બદલાયા ક્રિકેટના આ નિયમોઃ હવે નહીં થાય માંકડિંગ વિવાદ, જાણો કેવી રીતે બદલાશે રમત!

 

મેચ દરમિયાન બોલ ચમકાવવા માટે ખેલાડીઓ પોતાની લાળ કે પરસેવો તેના પર લગાવતા હોય છે. જોકે, કોરોનાના બાદ બોલને ચમકાવવા માટે લાળ (Saliva)નો ઉપયોગ કરવા પર પ્રતિબંધ મૂકી દેવામાં આવ્યો છે. હવે ક્રિકેટના નિમયો તૈયાર કરતી મેરીલેબોન ક્રિકેટ ક્લબે (Marylebone Cricket Club, MCC) તેના પર સંપૂર્ણ પણે પ્રતિબંધ મૂકી દીધો છે. આ નવો નિયમ આ વર્ષે ઓક્ટોબરથી અમલમાં આવશે. જોકે, આ સિવાય પણ ક્રિકેટની રમતમાં અન્ય કેટલાક નિયમોમાં ફેરફાર કરવામાં આવ્યો છે. જેના કારણે રમતમાં પણ થોડા ફેરફાર આવશે.

માંકડિંગનો વિવાદ સમાપ્ત થઈ જશે
ક્રિકેટમાં જેને લઈને વિવાદો થયા છે તે હવે નિયમ બની ગયો છે અને તે છે માંકડિંગ (Mankading Rule). આને ખેલદિલીની વિરુદ્ધ માનવામાં આવે છે. આઈપીએલમાં રવિચંદ્રન અશ્વિને જોસ બટલરને આવી રીતે આઉટ આપ્યો હતો. જેને લઈને ક્રિકેટ જગત બે ભાગમાં વહેંચાઈ ગયું હતું. જોકે, હવે આવો કોઈ વિવાદ ઊભો થશે નહીં. જૂના નિયમ પ્રમાણે માંકડિંગ લો-31 (અનફેર પ્લે) અંતર્ગત આવતો હતો. હવે તેને લો-38 (રન આઉટ)માં સામેલ કરવામાં આવ્યો છે. હવે તેને અનફેર કે ખેલદિલી વિરુદ્ધ માનવામાં આવશે નહીં. આ સાથે જ હવે ક્રિકેટનો આ વિવાદ હંમેશ માટે સમાપ્ત થઈ જશે.

બોલ પર લાળ નહીં લગાવી શકે ખેલાડીઓ
આમ તો કોરોના બાદથી જ ખેલાડીઓને બોલ પર લાળ લગાવવા માટે પ્રતિબંધ મૂકવામાં આવ્યો છે. જોકે, હવે તેને નિયમ જ બનાવી દેવામાં આવ્યો છે. રિસર્ચમાં સામે આવ્યું છે કે બોલર્સને મળનારા સ્વિંગના પ્રમાણ પર તેની ઘણી ઓછી કે પછી કોઈ અસર પડતી ન હતી. એમસીસી એ જણાવ્યું છે કે બોલર સ્વિંગ મેળવવાના હેતુંથી બોલ ચમકાવવા માટે લાળ કે પરસેવાનો ઉપયોગ કરતા હતા.

રિપ્લેસમેન્ટ પ્લેયર્સ
હવે બદલવામાં આવેલા ખેલાડીને એવી જ રીતે ગણવામાં આવશે જેવો કે તે એ જ ખેલાડી છે જેની જગ્યાએ તે આવ્યો છે. તે મેચમાં જો ખેલાડીએ બેટિંગ કરી લીધી હશે તો તેને બેટિંગ કરવા મળશે નહીં. આ ઉપરાંત તે મેચમાં ખેલાડી પર કોઈ પ્રતિબંધ લાગ્યો હશે તો તે તેના પર પણ અમલી બનશે.

કેચ આઉટ થયા બાદ સ્ટ્રાઈકનો નિયમ બદલાયો
અત્યાર સુધી ખેલાડી શોટ મારે અને બોલ હવામાં હોય ત્યારે તે રન લેવા દોડે છે. પરંતુ તેવામાં જો તે કેચ આઉટ થાય અને ત્યાં સુધી તે રન ક્રોસ કરી લે છે તો નવા આવનારા બેટરે નોન-સ્ટ્રાઈક એન્ડ પર જવું પડે છે. જોકે, હવે નવા નિયમ પ્રમાણે જો બેટર કેચ આઉટ થાય છે અને ભલે તે નોન-સ્ટ્રાઈક એન્ડ પર પહોંચ્યો હોય પરંતુ નવો આવનારો બેટર હવે સ્ટ્રાઈક પર જ આવશે. જો ઓવર બદલાઈ હોય તેવી સ્થિતિમાં જ તે નોન-સ્ટ્રાઈક એન્ડ પર જશે.

ડેડ બોલના નિયમમાં ફેરફાર
જો કોઈ પણ ટીમને ફિલ્ડિંગમાં કોઈ વ્યક્તિ, પ્રાણી કે બીજી કોઈ વસ્તુથી નુકસાન થાય છે તો ડેડ બોલ જાહેર કરવામાં આવશે. મેદાન પર અચાનક કોઈ પ્રેક્ષક દોડીને આવી જાય છે કે પછી અચાનક કૂતરું મેદાનમાં આવી ચડે છે અને તેનાથી મેચ પર અસર પડે છે તો અમ્પાયર કોલ આપશે અને ડેડ બોલનો સંકેત આપશે.

વાઈડ બોલ
બેટ્સમેન ક્રિઝ પર શોટ રમવા માટે મૂવ થાય છે તો વાઈડ બોલના માપદંડ પણ તે પ્રમાણે રહેશે. જો કોઈ બેટર વાઈડના માર્ક સુધી મૂવ થઈને પહોંચી જાય છે અને બોલર તેના મૂવ થવાના કારણે વાઈડ માર્કની બહાર સુધી બોલ ફેંકે છે તો અમ્પાયર તેને લીગલ બોલ જાહેર કરશે. જો બેટર તેને રમી શકતો નથી તો તે વાઈડ જાહેર કરવામાં આવશે. ખાસ કરીને ટી20 ક્રિકેટમાં બેટર ઝડપથી રન નોંધાવવા માટે ક્રિઝમાં ગમે તે દિશામાં જઈને શોટ મારવાનો પ્રયાસ કરતો હોય છે. તેવામાં આ નિયમથી રમત પર અસર પડશે.

પિચ પર બહાર પડેલા બોલ પર શોટ ફટકારી શકાશે નહીં
જો બોલ પિચની બહાર પડે છે તો બેટ્સમેન હવે નવા નિયમ પ્રમાણે શોટ ફટકારી શકશે નહીં. બોલ પર શોટ મારતી વખતે બેટ કે પછી બેટરનો થોડો ભાગ પિચમાં હોવો જરૂરી બની જાય છે. જો બોલ પિચની બહાર પડે છે તો અમ્પાયર તેને ડેડ બોલ જાહેર કરશે. ઘણી વખત બોલરના હાથમાંથી બોલ લપસી જાય છે અને પિચની બહાર ગમે ત્યાં પડતો હોય છે. તેવા સમયે સ્ટ્રાઈક પર રહેલા બેટર પર નિર્ભર કરે છે કે તે તેના પર શોટ ફટકારે છે કે નહીં. જો તે શોટ નથી રમતો તો તેને ફેર પ્લે ગણવામાં આવે છે. પરંતુ એવો કોઈ નિયમ નથી કે બેટર તેના પર શોટ ન રમી શકે.

ગત વર્ષે રમાયેલા ટી20 વર્લ્ડ કપમાં ઓસ્ટ્રેલિયાના ડેવિડ વોર્નરે મોહમ્મદ હફીઝના આવા બોલ પર બાઉન્ડ્રી ફટકારી હતી. હફીઝ બોલિંગ કરી રહ્યો હતો ત્યારે બોલ ડિલિવરી કરે ત્યારે તેના હાથમાં તે છટકી ગયો હતો અને બે ટપ્પા પડીને તે ગયો હતો. જોકે, હવે બેટર પિચની બહાર જઈને બોલને શોટ મારી શકશે નહીં. બેટર કે બેટનો થોડો ભાગ પિચમાં હોવો જરૂરી બની જશે. પરંતુ જો બોલર બેટરને પિચની બહાર જઈને શોટ રમવા માટે મજબૂર કરે છે તો તેવા બોલને નો બોલ જાહેર કરવામાં આવશે.

Source link