બિનસચિવાલય ક્લાર્ક અને ઓફિસ આસિસ્ટન્ટની પરીક્ષાની તારીખ જાહેર, ક્યારે યોજાશે?

 

અમદાવાદ: ગુજરાત ગૌણ સેવા પસંદગી મંડળ (GSSSB) દ્વારા ગત તારીખ 13મી ફેબ્રુઆરી, 2022ના રોજ યોજાનારી અને મોકૂફ રખાયેલી બિનસચિવાલય કારકૂન અને ઓફિસ આસિસ્ટન્ટની પરીક્ષા (Bin Sachivalay Clerk and Office Assistant Exam)ની નવી તારીખ જાહેર કરવામાં આવી છે. હવે આ બિનસચિવાલય કારકૂન અને ઓફિસ આસિસ્ટન્ટની પરીક્ષા આગામી તારીખ 24મી એપ્રિલ, 2022ના રોજ યોજાશે. GSSSBના ચેરમેન IAS એ કે રાકેશે ટ્વિટ કરીને આ અંગે જાણકારી આપી હતી.

વિવાદમાં આવેલી બિનસચિવાયલ પરીક્ષાની તારીખ આખરે જાહેર થઈ ગઈ છે. તારીખ 24 એપ્રિલે બિન સચિવાલય ક્લાર્કની પરીક્ષા યોજાશે તેવી જાહેરાત કરાઈ છે. ગૌણસેવા પસંદગી મંડળની પરીક્ષાની જાહેરાત કરીને એવું કહેવાયું છે કે મોકૂફ રખાયેલી બિનસચિવાલય કારકૂન અને ઓફિસ આસિસ્ટન્ટ પરીક્ષા હવે તારીખ 24 એપ્રિલે લેવાશે. ઉલ્લેખનીય છે કે 2 મહિના બાદ બિનસચિવાલય કારકૂન અને ઓફિસ આસિસ્ટન્ટની પરીક્ષા લેવાશે. 2 વર્ષમાં એકથી વધુ વખત બિન સચિવાલય ક્લાર્કની પરીક્ષા મોકૂફ રહેતા રાજ્યભરના ઉમેદવારોમાં રોષ ફાટી નીકળ્યો હતો. ઉમેદવારો દ્વારા તાત્કાલિક પરીક્ષાની તારીખ જાહેર કરવાની માગ ઉઠી હતી.

અહીં નોંધનીય છે કે 3900થી વધુ જગ્યાઓ માટેની બિન સચિવાલય ક્લાર્કની પરીક્ષા માટે 10 લાખથી વધુ ઉમેદવારો મેદાનમાં છે. ગૌણ સેવા પસંદગી મંડળના ભૂતપૂર્વ ચેરમેન અસિત વોરાના રાજીનામા બાદ આ પરીક્ષા મોકૂફ રખાઈ હતી. અગાઉ પણ આ પરીક્ષા મોકૂફ રખાઈ હતી. GSSSBના ચેરમેન IAS એ કે રાકેશે અગાઉ જણાવ્યું હતું કે હવે બિન સચિવાલય ક્લાર્કની પરીક્ષા નવી SOP મુજબ લેવાશે. પરીક્ષાના વ્યવસ્થિત આયોજન માટે આ ભરતી હાલ પૂરતી મોકૂફ રાખવામાં આવી છે. તેમણે કહ્યું હતું કે, ભરતી પરીક્ષાનું ટ્રાન્સપોર્ટેશન, પ્રિન્ટિંગ પ્રેસથી લઈ તમામ સુવિધાઓ પર હાલ સારામાં સારી રીતે કામ ચાલી રહ્યું છે, પરીક્ષા પારદર્શક રીતે લેવામાં આવશે જેથી તૈયારી કરતાં ઉમેદવારોને પૂરતો ન્યાય મળે.

Source link