બીજો કપિલ દેવ બનવા ઈચ્છતો હતો અશ્વિન, ઝડપી બોલિંગ કરતો હતો!

 

બેંગલુરૂઃરવિચંદ્રન અશ્વિન હાલમાં ભારતીય ક્રિકેટનો બીજો સૌથી સફળ બોલર બની ગયો છે. લિજેન્ડરી અનિલ કુંબલે બાદ તે ટેસ્ટમાં સૌથી વધુ વિકેટ ઝડપનારો ભારતીય બોલર બની ગયો છે. જોકે, અશ્વિન નાનપણમાં ઓફ સ્પિનર બનવા ઈચ્છતો ન હતો. તેનો લક્ષ્યાંક કંઈક અલગ હતો. અશ્વિને બાળપણમાં એક ઝડપી બોલર બનવાનું સપનું જોતો હતો.

અશ્વિને શ્રીલંકા વિરુદ્ધ રમાયેલી પ્રથમ ટેસ્ટ મેચમાં કપિલ દેવના 434 વિકેટના રેકોર્ડને તોડી નાંખ્યો હતો. અશ્વિને જાતે જ ખુલાસો કર્યો છે કે તે નાનપણમાં એક બેટર બનવા ઈચ્છતો હતો અને બીજો કપિલ પાજી બનવા માટે ઝડપી બોલિંગ કરતો હતો. 35 વર્ષીય અશ્વિને પોતાની 85મી ટેસ્ટમાં કપિલ દેવનો રેકોર્ડ તોડ્યો છે. ટેસ્ટ ક્રિકેટમાં તે અનિલ કુંબલે બાદ બીજો સફળ ભારતીય બોલર બન્યો છે.

અશ્વિને પોતાની યુટ્યુબ ચેનલ પર કહ્યું હતું કે, મને ઘણું સારૂ લાગી રહ્યું છે. 28 વર્ષ પહેલા હું મારા દાદા સાથે કપિલ પાજી માટે તાળીઓ વગાડી રહ્યો હતો જ્યારે તેમણે રિચાર્ડ હેડલીનો રેકોર્ડ તોડ્યો હતો. મેં ક્યારે સપનામાં પણ વિચાર્યું ન હતું કે હું તેમનાથી વધારે વિકેટ લઈ શકીશ કેમ કે હું બેટર બનવા ઈચ્છતો હતો. ખાસ કરીને આઠ વર્ષની ઉંમરમાં જ્યારે મેં રમવાનું શરૂ કર્યું હતું.

1994માં બેટિંગ મારો શોખ હતો. સચિન તેંડુલકર ઉભરતો સ્ટાર હતો અને કપિલ દેવ ખુદ એક શાનદાર બેટર હતા. હું મારા પિતાની સલાહથી મધ્યમ ઝડપી બોલિંગ કરતો હતો જેથી કરીને હું આગામી કપિલ દેવ બની શકું. ત્યાંથી ઓફ સ્પિનર બનવું અને આટલા વર્ષો સુધી ભારત માટે રમવું, મેં ક્યારેય સપનામાં પણ વિચાર્યું ન હતું. નોંધનીય છે કે ભારત માટે અનિલ કુંબલેએ સૌથી વધુ ટેસ્ટ વિકેટ ઝડપી છે. અનિલ કુંબલેના નામે 619 વિકેટ છે. જ્યારે વિશ્વમાં સૌથી વધુ ટેસ્ટ વિકેટ ઝડપવામાં કુંબલે ચોથા ક્રમે છે.

Source link