બિલ્ડર સામે જંગે ચઢેલા અમદાવાદીને 10 વર્ષની કાયદાકીય લડાઈ બાદ ન્યાય મળ્યો!

 

અમદાવાદ: બિલ્ડર દ્વારા સોસાયટીમાં કરવામાં આવેલા ગેરકાયદે બાંધકામ સામે છેલ્લા 10 વર્ષથી જંગે ચઢેલા અમદાવાદીની મહેનત આખરે રંગ લાવી છે. રાજપથ ક્લબની પાછળ શહેરના પોશ વિસ્તારમાં આવેલી પર્લ 36 સોસાયટીમાં રહેતા અમૃતલાલ અદરેશણાએ સોસાયટીમાં કરવામાં આવેલા ગેરકાયદે બાંધકામ વિરુદ્ધ 2012માં કાયદાકીય લડાઈ શરુ કરી હતી. આ જ વર્ષે તેઓ આ સોસાયટીમાં શિફ્ટ થયા હતા, પરંતુ તેમને ખ્યાલ નહોતો કે નવા ઘરમાં રહેવા આવતાની સાથે જ તેમને એક લાંબી લડાઈ લડવાની આવશે. ગેરકાયદે બાંધકામ દૂર કરવા માટે તેઓ 10 વર્ષમાં 50 RTI કરવાની સાથે 10 લાખ રુપિયાનો ખર્ચો કરી ચૂક્યા છે.

અમદાવાદ મિરરના અહેવાલ અનુસાર, વકીલોને 10 લાખ રુપિયા જેટલી ફી ચૂકવ્યા બાદ આખરે હવે અમૃતલાલને ન્યાય મળશે તેવી આશા જાગી છે. તેમના જણાવ્યા અનુસાર, ગુજરાત હાઈકોર્ટે બુધવારે મૌખિક આદેશમાં સોસાયટીમાંથી ગેરકાયદે બાંધકામ હટાવવા માટે જણાવ્યું હતું. અમૃતલાલના જણાવ્યા અનુસાર, તેઓ 10 વર્ષ સુધી વાઈગ્રો ઈન્ફ્રાકોમના બિલ્ડર વીરેન્દ્ર ગિરિશ પટેલ અને ગોપી વીરેન્દ્ર પટેલ વિરુદ્ધ આ લડાઈ માત્ર પોતાના માટે નહીં, પરંતુ સોસાયટીના અન્ય રહીશો માટે પણ લડ્યા છે. આ જ બિલ્ડર દ્વારા પર્લ 36 સોસાયટી બનાવવામાં આવી છે.

અરજદારના જણાવ્યા અનુસાર, બિલ્ડરે ગેરકાયદે રીતે વિઝિટર્સ પાર્કિંગ એરિયામાં થિએટર અને જિમ તેમજ બેસમેન્ટ પાર્કિંગમાં સ્ટોરેજ એરિયા તેમજ મજૂરોના રહેવા માટે ક્વાર્ટર બનાવી દીધા હતા. એટલું જ નહીં, બિલ્ડરે સોસાયટીના રસ્તા પર પણ દબાણ કર્યું હતું, જેથી રોડની પહોળાઈ પણ ઘટી ગઈ હતી. ઓરિજિનલ પ્લાન અનુસાર, રસ્તાની પહોળાઈ 4.5 મીટર હતી, જે સાંકડા થઈને માંડ દોઢ મીટરના થઈ ગયા હતા. જેના કારણે ના માત્ર સોસાયટીના રહીશોને અગવડ પડતી હતી, પરંતુ સાંકડા રસ્તાને કારણે સોસાયટીમાં આગ લાગવા જેવી ઘટના બને તો ફાયરબ્રિગેડના વાહનને આવવું પણ મુશ્કેલ બની જાય તેમ હતું.

તેમના વકીલ નિયતી ચૌહાણે આ કેસ અને કોર્ટના ઓર્ડર અંગે જણાવ્યું હતું કે કોર્પોરેશનમાં આ અંગે તમામ સ્તરે રજૂઆત કર્યા બાદ પણ તેમના પ્રશ્નનું કોઈ નિરાકરણ ના આવતા આખરે 2016માં હાઈકોર્ટમાં કેસ દાખલ કરવામાં આવ્યો હતો. કોર્પોરેશને કોર્ટમાં એવો જવાબ આપ્યો હતો કે તેણે આ અંગે કાર્યવાહી કરીને દબાણ દૂર કર્યું છે. જોકે, આ કાર્યવાહી માત્ર કાગળ પર જ કરવામાં આવી હતી. અરજદારે કોર્ટ સમક્ષ દબાણ ના હટાવાયું હોવાની રજૂઆત પુરાવા સાથે કરતા જસ્ટિસ એ.વાય. કોગજે દ્વારા કોર્પોરેશનને સોસાયટીમાં થયેલા ગેરકાયદે બાંધકામની પૂરી તપાસ કરીને GPMC એક્ટની જોગવાઈ હેઠળ ત્રણ મહિનામાં યોગ્ય પગલાં લેવા આદેશ કર્યો હતો.

Source link