્યું હતું, “દર્દીમાં જેન્ડરને લઈને ચિંતા જોવા મળી હતી અને તેણે સેક્સ બદલાવવા માટે સર્જરી કરાવવાની પણ વિનંતી કરી છે. હાલ તે સ્થિતિ સાથે સમાધાન કરી રહી છે પરંતુ તેને વધારાના સહકાર અને મદદની જરૂર છે. તેને હોસ્ટેલમાં એક અલગ રૂમની વ્યવસ્થા કરી આપવામાં આવે. તે માનસિક રીતે મહિલા છે અને એ જ રીતે તેની સાથે વર્તન કરવામાં આવે તેવી ઈચ્છા છે.” આ રિપોર્ટ બાદ ડિપાર્ટમેન્ટના ડૉ. નીલિમા ડી. શાહે સત્તાધીશોને વિનંતી કરી કે જરૂર મુજબની વ્યવસ્થા કરી આપવામાં આવે.

જેન્ડર ડિસ્ફોરિયા (Gender Dysphoria) મતલબ વ્યક્તિ અસહજતા અનુભવે કારણકે તેના બાયોલોજિકલ સેક્સ અને તેની સ્વીકૃત ઓળખમાં તફાવત હોય છે. ડૉ. શાહે આ કેસની વધુ વિગતો આપવાનો ઈનકાર કર્યો હતો. મનોચિકિત્સા વિભાગના ડૉ. નિમેષ પરીખે પુષ્ટિ કરી કે, વિદ્યાર્થીએ તેમના ડિપાર્ટમેન્ટની મુલાકાત લીધી હતી. તેમણે કહ્યું, “આ કોઈ રોગ નથી અને વિદ્યાર્થીને કોઈ માનસિક બીમારી પણ નથી. અગાઉ આ પ્રકારના કેસ ખૂબ ઓછા જોવા મળતા હતા કારણકે લોકો આ વિશે ખુલીને બોલતાં શરમાતા હતા, ડરતા હતા. હવે દર વર્ષે થોડા-થોડા કેસ જોવા મળે છે. જેનું કારણ છે કે, આ અંગે લોકોમાં જાગૃતિ આવી છે અને સામાજિક સ્વીકૃતિ મળી રહી હોવાથી ડર વિના બોલી શકે છે.”

કોલેજના સત્તાધીશોનું કહેવું છે કે, વિદ્યાર્થીની ગર્લ્સ હોસ્ટેલમાં રહેવા અંગેની વિનંતી પર હજી કોઈ નિર્ણય કર્યો નથી.

Source link